2 Samuel 18

Joapgo Apsalom ela muai

King Devitgo aga ami bidi dabe sisinama, tama te 1,000 bidi hani, me te 100 bidi hani tonaluabo ofisa dabe nidigili pai. Tama agai aga ami bugulama, te genuai hani sela nigilama, tama Joapgo te hani me deli tonalu, tama Abisai, te Joapgo amago, te hani me deli tonalu, tama te Get bulu bidi Itaigo te hani me deli tonalu yali. Tama Devitgo aga hani ami bidi dabeba te tama wai, “Te ena digi ena me te hwįboba dage dali paibao,” wali.

Tiali goli, augwaligo te tama po agabolo wai, “Menio. Nage da dali me pogobeo. Te boi hwįbode da tigidali wi sobaso da, teda augwaligo dade te homu kone me egobeo. Te augwaligo da hani me badu togwa selama, elibaso da, tede me te augwaligo homu kone me egobeo. Tiali goli, nage da dali pai madi, tama augwaligo nage elibaso da, teda augwaligo te da hani 10,000 bidi elimainu ebo tiwai yaibao. Tama tiyu, dago homugo nage te taunde bidibaso, te wiegi yai yaiba homu ebao. Tama da te bidi, me hwįbo doado bage, sǫą pobaso da, teda nago da tau selama, tolomainu yaibao,” wali.

Tama kingo po wei ponoyu, te tama wai, “Te usu dao, eno te dagego homu wali pabo homu elalubao.” Tama Devit te taun bagulali genuai obo pąde dolalu, tama agai te ami hani dabe te nogo sągą sąyu, te mas ela peyu, te buluba soabo suai. Te ami bidi dabe te 1,000 bidi hanidu, me 100 bidi hanidu wasiasa soalio. Tama Devitgo te Joapba, me Abisaiba, me Itaibolo te tama bomai po mawai, “Dagego ena homu kone palama, tama dagego te gesi ogwa bidi Apsalomba te wiegi yai homu elama, olo tau sabo homu te bidiba yao,” te po wai. Tama Devitgo te ofisa bidi selabolo wabo po te ami bidi dabego me odali.

Te Devitgo ami bidi dabe pelama, te Israel dabe daliba gesabidi deliba ununani, te augwali Apsalomgo ami bidi dabeba te augwali deliba gesabidi ununanio. Tama augwaligo augwali dali te Efraimgo busi bulude hwįanio. Augwali hwį hwį pelama, tama te Devitgo ami bidi dabego te Israel dabe aiyaba elaluama, tama augwali mu dolali. Te hwįbo genuai pelama, tama augwa te bulu tǫ pedai tigidali badu hwį hwį pela walio. Tama bidi hauwa te bulu tomode esela pelama, tama augwali isila pai. Tama tialima, te buside isali bidi dabego nambago te hwįbode isali bidi dabego namba te aiyaba elalualio. Te hwįani sogo tomode isali ami bidi dabego namba te umabo bidi sese, te 20,000 bidi tama isai dao.

Te Apsalom te donkide dualasa peyu, tama donki te genuai ni kali te ni me elalubo dologodu pobadi, tama Apsalomgo bobage tobolu nisi te ni nologo tomode habela selama, dąų wali. Tama te donki udayu, tama Apsalom tede walaluai. Apsalomgo te Devitgo ami bidi meba te agaba gesabidi unulubaso, te sogo aga wi pobadi, te tama sę agaba pedelai dao. 10 Tama te ami bidi dabe augwali me deligo te Apsalom sulama, tama agai te tama po Joapba waligi pali, “Megi da, eno Apsalom te ni me deli te ni kali nologode walalubo sualio,” po wai.

11 Tama Joapgo te tama po agabolo wali, “Mu tama, nago aga sualiwe? Tialima, magi baso nago te aga polo ela muai meniwe? Te nago aga ela mugi sogo da, teda eno nagebolo te mone 100 kina me, te kukulu me deli me, te nageba magi dao,” wali.

