a[Jer 25:1-38; Dan 1:1-2]
b[Jer 22:24-30; 24:1-10; 29:1-2]
c[Ese 17:12]
d[Jer 37:1; Ese 17:13]
e[Jer 27:1-22; 28:1-17]
f[Ese 17:15]

2 Kings 24

Te Jehoiakim aga te Juda hanigo king bidi nigilama bidibo sogo, te Babilon bulu king bidi Nebukatnesargo te aga ami soldia bidi dabe selama, tama te augwaligo te Juda hani dabe dali boi hwįagasali. Tama te augwaligo te king Jehoiakim aga hani dali augwali aiyaba elaluali. Tiali goli, nosali te kibu be sela silibo si, te king Jehoiakim agai homugo te king Nebukatnesargo aga munu me tonalugobe homu yali, tama teyu, te king Jehoiakim aga te king Nebukatnesar dologode munu ma bidibe. a  Tama tibaso, Genuai Bidi Godigo te Babilon hani bidi me siyu, me te Siria hani bidi dabe me siyu, tama me te Moap hani bidi dabe me siyu, tama me te Amon hani bidi dabe me siyu elama, tama te king Jehoiakim dali boi hwįnama, tama te Juda hanigo bulu Jerusalem taun dolomainu Genuai Bidigo tagala palali. Genuai Bidigo agai tama tiali sę te agai te profet bagebolo pusa mani poba usu nigi pai, te profet bidi dabe te aga sę ebo bidi dabe da. Genuai Bidi aga digi te tama tiwai kolesaga te bidi haniba menama, tama tiwai sę yali. Magi baso meni, agai homugo te Juda hani hagela mu eyu, agai homugo te Juda hani augwali te augwa tǫ tagalama, te digibulu sela sąwainu yai. Genuai Bidi agai te king Manasego yali te dwai kolesaga me konealudu, agai tama kolesaga augwalide dolo yali. Tama me te agai e tama homu koneani, te king Manasego agai te tigidali Jerusalem bulu pedaide te haniani dwai kolesaga isąwai doloba pai we bidi dabe ela muani, tama Genuai Bidi agai homu te king Manasego te dwai kolesaga yali sęgo sali sęgę agai tagalabo homu ebe.

Te king Jehoiakim agai te haniani sę yali po elalubo, te gasa bukude elalubo da, te buku augwaligo e tama nogi ebo da, Te Juda Hanigo King Bidi Dabego Yali Sę Po Elalubo Buku da, wabo dao. Te king Jehoiakim isali, tama te aga ogwa, Jehoiakingo te aga ayago sę selama, tama aga king bidi nigilama, sę yali.

Megi tama tibo sogo te Babilon kingo te bulu taun tonaluali polobadu te Isip bulu king bidigo te bulu taun tonaluai, tama te Isip bulu dąįde gagalama, te wę Yufretis teba sabaligi pali. Tama teyu, te Isip hani dali te augwa ami soldia bidi dabe augwaligo te gasa buluba me pelama, te boi me hwįgi pabe.

Te bidi Jehoiakin aga te Juda hanigo king bidi nigilali

(2 Sto 36:9-10)

Te bidi Jehoiakin agai kibu be te 18 kibu be usu nama bidama, aga te Juda hanigo king bidi nigilali. Tama aga te Jerusalem bulude aga te king bidi nigilama bidali, te polua sela bidai. Aga ida nogi te e dao, te agai nogi Nehusta, te aga aya te Jerusalem bulu bidi Elnatango wegi da. Te king Jehoiakingo agai te aga ayago yali kolesagadu wali pali, tama agai te Genuai Bidi gedude dwai kolesaga mu yali.

