a[Jer 3:6]
b[Kin 21:3; 2 Sto 33:3]
c[1 Kin 13:2]

2 Chronicles 34

King Josaiago po

(Dąį 34-35)

Josaia aga Juda dabego king bidali

(2 Kin 22:1-2)

Te Josaia aga Juda dabego king pedelali sogo agai kibu be te 8 kibu be elaluali. Tama aga Jerusalemde aga kibu be 31 king bidali. a  Josaia agai Godigo gedude wiegi yai kolesaga mu yali. Agai aga wąį king Devitgo polobadu yali wiegi yai kolesaga tiwai tama yali, tama agai Genuai Bidigo po tigidali wali pabo bomo mu yali, te po tagalobeo.

Josaia agai tibo godigo piksa noma sela sąyani

Te Josaia aga king bidibadi kibu be te 8 kibu be wabode, agai kibu be 15 elaluali, agai aga wąį king Devitgo Godiba lotu po wabo gagalali. Tama aga king bidibadi 12 kibu be ebode, agai tigidali sę bidi dabebolo olama, tigidali Juda me Jerusalem buluba pelama, augwali bolo tibo godiba lotu po wabo pesage, me god we Aserago piksa noma, me gasa tibo god piksa augwaligo nogogo nigai ni god, me aingo nigai god doligi pao po wali. Tama aga sę bidi dabe dali biligi pelama, tama agai augwaligo te tibo god Balgo alta dabe doligi pabo suali. Tama me te wiegi yai denami hano holobo pauda ulubo alta me dolali, te Balgo alta ugwadu daide dolalubadi dolali. Augwaligo tibo god we Aserago piksa noma pisilama tagalali, me te meba tibo god dabego piksa noma pisilama tagalali, tama augwaligo te piksa dabe halua mia sąnama, keli gagabode mu tagalali. Tama augwaligo te pauda selama, tama augwaligo te tibo godiba lotu wali we bidigo gų pageba gegele biligi pali. b  Tama Josaia agai te tibo god dabego pris bidi dabego dili selama, tama agai te pris dabego ofa iyu yali te alta daide ulali. Agai te sę ela silama, tama te Juda dabe me Jerusalem dabe augwali Godigo gedude wiegi yai me pedelali. c 

Tama Josaia aga Manase hanigo tǫba peyu, me Efraim hanigo tǫba peyu, me Simeon hanigo tǫba peyu, me not badu peyu, me Naptali hanigo tǫba tama biligi pali. Tama agai te tibo god dabego alta te polobadu boi hwįani sogo dolali, te hanigo taun dabede te alta dabe dolama tagalali. Aga te Israel dabego tigidali buluba biligi pelama, tama te alta dabe doliyu, me tibo god we Aserago piksa doliyu elama, tama meba tibo god dabe doliyu elama, tama te nai dabe haluama, mia sąnama, tama pauda gagalali. Tama me agai te wiegi yai denami hano holobo pauda ulubo alta aluama tagalali. Agai te sę silama, tama aga Jerusalemba ma pali.

Augwaligo Godigo tempel bede elalubo bomai po buku suali

(2 Kin 22:3-20)

