a[1 Sto 20:1]
b[Tob 9:53]

2 Samuel 11

Devitgo te Uriago we dali penane sę yali

Te tigidali deli deli kibu bede, te kedau ebo silainu ebo sogo, te king dabego te augwa boi bidi dabe dali boi hwįyu yai. Tialima, te Devitgo te Siria dabe aiyaba elaluali te kibu bede nosali badu, tama te kedau ebo silainu ebo sogo, Devitgo te Joap dali, te aga ofisa dabe me, te Israel ami bage tigidali dali, te Amon dabe dali boi hwįgi pomainu tagala palali. Augwa te boi hwįgi pelama, tama te Amon dabe aiyaba elaluama, tama te taun hanu Raba bagulali. Tiali goli, Devit digi te hwįbo madiba me pisąwai. Aga te Jerusalemde bidai. a 

Me sogo deli be pio ebode Devit godege pilama, tama pio mu ebadi, aga te betde pila muani tagalama, hogodaluali. Te aga be te pedu daide te toma nabo pesage elaluai. Tama tialima, aga teba ugwaba holama, tama tede toma neyu bilali. Aga te aba tonono bilibadi, tama agai te we me deli gasa bede wę paudubo suali. Tama te we te gasa sawi yai we muo. Tialima, Devitgo te niwai we mu yaliwe, te mu koneai sainu, te bidi me deli tagala palali. Tama agai te tama koneani, te we aga te Batseba bidibo suali, te Eliamgo wegi, tama aga te Uriago we dao, te Hit hani bidi me deli dao. Tama Devitgo te bidi meba ma tagala palama, te we Batseba odasa asomainu yali. Te sogo te Batseba aga te poluago elali gasi te silibaso, tama aga te wiegi yai ma pedalubo kolesaga wali pai. Tialima aga te Devitba aselama, tama Devitgo te we aga dali pagela piai. Tama nosali Batseba te aga beba ma pai. Tama bidama gana nosali, Batseba aga haliga ebo si koneama, tama aga Devitba po ola tolali.

Devitgo te tama sę ebo konebaso, tama agai po me deli Joapba ola toliyu, te tiwai po wai, “Eno homugo nago Hit hani bidi, Uria, te enaba tagala palomainu homu ebao,” wali. Tama Joapgo Uria te Devitba tagala palali. Uria te aselama, te Devit pageba sabalubo si, tama Devitgo te tama po agaba hanalu wali, “Joap te aga ami bidi dabe dali bugagia bidibawe, ma meniwe? Tama te boi hwįbo mena tama tebawe? Da te ugwaba dia holabo homu ebowe, ma meniwe?” Tama Uriago te sę ebo po dabe te agaba pusali. Devitgo Uriabolo tama po wai, “Wiegi yai mu dao. Eno odalio. Megi nage te naga beba pelama, tama wę payu, toma nao.” Tialima Uriago te king tagalama, buluba dia soali. Tama nosali Devitgo te bidi me deli tagala palama, te wiegi yai homu ilibo nai te Uriaba selasa pali. Tiali goli, Uria te beba me pabeo. Aga te king tonalubo bidi dabe dali piali, te kingo be sunumi pąde piai.

10 Augwaligo Devitba waliyu, te Uria aga beba me pabeo po wali. Tama tibaso, Devitgo agaba walaligi pali, “Nago te naga be bobage sogo taga pai dao. Magi baso te nage naga beba pabewe?” wali.

11 Tialima, Uriago te tama po wei ponani, “Te Israel ami dabe, me Juda ami dabe, te hwįbo pesagede te ugwa bede naga me bidalubao, tama te Dąų Wali Bomai Po Muani Halobage te augwali dali munalubao. Tama Joap, te eno genuai bidi, te bidibo pesagede te ofisa dabe dali bididubao. Te ena naga te ena beba pelama, tama te nai sela tuyu, te wę tuyu, tama te ena we dali pagela piyu ebo, te eno homugo te dwai da homu ebao. Eno mu po tama obao, eno te tama kolesaga me egobeo. Ma eno te tiwai eyu da, teda Genuai Bidi Godigo ena ela mumainao,” te po wali.

12 Tama tialima, Devitgo te tama po wali, “Te usu dao, megi nage ede bidao, tama do te nage eno ma tagala palaibao.” Tialima, Uria te Jerusalemde bidalio. Tama do te be pio ebadi, 13 Devitgo te Uria i olama, te aga dali te nai me wę tuagasomainu elama, tama agai te Uria gęǫ page ilali. Tiali goli, te sogo hulide me Uria te aga bede me pibeo. Menio, te aga ugwade digi banuama, tama te king tonalubo bagego be habude pialio.

