2 Kings 7

Tama te moni nasi ebo sogode Elisago te po wei ponoyu, e tama wali, “Mu tama dao, odao. Genuai Bidigo te po wai, ‘Do tama tibo sogo bodolude, te we bidi dabe augwali te taun sunumi pąde elalubo maket teba peyu, tama augwaligo te 3 kilogram te witgo nigai dwagi yai plaua abeligi paibao, me te 6 kilogram rais bali, te podolai monego abeligi paibao’ tama wali.” Elisago te po wali.

Tama te king tonaluyu tau sabo gavman ofisa bidi me deli aga te king dali asali. Te bidigo te Elisago wali po odali, awe, tama agai te po wei e tama ponani, “Tagalao. Tialima, Genuai Bidi God aga digi te dagalude elalubo moni bakstua tų dalama, te umabo nai daba gealugi sogo da, teda eno homugo dago e tiwai dwasianu monego dago nai abelebo me usu egi menigi da,” wali.

Tama Elisago te gavman ofisa bidibolo te po wai, “Mu tama dao, tama nago te nai pedalobo suagameo, tiali goli nago te wit nai dabe munu me tugobeo,” Elisago te po wai.

Siria ami bidi dabe augwali wi pai po

Te sogo te bidi me si me si tama bidi tigide te oiyabe gasi yai bidi, te bage te Samaria taun tomoba pabo moni tų te bulu badu te me si me si tama bidi augwali tede bidai. Tama augwa naga po miyu, e tama po wali, “Magi baso da ede naga olo bidiyu, tama te isibo bodolu naga tonalubo wagawe?” te po wali. “Da pelama, te tuabo nai kegegi pinao,” wali. “Tiali goli, da te Samaria taun tomoba pogobeo. Augwali te tuabo nai meni, tama teyu nasigo da me isaibao, tama me ma te tiali, tama da e pesagede naga bidalu da, teda da me isaibao. Tialima, da te Siria bage bidibo pesageba pinao. Tama tialima, augwaligo da me elebaso da, te usu dao. Tialima, augwaligo da sula tagalama, da bida obaso da, teda usu dao,” augwaligo augwa hasi te po wai.

Tama tialima, te pio mu augwali hodaluama, te Siria bidi hani bidibo pesageba pali. Tama te Siria bage bidibo pesage pąba sabalobo sogo, augwaligo suali, ma te pesagede bidi me deli bidibo sube. Magi baso, tigidali te Siria bage wi pela silai suali. Te pio mu, te Genuai Bidi aga digi te Siria bage augwali wi pomainu genuai po mu kulukulu u wai, te Siria bage augwaligo odama, tama tialima, te genuai hani ami bidi dabe te bidi duabo kibu hos me, me te karis kibu dabe dali, augwali hodobo asai tiwai ąǫ yali. Tama te Siria bage augwaligo te po tama wai, “Tialima, te Israel bage augwaligo te Hit king bidi badi, te Isip king dabe dali, augwaligo abelama, tama te ami bidi dabe augwaligo da dali hwįagasainu wabao,” wali. Siria bagego te po olama, tama te augwali bidali pesage polo tagalama, tama augwali polo tama mu hodaluama, isidali weyu wi pai. Augwaligo te sel ugwa be me, te hos kibu me, me te donki kibu me, augwa naga tede bidibadi taga pai. Tama augwali wi pai, tama augwali peyu, magi nai me deli sela pabe.

Tama te sogo te me si me si tama bidi augwali te Siria bidi dabe bidali pesageba sabaligi pali, augwaligo pelama, te sel ugwa be me deli tomoba pali, tama augwaligo te be tomoba subadi yaide, te Siria bagego tubo nai me, te wain ąį me, te be tomode munalubo suali. Tama augwaligo te nai selama tuyu, te ąį me selama tuyu bidali. Tama nosali augwaligo te silva me, gol me, ma name ugwa me, te Siria bagego doado bage hauwa mu augwaligo selama, tama te tolasa pelama, te gasa madigi me deli dualigi pai. Tama augwali ma aselama, tama augwaligo te me sel ugwa bede muani doado bage dabe me ma sali. Tama augwa ma tolasa pelama, gasa madigi me dualigi pali. Tama nosali augwa digi augwa tomode po miyu, te e tiwai po tama wali, “Tialima, dago dwagi yai kolesaga ebeo. Megi dago dwagi yai nai mu sualio. Tama da pelama, te tigidali we bidibolo wagi pinao,” wali. “Tialima, dago te pedauwali dąų ola selama bidiyu, tama te be posoboba usu nigi peyu da, teda dago sęgę mu elaluaibao. Polo tama, da megi pelama, tama te kingo sę ebo gavman tobolu ofisa bidi dabe augwalibolo wagi pinao,” wali.

10 Augwali te hulide tama augwali te Samaria buluba ma geasa pai. Tama te taun tų tonalubo bidi dabe augwali i wagi peyu, e tama wai, “Da te Siria bage bidali pesageba pai dao. Tama dago suali, ma bidi me deli bidibo subeo,” wali, “tama te bidi dabego po wabo dago odobeo,” wai. “Te Siria bage augwali pela silai, tama te augwaligo tigidali doado bage te augwa bidali pesagede taga pela silai yalio,” wali. “Tama te doado bage munalubao. Augwaligo te hos kibu, me te donki kibu, me te gebelali haliga augwaligo te peda palebe yalio,” wali. “Menio. Te kibu dabe te haliga kebealu bidibo, te Siria bage bidali pesagede bidibo sualio. Tama te tubo nai me, te tigidali doado bage me, te sel ugwa bede me munalubo,” tama po wali.