12 Tiali goli, te bidigo Joapbolo te tama po wai, “Tagalao, nago enaba te mone silvago te 10,000 kina mobaso da, teda eno magi sę me deli te kingo ogwa dali me egobeo,” wali. “Magi baso meni, da tigidaligo te kingo po nageba me, Abisai me, Itaiba me, te tama po mabo odai, ‘Dagego ena homu kone palama, tama te gesi ogwa bidi Apsalomba olo tau sabo wiegi yai kolesaga yao,’ po wai dao. 13 Tama eno kingo te po wali sela sąyu, tama Apsalom ela mubaso da, teda kingo eno te sę yali po odaibao. Magi baso meni, kingo te tigidali sę pedelali po odobo dao. Tama kingo ena po tų ela mobaso da, eno koneani, te nago ena tau me sogobeo,” wali.

14 Tama Joapgo te tama po wei ponai, “Te tagalao, ena nage dali po mibo hagela ebao,” wali. Tialima, Joapgo te sesemone ene sela selama, tama te Apsalom walalubo ni elalubo madiba palio. Te Apsalom isisąbadi, tama Joapgo aga te enego enani, tama te enego aga homu hobolu dude dolalio. 15 Tama nosali, te Joap agai ene sela bilibo ami bidi nogo si bidi, augwali te Apsalom pąba udada aselama, tama aga ela muai.

16 Apsalom isaide, teda Joapgo te ami bidi me delibolo te biugel bu wao po olama, te Devitgo ami bidi augwa te hwįbo tagalumainu yai. Tialima, Devitgo hanigo odolama, tama augwa te Israel dabe taga soyu, ma geasa asali. 17 Tama augwa te Apsalomgo tigi selama, tama te buside genuai tǫ dedage me deliba aiyaba sąwani. Tama augwa te masigi hauwa selama, tama aga tigi daiba ugwadu te masigi sąnama, tama augwa te masigi pesage holali te genuai pedelai. Tama te Israel dabe wi pelayu, te augwa bulu deli deliba ma tedela palio.

18 Polobadu, te Apsalom bidibo ula elalu bidali sogo, agai te bobage masigi genuai me deli selama, tama te Kingo Odogo Bulude dodolali, te aga nogi sa mubo tiwai ilali. Tama agai te tama wai, “Te ena bidali pesage hasegelama bidabo wai meni baso, tama te Israel dabego ena homu kone palabo ogwa meni yani,” homu elama, te tama kolesaga yai. Tama tialima, Apsalom aga nogi digi te masigiba mawai elaluai. Tama megi me te we bidi dabego te masigi nogi weyu, te tama po obao, “Te Apsalomgo masigi da,” wabo dao.
18:18Te megi e elalubo po, te da e bidalubo bidi dabede po olama me wabeo. Menio. Agai te wali po te e buku asęani sogo bidali bidi dabede te tama po olama, walio.


Augwaligo Devitba te Apsalom isali po walali

19 Te Apsalom isai madi nosali, Ahimas, te Sadokgo ogwago, te Joapbolo te tama po wai, “Te nago ena te kingba udulama pomainu elama, tama te wiegi yai po agaba magi pomainu eyu, te Genuai Bidigo aga boi bidi dabego bomo te togwa sąwani po wagi pomainu yabo, te usu da po waibawe?” te po wali.

20 Tiali goli, Joapgo agaba te tama po wai, “Menio, megi nago te kingba wiegi yai po me sela pomainu me egobeo. Te me sogo gasa sogo nosali nage pomainu ebo homu usu yaibao. Tiali goli, megi da, menio, magi baso meni, te aga ogwa isai dao,” wali. 21 Tama Sudan bulu bidi me deli bidali, tama aga te kingo sę bidi da. Tama Joapgo agaba te tama po wai, “Nage udada pelama, nago te suali sę dabe po te kingba waligi pao,” po wai. Tialima, te sę bidigo Joapba te mage basigulama, tama nosali te aga udada palio.

22 Tiali goli, Ahimasgo Joapba po bomo elama, te tama po wai, “Te enaba magi sę pedalubaso, me te tagalao, eno homugo nago ena te Sudan bidi pali wali peyu, tama ena me te kingba paio,” wali.

Tama Joapgo agaba te tama wai, “Gesi ogwa bidi, magi baso nage painogowe? Te nago mena wiegi yai nai me sogobeo.”

