b[2 Sml 3:3]

2 Samuel 13

Amnongo dwai kolesaga te Tamarba yali

Apsalom te Devitgo ogwago abe te gasa sawi yai mu me deli bidali, aga nogi te Tamar. Tama Amnon, te Devitgo gasa ogwa mego, te Tamar godolo mu elama, tama aga pesa mu yai. Tiali goli, Tamar te bidi me deli dali me pagela pisąwai, tama augwa te habu seliyu, te bidi me deli aga pąba me pelamuo po wai. Tama tiyu, Amnongo koneani, aga te Tamar pąba pelama, tolasainu yabo usu meni yai, tama Amnon aga te Tamarde wei mu eyu, godolo mu elama, te aga gasi sai.

Tiali goli, Amnon aga abagi me deli elaluali, aga nogi te Jonadap. Aga te Samago ogwa, te Devit aga ama, tama aga te gasagi yai tedali te haniani sunumi gegelama konea pabo homu kolesaga elaluali. Tialima, Jonadapgo Amnonbolo te tama po wali, “Te kingo ogwao, magi yaliwe? Tigidali sogo eno nage te wiegi yai homu pemene eyu bidibo me subeo. Magi baso nage haliga sęgę elalubawe?” wali.

Tama Amnongo te tama po agaba wei ponani, “Eno homu pesa mu te Tamarde ebao, te Apsalomgo abe, te eno amago abe dao,” wali.

Tialima, Jonadapgo Amnonba te tama po wali, “Nage te gasi ebo tiwai elama, te naga betba pila mugi pao. Tama naga ayago nage suagasobo sogo da, teda nago te tama tiwai po agabolo walao, ‘Eno homugo te nago eno abe Tamar te enaba tagala palama, te eno gesabidiba te nai ulagasomainu yao. Tama aga te nai ulali silibo si, te aga digi enaba magasomainu yaibao.’ Nago te king tibo po ola mayu, te tama po obaso da, teda agai te Tamar nageba tagala palaibao.” Jonadapgo te po wali. Tama Amnongo te Jonadapgo po wali pai. Aga te tibo gasi elama, tama te aga betba pila mugi pali.

King Devitgo te aga ogwa, Amnon, te gasi elalubo po odobaso, tama aga te Amnongo beba pelama, aga sugi pali. Tama Amnongo agabolo te tama po wali, “Ena gasi elalubo, tama eno homugo nago eno abe Tamar te tagala palama, tama te pusu yai kek meba enaba ula magasomainu homu yali. Tama aga digi te nai enaba magasomainu yaibao,” te tama po wai.

Tamar te king Devitgo bede bidali, tama tibaso Devitgo te tama po agaba ola tolali, “Eno homugo nage te Amnongo beba pelama, te agaba nai meba ula momainu homu ebao,” wali. Tialima, Tamargo te Devitgo po odolama, tama te Amnongo beba pelama, tama te Amnon aga betde pila mudubo suai. Tama Tamargo te plaua meba selama, tama te kek dabe nigilama, tama te praipande ulubadi, tama Amnongo aga tonalu dalio. Agai ula silibo si da, tialima aga plet pouba gelama, te Amnongo tumainu yali, tiali goli Amnon aga te nai tubo hagela homu yai. Aga te tama po wai, “Tigidali bidi buluba piąo,” wali. Te bidi dabe augwa te po odolama, tama augwa te be tagalama, tama palio. 10 Megi da, Amnongo Tamarbolo te tama po wali, “Te kek dabe eno betba selasa asao, tama nago digi ena mobaso, te eno tueibao,” wali. Tialima, Tamargo te kek dabe selama, te aga sela pali. 11 Tiali goli, Tamargo te kek dabe agaba magi pabo si da, teda Amnongo aga pageabi eyu, tama po wali, “Abeo, eno homugo te nage ena dali pimainu homu ebao,” wali.

12 Tiali goli, Tamargo hagela homu ebaso, tama aga po bomo eyu, te tama po wali, “Menio, nago ena te tobage dwai kolesaga yaboba me kekegio,” wali. “Da Israelgo te tobage kolesaga me ebo menio. 13 Nago te tama tobage kolesaga eyu da, teda ena hale dwai mu elama, tama ena te we bidi dabe gedude munu ma biligobeo. Tama nage me, te gasa Israel dabego nage aiyaba elalu, tama nage mu dolaibao. Nago te kolesaga megi me elamuo. Te kingba hanaluyu bolo ebaso, te wiegi yai yaibao. Te nago ena sainu ebo homu te agai nage me paligobeo,” Tamargo te po wali. 14 Tiali goli, Amnongo te Tamargo wali po me odobeo. Amnongo bomo mu eyu, te Tamar aga kekelama, tama te dwai sę agade yalio.