11 Te taun obo sunumi tonalubo bidi dabe augwaligo te po odali, tama augwaligo i weyu, tama te we bidibolo po olama, tama te po te kingo beba pusugi pao wali.

12 Huli tomode mu kingo te po odali. Tama aga hodaluama, te aga sę ebo gavman ofisa bidi dabe augwalibolo e tiwai po tama ola mani, “Eno koneanio, te Siria bagego homu kolesaga. Augwaligo koneani, ma dago tuabo nai mu menia sobaso yalio. Tama tibaso, augwaligo te bidali pesage taga pelama, tama augwali te kala dasuba duala sali bogo. Augwaligo te homu yai, tama dago te taun tagalama, buluba pali bogo homu eyu, tama augwaligo homugo da pageabi elama, tama dago te taun augwaligo sainu ebao,” kingo te po wali.

13 Tama te gavman ofisa bidi me deligo agabolo te po wai, “Tama dago bidi me badu tagala palama, tama augwali pelama, te Siria bage wi pali page te magi nai me pedalubaso wi pai yabo wenama, sugi pomainao,” wali. “Tama tialima, te Siria bage augwaligo te dago e tagala palobo bidi dabe me ela muai baso da, teda usu dao, magi basowe, da tigidali te taun tomode te bidibao, da dolabo me hasia te tolali bidi hani isilali gilama da me tama isilaibao. Tama tialima, dago te me badu bidi dabe augwaligo te e bidibo a naga hos kibu selama, tama augwali pomainao,” wali.

14 Awe, tama tialima, augwaligo te bidi me badu dąį ilali. Tama te kingo te karis kibu si badi, me te hos kibu badi elama, te bidi dabebolo mani. Tama te bidi dabe tagala palama, tama augwali pali, te magi naigo te Siria bage bidibo pesage gudulali wenama, sugi pai. 15 Te bidi dabe augwali pelama, kegegi pali bage e tiwai tama suali, te Siria bidi dabe augwa digi wi pai suali. Tama augwali te Siria bidi dabe pali wali pelama, te wę Jordanba sabaligi pali, tama augwaligo te Siria bagego doado bage te name ugwa me, me te hwįbo nai me, me te gasa nai dabe me tama, te Siria bage augwali wi peyu, te doado bage dabe te tų sisiyu tulalua pai suali. Tama tialima, augwali ma geasa pelama, te king bidibolo pusugi pali.

16 Tama te sogo te we bidi dabego te nai dabe suali po odobo si, augwali polo udulama peyu, te Siria bage bidali pesageba sabolama, tama augwaligo te Siria bagego taga pali nai dabe tigidali sai. Tama augwaligo te o gagawai nai te plaua umabo mu sali, tama me te nai bali me umabo mu sali. Tama tibaso, augwaligo 3 kilogram te sęgę te dwagi yai o gagawai nai plaua, o 6 kilogram sęgę te bret bali, te nai si te maket munama, te mone podolai sabo usu naga muani, te Genuai Bidi Godigo tama tiaibao wali podu wali peyu, tama tiai. 17 Kingo te aga sę ebo gavman ofisa bidi, te bidi aga te hulide sę ebo konea pai bidi mu, king agai te bidi dąį ilali, te bidi aga pelama, te ami bidi dabego tonalubo madigi te taun moni tųba tonalugi pao wali. Tama te gavman ofisa bidi te taun tų pąde dolalubadi yaide, tama te we bidi dabe augwali te Siria bidi dabe bidali madi soainu soyu, tama te we bidigo udulama soali. Tama te umabo we bidi mu te tų bulu badu udulama asali, tama tialima, te we bidi dabe augwaligo te bidi agabolo hanalubadi yaide, tama aga degasa pai munalubadi yaide, tama te we bidi dabego agaga pedubadi kęnama, te bidi isiboba usu nigi pali. Polobadu te kingo Elisa sugi pali sogo, tama Elisago te agai homugo te nosali yabo sęgę po te agai koneama pusali po, te wali poba usu nigi soyu, te bidi isibo yabao wali. Megi te po te nai walali gilama, te poba mu usu nani dao wali. 18 Elisago te kingbolo e tiwai po tama polobadu ola mani, “Do e tama tibo bodolu tiwaide, te tigidali we bidi augwali te Samaria taunba pabo tųba naga paibao,” wali, “tama augwaligo te 3 kilogram sęgę yai te dwagi yai o gagawai nai plaua me, me te nogo a olama, te me badu nogo kibisa wagi solama sęgę yai 6 kilogram rais bali te podolai mone usu te augwaligo abelaibao,” Elisago te po polobadu gana wai dao. 19 Tialima, te gavman sę ebo ofisa bidi megi da mu isali. Agai Elisago po wei ponoyu, e tama po wali, “Tagalao. Tialima, Genuai Bidi God aga digi te dagalude elalubo moni bakstua tų dalama, te umabo nai daba gealugi sogo da, teda eno homugo dago e tiwai dwasianu monego nai abelebo usu egi menigi da,” te po wai dao. Awe, tama te Elisago te gavman ofisa bidibolo e tama po wai, “Mu tamao, naga gedugo digi suagameo, te nai te pedalobao, tialima nago da te wit nai nago munu me usu elama te nai tugobeo,” wali. 20 Tama megi te sęgę te Elisago wali po tiwai gilama te pedalobao wali. Te gavman sę ebo ofisa bidi te taun tomoba pabo tųde dolaluali bidi, tama te we bidi augwali te nai polo sainu te buluba udulama soyu, tama augwaligo te bidi degasa pai munalubadi, tama te we bidigo ugwadu agaga sodu geai madigi, tama te ofisa bidi aga mu isali.

Copyright information for `MPS