14 Tama kigamu digi Devitgo te pas me deli Joapba asęnama, tama Uriaba menama, tama aga te hwįbo pesageba ma tagala palalio. Tama Devitgo agabolo waliyu, te pas Joapba mao wai. 15 Devitgo te paside asęani po te tiwai po wali, “Te Uria dali, te polalubo ofisa hani dali, te hwįbo bomo ebo madiba muao,” po wali. “Tama dage tigidali te tudiba ma kilasa peyu, tama te boi bidi dabego te Uria ela mumainu yao,” po walio.

16 Joap dali, te ami bidi dabe, augwa te Raba taun hanu sainu hwįbo sę idubadi geai. Tama Joapgo te pas sali sogo, teda agai te Uria te Amon dabego hwįbo sę bomo mu ebo madiba muanio. 17 Tama te Amon dabe ami bidi te taun hanu buluba dia solama, tama te Joapgo ami dabe dali hwįani. Tama te hwįanide, te Devitgo ofisa bidi meba isali. Uria aga te ofisa dabe dali isali bidi me deli te aga dao. 18 Tama nosali, Joapgo te boi hwįani digi te sę yali po te Devitba po ola tolali. 19 Tama Joapgo te hwįani po sela soainogo ebo bidiba te tama po walali, “Nago te hwįyu suali sę po tigidali te kingba wagi pao,” wai. 20 “Tama eno homugo te kingo te tiwai wado po waiba homu yali, ‘Magi baso dage te taun hanu bagulali obo pąba hwįgi pai dawe?’ te po waibao. ‘Dagego koneanio, te boi bidi dabe te bagulali masigi obo daide bidiyu, tama augwaligo dage enabo usu elalubo dao. 21 Te polobadu te Abimelekde yali sę te dagego homude gegeda pai elaluai dawe? Abimelek, te Gideongo ogwa, te taun hanu Tebes obo bagulali pąde dolalubadi, tama we me deli te masigi obo daide dolalu, tama genuai masigi aba sąnama, tama aga ela muani. Tama tialima, magi baso dage te bagulali obo pąba pai dawe?’ Te kingo tama po nageba obaso da, teda nago agaba te tama po wao, ‘Nago sę bidi, Uria te Hit bidi, te ofisa dabe dali isali bidi me deli dao,’ tama po wao,” Joapgo te po wai. b 

22 Tama tialima, te Devitba po sela pabo bidi te pelama, tama agaba te po pusigi pai dao. 23 Agai te tama wai, “Te boi bidi dabego hwįbo bomo mu ebaso, tama augwa te taun hanu tomode bidali te buluba dįą solama, tama da dali te pepeli deliba aselama, hwįani. Tiali goli, dago te hwįbo bomo mu ebaso, tama augwali ma pogosa pelama, te taun hanu tomoba pabo sunumi pąba dąį igi palio. 24 Tiali goli, te Amon ami bidi dabe meba te bagulali obo daide bidiyu, tama augwa te enesigigo enama, tama nago ofisa bidi meba dolama, tama isalio. Nago sę bidi Uria te Hit bidi, aga te ofisa dabe dali isali bidi me deli dao,” te po wali.

25 Devitgo te po agabolo wali, “Nage ma geasa pelama, tama te po Joapbolo pusa mao, te aga bomo elama hwįmainu ebo po. ‘Joap, nage te sęde te haliga sęgę me elamuo, magi baso meni, te mena bidi aga te hwįbode isabo, te aga me konegobeo. Nago te Amon dabe dali hwįbo sę bomo elama, tama augwali aiyaba elaluama, tama te taun hanu mu dola silao,’ te Joapgo homu dąų omainogo te po agabolo pusao,” Devitgo te po wali.

26 Tama nosali, Batsebago te aga bidi isali po odobaso, tama aga homu dene ebo gela te aga bidide wai dao. 27 Te homu dene yali sogo silibo side da, teda Devitgo augwaliba te Batseba te kingo beba odasa asao po wai. Tama Devitgo aga sali, tama nosali Batsebago te Devitgo wai ogwa me deli ame nani. Tiali goli, Genuai Bidigo Devitgo te sę yalide te aga homu godolo eyu, wei me ebeo.

Copyright information for `MPS