a[Hab 3:19]
b[Ro 15:9]

2 Samuel 22

Devit te Godigo aga tau sobaso, te wiegi yai homu pemene yai

(Tib 18)

Te Genuai Bidigo Devit te Solgo nogode, me te tigidali gasa boi bidi dabego nogode, te ma dobola sobaso, tialima Devitgo te balia gagalama weyu, te Genuai Bidiba balia wali. Te baliade te tama po wali,

“Genuai Bidi te eno bomai obo dao.
Aga te ena geme sesalubo masigi tiwai,
tama agai ena te boi bidi dabego
nogode ma sai dao.
God te genuai masigi tiwai, te ena agaba pelama,
te boi bidi dabede geme duala
sigi pabo masigi tiwai elalubao.
Genuai Bidi te eno sabele tiwai elalu,
tama ena te boi bidi dabede
geme dualalubo tiwai ebao.
Agai te ena ma dobola selama,
tama ena tonalubo bomo elalubao.
Aga te bomai obo, tama ena dualalubo pesage da.
Genuai Bidi, nago ena tau mabo bidi,
tama ena dolainu ebo sogo tama
nago ena ma dobola sabo dao.
Eno Genuai Bidiba gedu haluasa
po obaso, tama agai ena tau sali.
Tama te boi bidi dabego ena dolainu yali usu ebeo.
Dago te Genuai Bidigo nogi ugwaba sao!”

“Te isabogo te ena pąde gegali,
te wę si genuai pedaliyu, tama ena haluainu yai.
Te isabogo ena pąde tola selama,
tama ena te gų pageba painu yali.
Te umben wago ena tola selama,
tama ena te wi pabo usu isiąbo tiwai yalio.
Ena haliga sęgę dwai mu ebaso,
tama ena gela weyu, Genuai Bidiba i wali.
Eno ena Godiba i weyu, te agai ena tau somainu yai.
Aga te aga bede bidiyu,
tama agai eno gela wabo odali.
Tama agai eno gedu haluasa po waboba olo muai.”

“Tialima, Genuai Bidigo te eno
boi bidi dabeba wado yali.
Tama tiyu, agai te tǫ mali dwai mu ilibaso,
tama te bulu du dabe me dagalu
te aiyǫge page mu yalio.
Te Genuai Bidigo gunide hano pedelali.
Tama aga pedauwalide sia pedelama,
tama nai hauwa ulali.
Tama agai te sia dage eneyu, tedela palali.
10 Agai te dagalu dalama, aiyaba dulai.
Tama husugu yai pǫ te aga sągą dologode elalubao.
11 Te mobo bidi ensel me deligo aga tolama,
tama bola asobo tiwai yaibao.
Tama te Genuai Bidi te walide bidiyu,
tama bomonama, asesa asobo
tiwai gilama ebo dao.
12 Agai te be hulia sabo
te aga ugwa be tiwai pedalumainu ilali,
tama te tulubagego husugu haowago
aga mesegelali.
13 Tiali goli, agai te bulu ula tigidali ilali,
tama te sia dage te uladu te buluba teda soali.
14 Genuai Bidi ugwadu bidiyu,
tama genuai po dagą mu weyu,
te pǫ kulukulu wabo tiwai yali.
Te Ugwadu Mu Bidibo Godigo te aga po pusali.
15 Agai te pǫgo ula be sele te aga ene tiwai pedelali,
tama agai te boi bidi dabe enebaso,
tama augwa wi tedela pai dao.
16 Genuai Bidigo te boi bidi dabeba wado po olama,
tama aga haliga sębę te bomai waligo
augwali sela sąbo tiwai yali.
Tama aga haliga sębęgo te tamu ąį
te tigidali sula sąbo tiwai eyu,
tama te tǫ dąų walali nai dabe te hanilama pedelalio.”

17 “Genuai Bidi te ugwadu bidiyu,
tama te nogo aiyaba munama,
tama ena ma dobola sali.
Te genuai sigo ena mesegelali,
tiali goli agai ena ugwaba kekasa holali.
18 Te eno boi bidi dabe augwaligo bomo mu ebaso,
tama eno augwali aiyaba elaluainu
ebo usu meni yai.
Tiali goli, Genuai Bidigo ena te augwali
nogode ma dobola sali.
19 Te enade sęgę elalubo sogo
augwaligo enaba hwįagasali.
Tiali goli, Genuai Bidigo ena tonaluali.
20 Agai ena tau sobaso, tama ena bugagia bidai.
Agai ena godolo mu ebaso, tama agai ena ma sai dao.”

21 “Eno te doloba pai kolesaga wali pobaso,
tama tiyu, Genuai Bidigo
te wiegi yai nai hauwa enaba mawai.
Eno te dwai sę me deli isiąbaso,
tama Godigo ena wiegi yai bugagia ilai dao.
22 Eno te Genuai Bidigo bomai po bugagia wali pali.
Eno te ena God tudiba munama,
tama dwai kolesaga me ebeo.
23 Eno te agai bomai po wali peyu,
tama eno agai po te tudiba me mubeo.
24 Eno dwai sę yali me deli elalubeo.
Eno te ena bilibo te bugagia tonaluali,
tiyu eno dwai sę me deli idali weyu tama tiali.
25 Tama tiyu, Genuai Bidigo eno doloba pai kolesaga
te homu kone palama, tama agai wiegi yai kolesaga
enaba wei ponani,
magi baso meni, ena te aga gedude
magi dwai sę isąyu, te wiegi yai mu bidali.”