Te Josaia aga king bidibadi 18 kibu be wabode, agai te tibo god dabe sela sąnama, Godigo tempel be me aga kantri Godigo gedude wiegi yai ilali. Tama tialima nosali agai bidi sela te Genuai Bidi aga Godigo tempel be dodolabo sę ebo tonalumainu tagala palali. Te bage selago nogi e dao, Safan te Asaliago ogwa, me Masea te Jerusalem hanu tonalubo tobolu bidi, me Joa te Joahasgo ogwa. Joa aga kingo kuskus bidi dao. Te bidi sela augwali te Livai dabe te Genuai Bidigo tempel be sunumi tonalubo bidi dabe pageba pali. Augwaligo polobadu te Manase hani we bidigo, me Efraim hani we bidigo, me gasa u not badu bidibo Israel we bidigo, me Juda we bidigo, Benjamin hani we bidigo, me Jerusalem hani we bidigo te Godigo tempel be dodolobo sę emainogo tau sabo mone sali. Tama augwali selago te mone tobolu bidi pris Hilkia bidibo madi te mone sela pali. 10 Tama augwaligo te mone te Godigo tempel be ma geselebo sę ebo tonalubo bidi dabebolo mani. Tama te sę tonalubo bidi dabego te mone selama, te bede te monego sę yali, te be dodolobo sę yali. 11 Te sę tonalubo bidi dabego te mone selama, te kamda te be sę ebo bidi dabebolo me masigigo be sę ebo koneai bidi dabebolo mani, tama te monego te bidi dabego polo dodolai masigi dabe abelali, tama me augwaligo te be kąų ni me be walawala ni abeliyu yali, te Godigo be obo tomode be dabe dodolobo sę yainogo. Polobadu te Juda dabego king dabego te be bugagia tonalusiąma yai digi te be dabe dwai yali. 12 Te bidi dabe augwaligo wiegi yai sę mu yali. Te kingo ofisa dabego te Livai dabego te sę ebo bidi dabe tonalumainu sa muani. Te Livai dabe augwaligo nogi e dao, Jahat, me Obadia, te Merari hani, me Sekaraia, me Mesulam, augwali si te Kohat hani dao. Tama te Livai dabego te gitago te musik elebo mu konea pali. 13 Augwaligo te be sę yabo nai dabe tolasa bilibo bidi dabe tonaluali, me te Genuai Bidigo obo tomode gasa meba sę ebo bidi dabe tonalubo sę yali. Tama meba Livai dabego kuskus sę yali, tama mebago te Godigo be sunumi tonalubo, te Godigo be obo tomode, tama mebago gasa meba sę dabe yali.

14 Te Livai dabego te we bidigo Genuai Bidigo tempel beba sesali mone dabe sidubadi, te tobolu bidi pris Hilkiago te Genuai Bidigo bomai po te Mosesgo nogoba mani bomai po mani, te po elalubo po buku suali. 15 Tama tialima Hilkiago Safanbolo te po walali, “Eno buku me deli Genuai Bidigo bede munalubo suali. Te bukude Genuai Bidigo bomai po elalubo suali,” wali. Tama Hilkiago te buku Safanbolo mani. 16 Tama Safango te buku selama, tama agai king magi pelama, tama agabolo e tama po walali, “Dago nago dabolo wali sę tigidali mu yalio. 17 Dago te Genuai Bidigo bede munaluali mone dabe tigidali selama, tama te be sę dodolobo ebo tonalubo bidi dabebolo mayu, me te sę bidi dabebolo mayu yali,” te po wali. 18 Tama Safan agai po ma weyu te po wali, “King, tobolu bidi pris Hilkiago enabolo e buku manio,” wali. Tialima agai te buku dagalama, kingbolo neda mani.

19 Te kingo te bukude Godigo bomai po te bukude elalubo po odobode, tialima agai homu sęgę genuai mu ebaso, tama aga ugwa pisąyali. 20 Tama agai pris Hilkia, me Ahikam te Safango ogwa, me Apdon te Maikago ogwa, me Safan te kingo kuskus, me Asaia, king aga ofisa bidi, augwali i olama asao po wali. Augwali asela silibo si, teda agai augwalibolo te po wali, 21 “Te bomai po buku eno megi sali da, tede Genuai Bidigo homugo dago wali pomainu homu yali po e bukude haninama te wali dao. Tiali goli dago wąį nǫų dabego te po wali pai menio. Tama tialima, te tama tialigo da, Genuai Bidigo da dali sębę genuai mu emainu ilali dao. Tiali goli dago megi Genuai Bidigo te buku polo te sali dao. Tama tialima, eno homugo dage pelama, Genuai Bidibolo hanalugi pao, tama ena dali Israel bulude bidibo we bidi me Juda bulude bidibo we bidi, dago mena sę emainu egowe page sugi piąo,” king Josaiago te po wali. 22 Te bidi dabe augwaligo kingo po polo oda sali. Tialima augwali Jerusalemde te gesi be naniba pali, te profet we aga nogi Hulda dali po wainogo pali. Hulda aga Salumgo we dao, te bidigo te pris bidi dabego aubo nai dabe munalubo pesage tonalubo bidi dao. Salum aga te Tokhatgo ogwa dao, tama aga wąį Hasra dao. Hulda agai te bidi dabego po odama da, 23 teda agai augwalibolo te po wali, “Genuai Bidi, da Israel dabego God, agai te po walio, ‘Dage te dage tagala palali te bidi pageba ma pao, tama agabolo e tama po walao, 24 “Ena God ena Genuai Bidi, eno te augwaligo te kingbolo neda mani te bukude bomai po wali paibao, tama eno te Jerusalem me te taunde we bidi dabeba dene mawaibao. 25 Te we bidi augwaligo enaba tudi ola menama, tama augwaligo tibo god dabeba ofa yai dao. Tama augwaligo te dwai kolesagago eno augwali dali sębę emainu ilai dao. Eno te Jerusalem dabe dali sębę mu elama, tama eno te sębę munu me siligobeo.

