a[2 Sml 9:3]
b[2 Sml 1:1-16]

2 Samuel 4

Bidi sigo te Isboset ela muai

Te Solgo ogwa Isbosetgo te tama po odali, augwaligo te Apner te Hebronde ela muani po odali, aga te wi dwai mu elama, tama te tigidali Israel dabe dwai noma mu sai. Te Isbosetgo ofisa bidi sigo te boi bidi dabe dali hwįgi pabode tonalubo bidi si bidali. Augwa si nogi Bana me Rekap, tama augwali si te Rimongo ogwa si. Rimon te Berot taun bidi me deli da. Te bidi si te Benjamingo hani, magi baso meni, te bidi dabe augwa te Berot taun te Benjamin hanigo taun me deli tiwai nigilai. Te Berot taun bulu bidi hani bage mu te wi pelama, tama megi da augwali te bulu Gitaimde bidiba, te augwa page bulu me menio wai.

Jonatan, te Solgo ogwago, te ogwa me deli elaluali, aga nogi te Mefiboset. Te Sol me Jonatan isali sogo, te Jesril dabego te Jonatango hani sibiba po ola tolali. Te sogo te Mefibosetgo kibu be a naga elaluali. Augwa te po odobo si da, teda te Mefiboset tonaluali wego te Mefiboset ąųwą selama, wi pali. Tiali goli, aga asesa polo mu udawali digi, tama Mefiboset tulaluama, tama dolama, te sągą dwai pedelali. a 

Me sogo deli sogode, te ama nami si te Rekap me Bana te Isbosetgo beba pelama, te augwali si giliga tomo yagasobode te agai beba sabolali. Te sogode te Isboset te toma neyu, te aga be habu badu pila mudai. Tama augwali si te wit sainu ebo tiwai gilama eyu, te be tomoba pali. Tiali goli, augwali si te Isbosetgo be habu tomoba pelama, tama aga te bet saide pila mubo suai. Tama augwali sigo aga haligade te hwą gego enama, tama aga ela muani. Tialima, augwali sigo aga mage togolama, tama aga tobolu te augwali si susiąwani bidi dabeba sela pali. Augwali si te hulide te Jordan wę odogo maludu pelama, tama te do da augwali te Hebronba sabolali. Tama augwali sigo te Isboset tobolu sela peyu, te king Devitba tama agabolo waseligi pai. Tama augwali sigo te tama po kingbolo wali, “King o, suao! Te e da Isbosetgo tobolu da, te naga boi bidi, Solgo ogwa da. Polobadu te Solgo nage elainu usu sesa bilali, tama tialima, te Genuai Bidigo nage tau siyu, te Sol dali, te aga hani ogomani dabe daligo te dwai sę yali kolesaga wei ponani da,” te po wai.

Tiali goli, Devitgo augwali siba te tiwai po wei ponani, “Te Sesemane Sogo Bidibo Genuai Bidigo aga ena te dolabo te tobage sę dabe ma dobola sali. Tama aga nogide, eno dagebolo te tiwai mu po obao. 10 Te ena Siklakde bidali sogo, te bidi me deli ena bidiboba sabolama, tama te Sol isali po wagasali. Tama agai homugo te eno agai pode wiegi yai homu pemene yaibao homu yali. Tiali goli, menio. Eno te ami bidi dabebolo olama, te augwaligo te bidi aga pageabi elama, tama aga ela muani. Te tiwai yali te agai te po sela asalide te agabolo te eno mone mabo te tiwai yai dao. b  11 Tama megi dage sigo te bidi me deli te aga bede pila munubadi, te odolali mu ela muanio. Dage si te dwai bidi si mu. Tama dage sigo homugo te dage si eno gogolama, bidaiba homu eyu, yali da, agawe? Mu menio. Te eno dage sigo dwai kolesaga yali sę wei ponoyu, tama eno dage sigo bidabo ula me mu sia somainu yaibao,” Devitgo te po wali.

12 Tialima, Devitgo te aga ami bidi dabeba te usu da po weyu, te Rekap de Bana si ela muao po wai. Tama te ami bidi dabego augwali si ela munama, te togolama, peselama, tama augwa nogo sągą gugudama, tama augwa tigi te Hebron pąde elaluali sigi ąį pąde walali. Tiali goli, te ami bidi dabego te Isbosetgo tobolu selama, tama te Apner pubulali gų page te Hebron bulude pubulai dao.

Copyright information for `MPS