26 “Genuai Bidi, te bidi mego nage me tagalisiąbaso da,
teda nago aga me tagalugobeo.
Te bidigo doloba pai kolesaga eyu,
tama dwai sę me elalusiąbaso da,
teda nago agaba te doloba pai
kolesaga naga wei ponobo dao.
27 Te bidi me deligo te wiegi yai
kolesaga wali peyu da,
teda nago agaba te nago wiegi yai
kolesaga ola mobao.
Tiali goli, bidigo te dwai kolesaga wali pobaso da,
teda nago agaba dwai kolesaga wei ponaibao.
28 Nago te augwa digi augwa aiyaba
elalubo we bidi ma sabo da.
Tiali goli, nago te hagoma ebo
we bidi dabe aiyaba elalubo dao.”

29 “Genuai Bidi, nago digi naga te enade ula da,
tama nago enade te be hulia sai
elalubo te sela sąbo dao.
30 God, te nago ena tau sobaso da,
teda eno te genuai boi bidi hani
te aiyaba elalubaso, te usu yaibao.
Tama nago ena dąų walobaso da,
eno te hanu genuai obo bolobaso, te usu yaibao.
31 Te Godigo kolesaga wiegi yai mu
elama, tama tigidali dolo mu elalubao.
Tama agai po te mu po naga wabo da.
Genuai Bidi te hwįbo sabele tiwai elama,
tama agai te agaba pabo bidi tigidali bugagia tonalu,
tama augwali te boi bidi dabede
geme wi dualalubo dao.”

32 “Genuai Bidi naga te God mu da.
Agaduba deligo naga da,
te genuai masigigo bagualubo tiwai elalubao.
33 God aga te ena geme duala sabo
bomai pesage elalubo.
Agai ena bilabo sunumi te wiegi yai nigali.
34 Agai ena bugagia bilimainu ilali,
te bulu uni hasa te bulu du bagede
bilibo tiwai eyu, tama ena tulaluabo
te usu me egobeo. a 
35 Agai ena te hwįbo ola mani,
tama eno nogo bomo ilali.
Tama eno augwaligo te brasgo nigali
enesigi te balibi kegeyu, enebo usu yaibao.
36 Genuai Bidi, nago ena te boi bidi dabego nogode
ma dobola sali.
Nago enabolo te naga sabele mobaso,
tama ena tede geme duala sai.
Nago ena tau sobaso, tama eno genuai nogi
te we bidi dabe gedude elaluali.
37 Nago enaba wiegi yai sunumi mobaso,
tama eno sągą te bedege me ebeo.
Ena pobadi, te ena me tula mubeo.”

38 “Eno te boi bidi dabe
pobeasa pelama, tama augwali dolali.
Eno augwali dwai dene mu menama, dolama,
tama eno augwali tigidali silalio.
39 Eno augwali tigidali enama, tama augwali tulaluali.
Augwali te eno sągą pąde pila muani,
tama augwali ma hodalubeo.
40 Nago te hwįbo bomo enaba mani.
Tama nago te boi bidi dabe eno nogoba mawai,
tama eno augwali aiyaba elaluai.
41 Nago te boi bidi dabe enade wi pomainu ilali,
tama eno te ena godolo isiąbo
bidi dabe te eno augwali ela silalio.
42 Augwaligo te augwali tau sabo bidi meba gegali,
tiali goli bidi me bidibeo.
Tama augwaligo Genuai Bidi nageba gela wali,
tiali goli te nago augwaligo gedu
haluasa po wali te me odobeo.
43 Eno te augwali mu dolama,
tama augwali te tǫ hogomu tiwai pedelali.
Eno augwali agalama,
tama augwali aiyaba elaluali,
te ena pu elalubo nagame yai tǫ
elalubo sunumidu pabo tiwai yali.”

44 “Te ena we bidi dabego enaba
boi bidi ebo sogo, nago ena tau sobaso,
tama augwaligo ena me dolobeo.
Tama nago ena te gasa we bidi
tonalubo bidi me bidimainu ilali.
Te eno augwali konesiąwani we bidi,
megi augwali te ena dologode bidibao.
45 Te gasa bulu tǫ pedai we bidi
dabego enade wi elama,
tama enaba kidu sugunagasali.
Augwaligo eno genuai nogide po odama,
tama polo tama augwali ena dologoba pali.
46 Augwa bomo haga wali,
tama augwa bomai hanu tagalama,
tama augwali didibili dali enaba asai.”

47 “Genuai Bidi sesemane sogo bidibao!
Aga te genuai masigigo ena bobegelalubo tiwai yali,
tama dago aga nogi ugwaba sao.
Godigo ena tau siyu, tama ena ma sali,
tama dago aga genuai nogi ugwaba sao.
48 Godigo te eno boi bidi dabego
dwai kolesaga wei ponani.
Tama agai te gasa hani bage te ena dologoba muani.
49 Tama agai ena te boi bidi dabego
nogode ma dobola sai.
Genuai Bidi, nago enaba
te we bidi dabego gedude genuai nogi manio.
Nago ena tau sobaso, tama te hwįbo
bidi dabego ena me ela mubeo.
50 Tama tibaso, te gasa we bidi hani
tomode te eno nago nogi ugwaba saibao.
Tama eno nago nogi ugwaba sabo balia obao.” b 

51 “Genuai Bidigo ena Devit te king
pedalumainu nigilali.
Tama sesemane sogo eno te boi
bidi dabe aiyaba mu elalumainu ilali.
Sesemane sogo agai ena godolo mu eyu,
tama agai eno hani nosali pedalubo bage me
te godolo homu yaibao.”
Copyright information for `MPS