23 Tiali goli Ahimasgo po ma wali, “Te enade magi sę pedalubaso, teda tagalao, ena paio,” wai.

Tama Joapgo te tama po wali, “Usu da, nage pao,” wali. Tama Ahimas te Jordan malu tǫ dolo elalubo badu te udada pelama, tama te Sudan bidi asobo badu te aga polasa saboligi pai dao.

24 Te sogo Devit te hanu obo bagulali genuai obo pąde dugulaludali. Tialima, te hanuba asobo bage tonalubo bidi pelama, te bagulali obo sunumi pąde ugwadu daiba dolagasali. Agai digibulu tonono pobadi, tama te bidi deli naga udada asobo suai. 25 Tama te tonalubo bidigo te kingba i weyu, te tama po wai, “Te bidi me deli udada asobao,” wali.

Tama kingo te tama po wai, “Te bidi me deli naga asobaso da, teda agai te wiegi yai po sela asiyu tebao.” Tama te tonalubo bidigo te bidi te hanu pąba udada asobo suai.

26 Tama nosali te tonalubo bidigo te gasa bidi me udada asobo sulama, tama agai te sunumi tonalubo bidiba i weyu, tama agaba te tama po wai, “Suao, te gasa bidi me udada asobao,” wali.

Tama kingo te tama po wai, “Te bidigo me te wiegi yai po sela asiyu ebadi bogo dao.”

27 Tama te tonalubo bidigo te tama po ma weyu te po wai, “Eno te polasa udada asobo bidi te Ahimas, te Sadokgo ogwa, subo tiwai ebao,” wali.

Tama kingo te tama po wai, “Ahimas te wiegi yai bidi, tama agai te wiegi yai po sela asoba homu ebao.”

28 Tialima, Ahimas te pąba asiyu, tama aga te kingba i weyu, te tama po wai, “Da te bugagia bidibao.” Tama aga te kingba sabolama, tama te tobolu tǫba basigulama, tama aga te po wai, “King, nage eno genuai bidi da, dago te dena Genuai Bidi God nogi ugwaba sinao. Te augwaligo nage dali hwįnama, te nage sela sąwainu yali, tiali goli Genuai Bidigo augwali te dago nogoba munama, tama dago augwali aiyaba elalualio,” wali.

29 Tama kingo Ahimasbolo te tama po hanalu wai, “Te eno ogwa, Apsalom, aga me te bugagia bidibawe, ma meniwe?”

Tialima, Ahimasgo agabolo te tama po wai, “King, eno te bidi hauwa sisinama, tama genuai po dagą weyu ebadi, te eno sulama tama te Joapgo ena te nago sę bidi dali tagala palali. Tiali goli te augwaligo mena sę ebo te eno me konebeo,” wali.

30 Tialima, kingo te tama po agabolo wali, “Nage u badu dolalugi pao.” Tama Ahimasgo te king taga soyu, u badu dolalugi soali.

31 Tialima, polo tama te Sudan bidi te sabolagaselama, tama kingba te tama po wai, “King, nage eno genuai bidi da, eno nageba maiabo wiegi yai po sela asali elalubao. Te nage dali hwįnama te nage sela sąwainu yali bidi dabe da, tiali goli te sogode megi te Genuai Bidigo nage tau selama, tama augwaligo magi dwai sę nage dali ma egobeo,” te po wai.

32 Kingo odolama, tama te po wai, “Te eno ogwa, Apsalom, aga te bugagia bidibawe, ma meniwe?” Tama te Sudan bidigo po wei ponoyu, te tama po wai, “King o, eno homugo te tobage sę te gesi ogwa bidiba me pedalumainu homu eyu, te nago boi bidi tigidaliba me, te nage dali hwįainu eyu, te nageba dwai sę yainu ebo bage dabeba me, pedalumainu homu ebo dao,” wali.

33 Kingo te po odolama, tama aga haliga dwai mu elama, tama aga hogodasa peyu, te obo bagulali sunumi te elalubo pąde daiba te be habu tomoba pelama, tama aga gela udali. Tama aga ugwaba holiyu, te tama tiwai i wali, “Te eno ogwa, Apsalom o. Eno ogwao, eno ogwa, Apsalom. Te eno nage hasegeliyu, te ena isigi sogo da, te wiegi yai mu igi dao. O Apsalom, eno wai o, eno wai o!”

Copyright information for `MPS