15 Te Amnongo aga dali pilama da, teda megi da, agai te Tamar wei elama, godolo homu me ebeo. Polobadu agai te Tamar wei eyu, godolo mu yali, tiali goli megi da, agai te Tamar wei homu me isiąma, tama agade te haliga dwai mu elalu dalio. Tama tiyu, aga po bomo elama, Tamarba weyu, “Nage pao,” wali. “Nage ede me bidamuo,” wali.

16 Tiali goli, Tamargo agaba te tama po wei ponai, “Ama, homu deneo, nage te tobage kolesaga igio. Te nago ena megi sela sąyu da, te genuai sęgę mu elama, tama nago enaba te yali dwai sę te aiyaba elalueibao,” wali.

Tiali goli, Amnongo te Tamargo po odobo te aga hagela homu mu yai.
17 Tama tialima, aga sę bidi i olama, te tama po wali, “Te we asesa polo tama te buluba ela gudulao,” po wai. “Te eno aga ma subo te ena hagela mu ebao. Te aga ela gudulama tama sunumi paliąo,” wali. 18 Tialima, te sę bidigo Tamar sela sąyu, tama te sunumi paliali.

Te kingo wegi dabego kolesaga te tama tiwai yai. Te augwali bidigo sisąbadi, te wegi ogwa we bidibo sogo, augwa te bobobage nogo yai sawi yai ugwa me deli muyu ebo dao. Tama Tamargo te tobage bobage nogo ugwa te aga Amnonba asali sogo muani.
19 Tiali goli, Amnongo te Tamar sela sąbo si da, Tamar pelama, te sia keli aga toboluba munama, tama te ugwa pisawali, te aga homu sęgę me homu dene ebo ola mayu, te tama tiali. Tama aga nogo te aga toboluba munama, tama bomonama gela weyu tama soalio.

20 Nosali, Apsalomgo te aga abe Tamar te gela ola asobo sulama, te agabolo hanalu wali, “Magi yaliwe? Te naga abe Amnongo te dwai sę nageba yali da homu ebe da, agawe? Tagalao, te nage homu sęgę kuna me elamuo, magi baso meni, te naga abe naga dao. Tiali goli, nago te Amnongo yali kolesaga te bidi me deliba me pusulamuo,” wali. Tama Tamar te Apsalomgo beba pelama, tama aga dali bidali. Tiali goli, Tamar te homu sęgę dali me mu sesemane sogo elalu bididualio.

21 Tama Devitgo Amnongo te kolesaga yali po odoyu, agai te wado po dwai mu walio. 22 Tama Apsalomgo me te Amnon dali haliga sębę mu elama, tama aga godolo me ebeo, magi baso meni, Amnongo te dwai kolesaga agai abeba yali, Tamarba. Tama tiyu, Apsalomgo te mena sę yabo po deli me te Amnon dali po munu me ma mibeo.

Apsalomgo te Amnon ela muabo sunumi gegali

23 Te nosali kibu be si bidama da, teda te sę bidi dabego te Apsalomgo sipsip nisi togobo sę te Balhasor bulude yali. Te bulu te Efraim hanigo tǫ pedai pąde elaluali. Tama Apsalomgo te kingo ogomani tigidali i olama, augwali te buluba sisinagasomainu yali. 24 Apsalom te king Devitba pelama, tama agabolo te tama po wali, “King o, te bidi dabe augwali te eno sipsip nisi togobo sę ebaso, tama eno homugo te genuai nai daa tueinu ebao. Te nage dali, naga ofisa dabe augwali dali, dage te eno genuai nai daa tuboba asabo usu yaibawe?”

25 Tama kingo te tama po wei ponani, “Ogwao, menio. Da me pogobeo. Te da tigidali peyu da, teda nago da tonalubo sę eyu, te gesebo sę dene mu yabuo.” Tiali goli, Apsalomgo bomo eyu, te kingba hanalu wali, tama kingo bomo eyu, pabo hagela homu yai. Tama kingo te tama po wali, “Apsalom, te nage da pao.”