26 Tialima megi ena Genuai Bidi dage Israel dabego God, eno dagego kingbolo e tiwai po wainogo ebao, te augwaligo te buku nageba neda mani sogo, 27 nago koneani, eno mena sę te Jerusalemba iyu, me tede bidibo we bidibolo eno yaibao wali sę po nago koneani dao. Tama nago te po odali sogo nago naga digi aiyaba eno gedude aiyaba elaluai dao. Tama me ma nago naga ugwa pisąlama, tama nago enaba gela olama, tama enaba i walio. Tama tialima, ena Genuai Bidi eno te po te obao, eno nago i wali po polo odalio. 28 Tama eno te dolobo sę Jerusalemde pedalobo sumainu polo sula tagalogobeo. Menio. Nage bugagia naga mu bidaibao. Tiali goli nosali nage isilama, tama augwaligo nage polo pubulai digi da, teda eno te Jerusalem me tede bidibo we bidi dali sę tama dolaibao,” te po te dage tagala palali bidibolo walao,’ God Genuai Bidigo te po wai,” te we Huldago te po wali. Profet we Huldago Genuai Bidigo po te bidi dabe augwalibolo polo pusa silibo si, teda augwaligo te po king pageba ma sela pali.

Te we bidi augwaligo Genuai Bidi dologode bidaibao po dąų wali

(2 Kin 23:1-20)

29 Tialima king Josaiago tigidali Judade me Jerusalemde tobolu bidi dabe i olama sisinagasali. 30 Tama kingo te pris dabe me Livai dabe me tigidali Juda me Jerusalem we bidi sisinani, te nogi yai bidi dabe dali te nogi meni yai bage me, tama augwali Genuai Bidigo tempel beba sisinigi pali. Augwali sisinama, tama agai augwaligo Genuai Bidigo tempel be tomode sali Bomai Po buku selama, tama agai te tigidali bukude po augwalibolo neda mani. 31 King aga pesagede dolaluyu, tama agai Genuai Bidi dali po dąų wali. Te agai te we bidigo te bukude elalubo po tigidali wali paibao olama, po dąų wali. Agai po dąų weyu te po wali, “Eno tigidali kolesaga me homu kolesaga sese deli naga yaibao, te Genuai Bidigo tigidali bomai po me tigidali po wali paibao,” wali. 32 Tama kingo te Benjamin hani me gasa hani te Jerusalem tomode bidibo we bidi augwaligo Genuai Bidigo kontrak po wali paio po dąų waiąo po bomo yali. Tama tialima nosali te Jerusalem we bidi augwaligo te augwa wąįgo God dali dąų walali po tigidali wali pali. 33 Te Israel bulu tigidali badu te tibo god dabego piksa dabe sese me elaluali. Tama te nai dabe te Genuai Bidigo gedude dwai nai mu elaluali. Tialima Josaia agai te tibo god dabego nai dabe sese tama sela sąyani. Tama agai bomo elama, te Israel dabe augwaligo Genuai Bidi augwa God wali pao po wali. Tama aga king bidibo sogo da, te we bidi augwaligo Genuai Bidi augwa wąįgo God wali bomo elama mu wali pali. Tama augwaligo Genuai Bidi me tagalobeo.

Copyright information for `MPS