a[Sai 25:22]
b[1 Sml 7:1-2]
d[1 Sto 26:4-5]
e[1 Sto 16:43]

2 Samuel 6

Augwa te Dąų Wali Bomai Po Muani Halobage te Jerusalemba sesai

(1 Sto 13:1-14; 15:25-16:6, 43)

Devitgo te hwįbo bugagia mu koneani bidi dabe ma sisinani. Te Israel ami dabego namba te umabo mu, 30,000 usu nama elaluai. Tama Devitgo augwali te Juda tǫde elalubo taun Balaba sela pelama, te Godigo Dąų Wali Bomai Po Muani Halobage sigi painu yali. Te halobage augwa nogi eyu, Te Tigidali Bomo Elalubo Genuai Bidigo Halobage da wali. Te halobagede te ensel bidi noma si te ugadu daide elaluali, tama te king bidigo Genuai Bidigo duabo sia tiwai dao. a  Tialima, te Devit aga ami dabe dali te Bala taunba sabolama, tama augwali te Abinadapgo dwasianu bulu dude elalubo beba pai. Tama augwa te halobage selama, tama te gesi karis me deliba munama, te augwali dali sela painu yali. Usa me Ahio, te Abinadapgo ogwa sigo, te augwali pabo sogo te karis nogogo dodolubo sę ela piduai. b  Ahio te karis asobodu te polasa pali. Tama Devit dali, te tigidali Israel dali, te karis dali peyu, tama augwa te tęąbi po me weyu, te musik wabo sę me yali, te Genuai Bidigo nogi ugwaba siyu tialio. Augwa te ni wuligo nigai habidi, me gita eliyu, tama te haniani musik wabo sę dali yalio.

Tialima, augwali te bidi me deligo tǫ pedaiba sabolali, te bidi Nakon, te augwa te nai wit selama, tama te bo sela sąbo pesageba sabolali. Tama tede te karis kegebo bulmakau dabego te Godigo halobage te hogobeasa dulainu yai. Tama tibaso, Usago nogo mugi pelama, tama te halobage tola sali. Tama Genuai Bidigo te Usa dali wado eyu, sębę mu yali, magi baso meni, Usago homugo te halobage olo nai da homu eyu, tama agai nogogo tuali. Tama Godigo aga elalima, tama aga te Godigo halobage dolo pąde isalio.

Devitgo te Genuai Bidigo Usade ebo te sę sulama, tama Devitgo sębę homu eyu, wado yali. Tama augwa te pesage nogi eyu, Godigo Te Usa Dene Mani Pesage da wali. Tama megi me te bulu bage bidigo te tiwai nogi udubo dao.
6:8Te megi e wabo po te da megi bidibo bidide po weyu me wabeo. Menio. Agai te wali po te e buku asęani bidi bidali sogode wali po te wali dao.


Tama megi da, Devitgo te tama po wali, “Magi elama tama, te Genuai Bidigo Dąų Wali Bomai Po Muani Halobage ena dali pelama, bidigi pogowe?” wali. 10 Tama tibaso, Devitgo te halobage te Devitgo taunba sela pabo hagela homu yali, te Jerusalem, tama aga te Jerusalemba pabo sunumi tagalama, tama te halobage te Get taun bidi me deli, te Obetidomgo beba sela pali. 11 Tama halobage te Obetidomgo bede munalubadi, te polua sela bidai. Tama te sogo Genuai Bidigo te Obetidom dali te aga hani sibi tigidali te wiegi yai bugagia ilali. d 

12 Tama nosali, king Devitgo te tama po odali, Genuai Bidigo te Obetidom dali te aga hani sibi me tigidali doado bage te wiegi yai bugagia ilibo po wali, magi baso meni, te halobage augwali dali munaluai. Tama tialima, Devit te Obetidomgo beba pelama, te Godigo halobage te Jerusalemba selasa asainu yai. Tama te we bidi dabe augwa homu wiegi yai pemene mu yai. 13 Tialima, te bidi dabego te halobage tolama, soabo gagalali. Augwaligo soabo gagalama, dwasianu gana pelama, tama augwali doligi pelama, tama Devitgo te Genuai Bidiba ofa yali. Agai te bulmakau omai me deli dali, te nisali sabi omai bulmakau me deli dali, ofa yalio. Te ofa ebo silama, tama augwali ma pabo gagalalio. 14 Devitgo te prisgo bebo ugwa me deli gudali, te augwa sawi yai name ugwago nigai. Tama aga tęąbi eyu, tama sasa mano pali, te Genuai Bidigo nogi ugwaba siyu tiai dao. 15 Tama te tama kolesaga yaligo te Devit dali te tigidali Israelgo te Genuai Bidigo Dąų Wali Bomai Po Muani Halobage te Jerusalemba selasa soali. Augwa wiegi yai homu pemene eyu, tama i weyu, tama te bu wabo nai biugel dali pomono pai dao.

16 Te halobage augwa te Devitgo taun tomoba sela asali sogo, Mikal, te Solgo wegi, te sigi be windodu aba tonalubadi, tama augwali suali. Tama agai te aga bidi suali, te king Devit, te tęąbi eyu, te sasa mano bilu, te Genuai Bidigo nogi ugwaba sali. Tama Mikalgo Devitgo te tama tebo kolesaga te aga hagela homu yai, tama aga haliga dwai aga dali yalio.

17 Tialima, augwa te halobage te Devitgo augwa te halobage muainu sę yani ugwa be me deli tomoba te halobage muani. Tama aga te siago tigidali domainu ulubo ofa me, te Genuai Bidi dali deli haliga pedalubo ofa me, yalio. 18 Augwa te ofa ela silibo si da, teda Devitgo te we bidi dabeba te tiwai po wai, “Te Tigidali Bomo Elalubo Genuai Bidigo te dage wiegi yai bugagia ilimainu yao,” wali. 19 Tama Devitgo te we bidi tigidali nai mani. Te tigidali we me bidi deli deligo te bret deli me, augwa te siade ulai sipsip kibu mi me, te augwa te siade olali wain wai duani me, te augwa salio. Augwa te selama da, teda augwa pesageba digi ma geasa peyu yai.

20 Tama Devit aga beba ma pelama, te aga hani sibi wiegi yai ilimainu, te Godiba hanalugi peyu pali. Tama Mikal te bedu buluba dia solama, tama aga dali deliba gesabidi ilama, tama agai te po wali, “Ae, te Israel kingo te aga genuai nogi ola mayu, tama te bugagia sasa mano pali. Tama aga ofisa dabego olo sę ebo we dabego gedude te aga hale gagolobo sę ebo sumainu yalio. Nago te tama tiali, te homu kolesaga meni yai bidigo ebo tiwai yali dao,” te we Mikalgo te po wali. e 

21 Tama Devitgo te tiwai po wei ponani, “Eno te sasa mano peyu, te tęąbi yali da, te Genuai Bidigo nogi ugwaba siyu yai. Agai ena sa munama nigilali, te nago aya me hani sibi te hasegeliyu, tama tiali, tama agai ena aga te hani bage dabego tobolu bidi nigilali, te Israel dabede. Tama eno aga genuai nogi mayu, tęąbi mu iduaibao. 22 Tama ena digi ena nogi aiyaba mu elaluama, tama ena gedude te olo bage tiwai pedalumainu yaibao. Tiali goli, megi nago te po wabo olo sę ebo we dabe, augwaligo te genuai nogi enaba mawaibao,” Devitgo te po wai. 23 Tama Mikal, Solgo wegi, te aga wai me ame nisąbadi, te aga isibo sogoba usu nani.

Copyright information for `MPS