10 Tama te king Jehoiakin aga te king bidi bidibo sogo, tama te Nebukatnesar aga sę ebo gavman ofisa bidi dabe meba augwaligo te Babilon ami soldia bidi dabe siyu elama, tama te augwali asama, te Jerusalem bulu taun bobegela sagaselama, tama augwaligo te boi hwįnama, te Jerusalem taun sainu yali. 11 Te Babilon ami soldia bidi dabe augwaligo te Jerusalem bulu taun bologobealudubadi yaide, tama te king Nebukatnesar aga digi aga ami soldia bidi dabe dali aga aselama, bidalubo suali. 12 Tama te king Jehoiakingo sualima, te king Nebukatnesar aga ami soldia bidi dabe dali asama bidibo suali, tama tialima, te king Jehoiakin ebadi, te aga ida ebadi, tama me te aga gavman ofisa bidi me, me te augwa genuai bidi dabe me, tama me te kingo be tonalubo bidi dabe me, augwali tigidali te taun tagalama, buluba pelama, te king Nebukatnesar dali sisinama, tama augwaligo Nebukatnesarbolo te po wali, “Tama dago homugo te boi ma hwįgobeo,” wali. Tama tialima, te king Nebukatnesargo te king Jehoiakin aga kalabusiba muani. Tama te sę yali sogo, te king Nebukatnesar agai kibu be te 8 kibu be te Babilon bulude king bidai. b  13 Tama te king Nebukatnesar aga te Genuai Bidigo tempel be tomoba pelama, tama agai te tigidali gol te king Solomongo nigali naide muani gol dabe tigidali sali. Tama me te gasa dwagi yai doado bage te Genuai Bidigo tempel bede muani me, me te kingo bede muani doado bage me, tama tigidali te agai te Babilon buluba selasa pali. Agai te tama tiali sę te Genuai Bidigo polobadu wali poba usu nigi peyu, tama sę yali. 14 Tama te king Nebukatnesar agai te tigidali te Jerusalem bulude bidali we bidi dabe tigidali me, me te tigidali gavman ofisa bidi dabe me, tama me te boma pai ami soldia bidi dabe me, te we bidi dabe tigidali, te 10,000 usu bidi dabe agai selasa, te Babilon buluba pai. Tama me te agai te tigidali bidi dabe te haniani nai dabe nigibo konea pai bidi naga selama, tama me te ain nigibo konea pai bidi dabe me, agai selasa pali. Tama agai te bidi dabe augwali tigidali te Babilon taun buluba odasa pelama, te kalabus iligi pali. Tama agai e tama tiali, te tigidali te haniani nai dabe mu meni yai bidi dabe naga tagalama, te Juda hani augwa bulude bidibadi taga soali.

15 Tama te king Nebukatnesargo te king Jehoiakin dali, te aga ida ebadi, me te aga we me, me te aga sę ebo gavman ofisa bidi dabe me, tama me te Juda hanigo genuai bidi dabe me, augwali tigidali te kalabus elama, tama agai augwali te Babilon buluba odasa pali. c  16 Te king Nebukatnesargo agai te tigidali te Juda hanigo bomai ami soldia bidi dabe naga selasa pali, te bidi dabego namba usu te 7,000. Tama me te haniani nai dabe nigibo konea pali bidi me, tama me te haniani nai te ain dabe nigibo konea pai bidi dabe me naga, agai te augwali umabo mu sali. Te bidi dabe augwaligo namba te 1,000 usu da. Te tigidali bidi dabe, tama te bidi dabe augwali te ami soldia bidi dabe nigilama, sę yabo boma pai bidi naga mu.

17 Te king Nebukatnesar agai homugo te bidi Matania, te bidi te king Jehoiakin aga aya sabi bidi da, te bidi agai te aga amago ogwa Jehoiakin hasegelama, aga te king bidi nigilali. Tama te king Nebukatnesargo te bidi Matania nogi hasegelama, te agai nogi Sedekaia nogi polali. d 

Te Babilon bulu bidi dabego te Jerusalem bulu bidi dabe dali boi hwįnama, tama te taun Jerusalem sali

(2 Sto 36:11-21, me te Jer 52:1-11)

18 Te bidi Sedekaia agai kibu be te 21 kibu be elalubadi, tama aga te Juda hanigo king bidi nigilali. Tama aga te Jerusalem taunde aga king nigilama bidali kibu be te 11 kibu be bidai. Aga ida nogi da, agai nogi Hamutal, Jeremaiago wegi da, aga aya te taun Lipna bulu bidi da. e  19 Sedekaia agai te king Jehoiakimgo yali kolesagadu wali pali, tama agai te Genuai Bidigo gedude dwai kolesaga mu yali.

20 Tama te Juda hanigo augwaligo me, te Jerusalem taunde bidibo we bidi dabego me, te haniani dwai kolesaga ebo sęde te Genuai Bidi aga haliga sębę dwai mu yali, tama tibaso, te Genuai Bidigo te we bidi dabe augwaligo gesabidi subo hagela mu eyu, tama agai te we bidi dabe augwali te augwa bulu tǫ tagalama, digibulu bidigi pomainu, mu sela sąyani. f 

Copyright information for `MPS