a[2 Kin 24:13; 2 Sto 36:10]
b[2 Kin 24:14-15; Dan 1:1-7]

2 Kings 20

Te king Hesekia gasi sobaso, tama te Genuai Bidigo aga tau sali

(Ais 38:1-8, 38:21-22, me 2 Sto 32:24-26)

Tama te Asiria hani augwali asama, te Juda hani me dolagasiąbadi, te sogo, te king Hesekia aga moni gasi mu sali, tama pąde aga isabo homu mu yali. Tialima, te profet bidi Aisaia, te Amosgo ogwa, agai te king Hesekia gasi ebo sugi pelama, tama agai e tama po wali, “Genuai Bidigo e tama po wali, ‘Nago te gasi sia sogobeo, tama nage isaibao,’ wali, ‘tama teyu nago te naga bede bidibo we bidi augwalibolo e po wao, tama augwaligo te nago sę dabe dodolinao,’ God Genuai Bidigo te po wai,” Aisaiago te po wali.

Tama te Hesekia agai te wali po odali, tama aga gesabidi te be habu dagaba gegi solama, tama agai e tama gedu haluasa po Genuai Bidibolo wali, “Genuai Bidi, ena nage wali mu peyu, tama eno nago sę mu yai dao. Tigidali sogo eno nago homu godolo ebo kolesagadu naga wali pai dao,” wali. “Tama teyu, nago te eno te sę yaliba kone palama, tama nago ena isimainogo sula tagaligio.” Tama agai tama gedu haluasa po olama, tama aga gela genuai mu wali.

Tama te profet Aisaia aga te kingo be tagalama, tama aga pali. Tiali goli, aga te kingo te be obo sesege taga pisąbadi yaide, tama Genuai Bidigo agabolo po ma wali, “Nage ma geasa pelama, te king Hesekia sugi pao, te king te eno hani we bidigo king bidi dao,” wali, “tama agabolo e tama po wao, ena God dao, aga wąį nǫų Devitgo Genuai Bidi, eno agai gedu haluasa po wali eno odalio, tama aga moni gela wabo sualio,” wali. “Tama tibaso, eno aga ma wiegi yai ma ilibao,” wali. “Tama duba te aga te eno lotu beba ma pelama, te ena dolo lotu po waibao,” wali. “Tama agabolo e tama po wao, ena Genuai Bidi, eno po obao, tama eno aga bidabo kibu be ma bobe ilibao, te e tama kibu be aga ma bidaibao, te nogo si olama, te sągą badu a naga, te 15 kibu me ma bidama, tama nosali aga isaibao,” wali. “Tama teyu, te Asiria king bidigo aga aiyaba elaluama, tama augwaligo te Jerusalem taun somainu eno sula tagalogobeo. Mu menio,” wali. “Eno tama tiwaibao,” wali, “magi baso meni, eno ena genuai nogi ma kone paliyu, tama me te eno polobadu te king Devit dali po me bodolu sali poba kone paliyu, tama tiaibao, te eno sę bidi.” Genuai Bidigo te po Aisaiabolo pusali.

Tama te profet bidi Aisaia pelama, te po mina silama, tama agai te kingo sę ebo bidi dabebolo e tama po ola mani, “Dage pelama, te ni kaya du augwaligo te wa ilali kaya du sigi piąo,” wali. Tama augwaligo te ni du dabe sigi pelama, tama dodolama, tama te king Hesekiago te bomai keniba muani, tama tibo si, te kingo bomai keni pedala selama, tama te moni gasi silali.

Tialima, hasia bolo king Hesekiago Aisaiabolo e tama po hanalu wali, “Genuai Bidigo agai enabolo mena tama tiwai sę ola menama, tama tedu eno koneaibao, eno ma wiegi yai pedalama, tama duba ena nago gedude te tempel beba paibawe?” te po hanalu wali.

Tama te profet bidi Aisaiago agabolo e tama po ola mani, “Genuai Bidigo e tama dąį nagebolo ola mawaibao. Nago te tama dąį sulama, koneagameo. Dago te be posobode te giliga ge soabo me nedebo togobilide suao. Nago homugo te giligago te togobiligo noma polo selasa peyu, te nogo si dąįba usu nigi pabo si, ma nago homugo te togobilide te noma polo ma geasa peyu, te nogo si dąįba usu nigi pabo si?” 10 Tama te king Hesekiago e tama po wali, “Te tama tibo te usu dao, te giligago te togobili noma polo selasa peyu, te nogo si dąį usu nigi pabo te bomai sę meni. Tama tialima, eno homugo me te togobili noma aga polo tama ma begasa peyu, te nogo si dąįba usu nigi pabo tama emainao,” wali. 11 Tama tialima, te profet bidi Aisaiago te Genuai Bidi God dolo bomonama mu wali, tama te Genuai Bidi Godigo te togobili noma te giligago polo ma selasama, ma geasa peyu, te nogo si dąįba polo usu nigi pali. Te togobili te polobadu king Ahasgo nigai togobili dao.