26 Tiali goli, Apsalomgo te po wai, “Tialima, te nage pogobe da wida, te nago gomunai ogwa Amnon pomainu ebo usu egowe?” Tama kingo agaba hanalu wali, “Magi eyu te nago aga pomainu obawe?” 27 Tiali goli, Apsalomgo te Devitba bomo elama mu hanalu obaso, tama nosali Devitgo te Amnonde usu da weyu, te aga gasa ogomani dabe me te Apsalom dali pomainu yalio.

28 Te Apsalomgo Devit taga soyu, te Balhasor buluba ma soabo sogo, agai te aga sę bidi dabeba te tama po walali, “Te nai daa tubo sogo, dagego te Amnon bugagia tonaluao. Te aga gęǫ page ebo sogo, teda eno dagebolo olama, tama dagego aga ela muiyagameo. Dage wi me elamuo, magi baso meni, ena digi eno te aga ela mua po obao. Tama dagego aga ela muyu naga yao, tama dage munu me wia selamuo.” 29 Tialima, te sę bidi dabego te Apsalomgo po wali peyu, tama te nai daa tubo sogo augwaligo te Amnon ela muai dao. Te kingo gasa ogomanigo te tama tebo sulama, tama augwali te augwa donkiba ąųą sigulama, tama wi soai dao.

30 Te augwali sunumidu aseladubadi, te bidi meba polasa pelama, tama Devitba te tama po wai, “Apsalomgo te nago ogomani tigidali ela muani, tama deli me bidibeo.” 31 Kingo te po wabo odolama, tama aga haliga dwai midigi selama, tama agai te aga ugwa pisilama, tama tǫba pigulali. Tama aga ofisa dabe me te tobage kolesaga naga yalio.

32 Tiali goli, Jonadap, te Samago ogwa, te Devitgo ama, agai Devitba te tama po walali, “King o, nago te poba homu munu me mugio. Augwaligo te nago ogwa dabe tigidali me ela mubeo. Menio. Augwaligo te Amnon deli naga elali. Te page te tama telaluali. Polobadu Amnongo te dwai kolesaga Tamarba yali, te Apsalomgo abe da, tama tiyu, Apsalomgo te dwai kolesaga wei ponabo homu elalu, sesemane sogo te homu kone palaludu genama, tama te Amnon ela muanio. Eno koneanio, Apsalomgo te homu elalubo, magi baso meni, eno aga gesabidi te be hulia si tiwai elalubo suali. 33 King, augwaligo te po da, te po wali asobo tiwai ebao. Te nago gasa ogwa tigidali te bidalubao. Amnon deli naga isai dao,” te po wali.

34 Te Jonadap Devit dali po midubadi, te hanu tonalubo ami bidi me deligo te Horonaim badu asobo sunumiba tonobadi, tama agai te bidi hauwa te bulu du badu dulubo suali. Tialima, aga te kingba pelama, te tama po wai, “Eno te bidi meba bulu dudu aiyaba dulubo suali, te Horonaim badu asobo sunumi badu asali,” wali. Tama tialima, Jonadapgo Devitba te po wali, “Te tama dao. Te nago ogwa dabe asobao, te eno nageba wali po tiwai gilama ebo,” wali. Jonadapgo po ola silibo side, teda polo tama mu, te Devitgo ogomani te tomoba asiyu, tama augwa te gela wabo gagalali. Tama Devit dali aga ofisa dabe me te gela geninama augwali dali walio.
13:34-38Talmai aga te Apsalomgo wąį aya dao. Te 2 Sml 3:3, tede te po elalubo suao.
,
b 

Apsalom wi pai

Apsalomgo te Amnon ela mubo si da, teda aga te Gesur bulu tǫ pedaiba wi pelama, tama aga te Talmai dali bidai, te Amihutgo ogwa dao. Talmai aga te Gesur bulu tǫ pedai tonalubo king bidai, tama Apsalom te Gesur tǫ pedaide bidibadi, kibu be sela bidai. Tama tigidali side Devitgo te Amnon isalide homu dene iduali.
39 Tiali goli, nosali, aga te Amnonde homu dene yai sia sabo side, tama aga te Apsalomde homu dene ebaso, te aga ma asomainu homu yai dao.

Copyright information for `MPS