2 Corinthians 7

Eno ama dede muo, dago te Godigo te da dali dąų wali po dabe tama salio. Tama tibaso, dago dena tigide me homu elalubo meda tigidali sela sąnama tama wiegi yai tedali bidinao. Tama dago Godide wi elama, tama wiegi yai doloba pai kolesaga mu naga sesemane sogo wali pinao.

Polgo te Korin bulu bidi dabe dali wiegi yai homu pemene mu yali po

Dagego da dali dwagi yai homu eyu da godolo mu genuai yao. Magi baso meni. Dago bidi me delibolo dwai sę me ilibeo. Dage deli me dolosiąwai. Te dago bidi me deli tibo po ola menama, agai nai anoma elama me sisąwai. Eno dagebolo te tiwai po kisiliyu me wabeo. Magi baso meni. Eno tama tiwai po polobadu walio: dago dage dali dwagi yai homu eyu godolo mu ebao, tama dage isibo si da, teda da me dage dali isabo homu yaibao. Tama dage bidibo ula elaluyu bidibaso da, teda da te bidibo ulade dage dali bidabo homu yaibao. Eno dagede homu si ebo meni. Eno homu pemene wiegi yai dagebolo ebao. Te tigidali dabolo pedalobo sęgęde, te eno homugo dage koneama, tama tede ena homu dua nagame mu ilama bidibo, tama eno homu wiegi yai pemene mu elalubo dao.

Magi baso meni. Polobadu da aselama te Masedonia tǫba sabolali, tama tede me da tigi dwasianu toma me nabeo. Menio. Te haniani sęgę daba pedalai. Dago po konila te Godigo po odisąbo bidi dabe dali wali, tama da homude wi yali. Tiali goli God da, te sęgę elalubo bidigo homu dua nagame ilibo bidi dao. Agai te Taitus da bidibo madi asobogo agai da wiegi yai homu nagame ilai dao. Taitus te da bidibo digi sabalobode, tede naga te Godigo da wiegi yai homu nagame me ilibeo. Menio. Dagego Taitusgo homu nagame ilibaso, tama agai te po sela asali, tama tede me Godigo dago homu nagame ilama bomo mani. Taitusgo te dagego da suabo homu godolo mu eyu, tama dagego enade homu dene eyu gela wabo po dabolo pusali, tama dagego ena dali deli homu elama bidabo homu ebo po me wali. Tama eno homu pemene wiegi yai hauwa mu eyu bidibao.

Eno koneani, eno asęna tolali pasgo dagebolo dene mani, tiali goli tede eno ge nabo meni. Mu tama, polobadu hasia bolo eno tede ge nani, tiali goli megi da menio. Eno koneani, te pasgo dagebolo homu sęgę mani, tiali goli te pęwadage sogo naga yalio. Taitusgo po dabolo pusubaso, megi eno homu pemene wiegi yai ebao. Eno dage homu sęgę yalide wiegi yai homu pemene me ebeo. Menio. Eno te homu sęgęgo dage homu begelali, tede eno wiegi yai homu pemene ebao. Eno koneani, dagego duga homu begelemainogo eyu, Godigo digi te homu sęgę dageba pedalomainogo ilali. Tama tibaso, dago pogo dage dwasianu me dolobeo, te eno asęani pogo dage te tiwai tau sai dao. 10 Homu sęgę ilibo te Godigo nigilibo, tebogo da bidi dabe dago dwai sę yalide ge neyu tama homu begelemainogo ebo dao, tama te kolesagade Godigo da ma saibao. Tama dago te homu begelebo kolesagade te ge negobeo, te dwagi yai naga dao. Tiali goli te tǫde bidi dabe augwaligo homu sęgę ebo kolesagago, tede te isibo sę pedalobo dao. 11 Dagego bugagia homu koneao. Te homu sęgę Godigo dagebolo mani, tego agai te haniani wiegi yai kolesaga dagebolo pedalomainogo yali. Agai dage asesa selama, tama dage hogodolama duga po dodolomainogo yali. Agai dage hodolama te dwai penani sę yali bidi wado ilama, tama dage Godide wi yaibao. Dagego homugo da suabo homu elama tama gela weyu, tama dagego te dwai penani sę yali bidi dodolobo sę bomo elama yabo homu yai. Te dage tomode te bidi me deligo dwai penani sę yali, tede te tigidali badude dagego ebo kolesaga te po dodoloyu yali. Dagego kolesaga tama tiwai hania hanilama pedalai dao. Tama tiyu, te dagego te bidigo yali dwai sęde megi sęgę me elalubo menio.

12 Te mu tama, polobadu eno te pas dagebolo asęna tolali. Tiali goli eno te bidi me deligo dwai sę yali te homu elama te po me asębeo. Tama eno gasa bidi homu me ebe, te agabolo dwai sę yali bidi me homugo konebeo. Eno homugo augwali siba naga homu elama te po polobadu asęna me tolobeo. Menio. Eno te dagego kolesaga hanilama pedalomainogo yali, tama God gedude duga bugagia konemainogo yai: dagego da godolo mu yalio. Tede me tama eno te polobadu pas dagebolo asęna tolali. 13 Dagego te kolesagago da homu nagame ilama dua bidai.

Tama dago homu nagame naga me ebeo. Menio. Dago homu wiegi yai pemene yai. Magi baso meni. Dage tigidaligo te Taitusgo homu noma toma nabo nigilali, tama aga wiegi yai homu pemene yalio. Dago te sulama, tama da wiegi yai homu pemene mu idubadi bidali.
14 Polobadu eno dage nogi te Taitus gesabidide ugwaba sali, tama megi eno te pode ena hale me sabeo. Menio. Tigidali po dago dagede wabo po, te mu po naga wai dao. Tama tiwai naga eyu, dago dage nogi te Taitus gesabidide ugwaba sali, tama te eno dagede agabolo pusali po me hanilama pedalali, te mu po naga dao. 15 Taitus aga dage bidibo madi pedalobaso, tama dage wi elama didibili eyu, tama dagego aga siyu geseali, tama dage tigidaligo agai po wali pai. Agai megi te homu me konedu tama agai dage dali dwagi yai homu eyu godolo mu ebo homu genuai pedalobo dao. 16 Megi eno homugo mu konebo, eno dage dali homu si ebo meni, te dagego tigidali kolesaga dolo mu ebaso, eno homu dageba tia pabo te usu dao.

Copyright information for `MPS