Te Babilon king bidi Merodakgo agai te me badu bidi te Jerusalem bulu taunba tagala palali

(Ais 39:1-8)

12 Te Merodak Baladan, Baladango ogwa, aga te Babilon bulu king bidi. Agai te king Hesekia moni gasi yali po odali, tama tibaso, agai te pas me deli asęnama, tama me te agai te olo tau siyu maiabo nai me deli dodolama, tama agai te tagala palobo bidi dabebolo nogode munama tolali, tama augwaligo selasa pelama, te king Hesekiabolo magi pali. 13 Tama te king Hesekiago te bidi dabego wali po odama silibo si, tama agai te bidi dabe te agai te moni bakstuaba te agai augwali odasa pelama, tama agai te tigidali mone me, tama me te gasa nai dabe me, te nai dabe me tigidali te bidi dabebolo agai augwalibolo wasilali. Tama te augwaligo te agai te mone mubo bede muani te tigidali silva me, me te gol me, te nai dabe tigidali augwaligo sula silali, tama te dwagi yai denami ebo pauda me, tama me te dwagi yai denami ebo sanda wel me, tama me te boi hwįbo nai dabe tigidali me, tama me te agai te bakstuade muani te gasa nai dabe tigidali augwaligo suali. Te king Hesekia agai te nai me deli me dualobe. Mu meni. Tama agai te kingo be obo tomode elalubo nai me, tama me te Jerusalem bulude elalubo nai dabe tigidali te agai augwalibolo ola mena silali.

14 Tama te Babilon bulu bidi dabe te augwa buluba ma begasa pela silali, tama nosali te profet bidi Aisaia asama, te king Hesekia suagasali, tama agai agabolo e tama po hanalu wali, “Nage pageba te asali bidi dabe, te augwali mena bulu bidi dabe dawe? Tama augwaligo nagebolo magi nai po waliwe?” Tama te king Hesekiago agai agabolo e tama po wei ponani, “Te bidi dabe augwali te digibulu bulu mu, te Babilon bulu bidi dabe asalio,” wali.

15 Tama te profet bidi Aisaiago te po wali, “Tama augwaligo mena mena nai naga mu te nago obo tomoba pelama, sualiwe?” Tama te king Hesekiago agai te po wei ponoyu, e tama po wali, “Tama eno augwalibolo te eno te tigidali doado bage dabe me dualobeo,” wali, “tama augwalibolo te eno te doado bage tigidali mu ola mena silalio,” wali.

16 Tialima, te profet bidi Aisaiago te king Hesekiabolo te po wali, “Megi eno nagebolo eno e po obao, Genuai Bidigo po dao. 17 Genuai Bidigo te po wai, ‘Bodolu me deli nosali pedalaibao,’ wali, ‘tama te Babilon hani augwali asama, tama te kingo bede te mubo doado bage tigidali sagasaibao,’ wali, ‘tama me te tigidali doado bage te naga wąį nǫųgo polobadu te augwaligo te mone te genuai bakstuade sisinama muani doado bage me. Tama augwaligo te doado bage me deli munalubo sula tagalogobeo. Mu menio. Tama augwaligo te tigidali doado bage dabe selasa, te augwa Babilon buluba paibao,’ wali. a  18 ‘Tama te augwaligo te nago hanigo tomode te me badu wai dabe selama, tama te wai dabe augwali te Babilon buluba odasa paibao. Tama augwaligo te odasa pabo ogomani te augwali te kibu ebo gilama te sogoli tinama, tama te augwali te Babilon bulu king bidigo bede sę yabo bidi nigilaibao,’ wali.” b 

19 Tama te king Hesekiago agai te profet Aisaiago wali po odali, tama agai te profet bidi Aisaiabolo e tama po walali, “Genuai Bidigo po nago enabolo pusa mobao,” wali, “te po te dwagi yai po dao.” Hesekiago te tama po wali, magi baso meni, agai e homu yali, ‘Te ena king bidi me bidibo sogo, te dwai dwai sęgę ebo sę pedalogobeo. Tama da bugagia mu bidaibao, tama te boi me hwįgobeo,’ te homu yali.

Te king Hesekia isali po

(2 Sto 32:32-33)

20 Te king Hesekiago te tigidali haniani sę yali po da, te po gasa bukude elalubo, augwaligo e tama nogi wabo da, Te Juda Hanigo King Bidi Dabego Yali Sę Po Buku dao. Te bukugo te tigidali bomai sę agai yali po, tama te tǫ dulude te bobobage wę asabo wę gamia tų agai nigilama, te Jerusalem taun buluba wę kegasa asai dao. Tama te e bukugo me te po wabo da, te agai ulu wę nigai da wabo dao. 21 Te king Hesekia isali, tama te aga wai, te Manase, te aga ayago yali sę selama, te aga king bidi nigilama bidali.

Copyright information for `MPS