a[Lu 1:1-4]
b[Mt 3:11; Mk 1:8; Lu 3:16; Jo 1:33]
c[Mt 28:19; Mk 16:15; Lu 24:47-48]
d[Mt 27:3-8]
e[Tib 69:25; 109:8]

Acts 1

Te aposel dabe augwaligo Jisasgo po te Jerusalemde pusali

(Dąį 1:1-8:3)

Jisasgo bomo yai po dąų weyu, agai te Tedali Mobo Bidi tagala palabo po wali

Eno abagi Tiofilus, te eno hasia bukude eno e po asęani, te Jisasgo yali sę dabe tigidali dali, te agai po ola mawai po tigidali dali, te si asęani. a  Jisasgo te tiwai yai, te aga sę gagalobo sogo pelama, Godigo aga dagaluba odasa pali sogoba dąį egi pai. Tama Godigo aga dagaluba odasa pesiąwai madi, Jisas agai sa muani tagala palai bidi dabebolo po pusa mawai. Tama agai Godigo Dwagi Yai Mobogo bomogo te po augwalibolo pusa mawai. Tama Jisas isilama, ma hodaluama, te bidi sese si sogo aga bidi dabebolo agai tigi waselai, hauwa sogo. Tama agai augwaligo gedude sę dabe hauwa yali, te augwaligo aga gesi ma bidibo mu konemainu yai. Tama augwali homu si ebe. Augwaligo aga gedugo suali. Agai Godigo we bidi tonalubo sę po augwalibolo pusa mani. Tama augwali deliba sisinagaselama, Jisasgo augwalibolo te po bomonama wai, “Polobadu Jon agai we bidi baptais mani. Tialima, tamadi tama dage Jerusalem moni hanude bidibadi, Godigo agai Tedali Dwagi Yai Mobo Bidi dageba mawaibao, te baptais sabo tiwai yaibao. Tama tibaso, dage te Jerusalem hanu taga pelamuo. Meo. Eno Ayago dagebolo mawaiba wali nai, te Godigo Dwagi Yai Mobo, aga asobo tonaluiąo, eno dagebolo polobadu pusa mani nai po,” Jisasgo te po wali. b 

Godigo Jisas dagaluba odasa sai

Te Jisasgo tagala palabo bidi dabe augwali Jisas dali hodobo sisinagaselama, augwaligo aga hanalu, te po wali, “Genuai Bidi, polobadu da Israel hani bidi dabe dena tǫde bidibo we bidi dabe tonaluali. Te polobadu yali sę yaligia nago tamadi ma gagalaibawe?” Tama Jisasgo augwalibolo te po wei ponai, “Menio. Te eno Aya deli naga konealubo, te sę ebo sogo me, te agai bodolu mabo. Agai homugo. Dagego nai menio, tama tibaso dagego Ayago bodolu mani sogo si dabe konegobeo. Me ma, e dagego koneagameo, te Godigo Mobo Bidi dageba asobo si, teda Godigo dage bomo ilaibao. Tama duga enade po te we bidi dabebolo pusa maiyąo, te Jerusalem be nanide me, te Judia tǫ pedai tigidalide me, te Samaria tǫ pedai tigidalide me, te moni digibulu tǫ pedai dabede me te po pusa mao,” te po wali. c  Tama Jisasgo te po olama, Godigo aga te dagaluba odasa sai, te augwaligo tonalubadi. Tama aga hodaluama, pǫgo aga halua sagasali, te augwaligo aga ma subeo.

10 Te Jisas holobaso, augwaligo bomo yaigo tonalubadi, tama polo te nala nisi ugwa gudai bidi si augwali dali hodobo dolaluagasai. 11 Tama augwali sigo te po hanalu wai, “Dage Galili tǫ bidi dabe, dage te ugwaba dagaluba magi baso tonalu dolalubawe? U bidi Jisas, te Godigo dagaluba odasa holali bidi, te bidi ma asaibao, te aga dagaluba pabo yaligia ma asiyu me tiaibao, te dagego tonalubadi megi pabo yaligia tiwai yaibao, ma asobo sogode,” te po wali. Tama te po olama, tega si ma pali.

Te bidi Matias agai Judasgo sę sai

12 Te Jisasgo tagala palai bidi dabe augwali te Oliv Ni Sili bulu dudu geasa pelama, Jerusalem be naniba ma pali, te bulu digibulu meni, pąde bidai, te kilomita deli naga. 13 Tama augwali Jerusalem tomoba pelama, beba sabolama, augwa osogo bidigi pabo be habuba ugwaba holali. Tama te bidi dabego nogi e dao, te Pita, Jon, Jems, Andru, te Filip me, Tomas me, te Bartolomyu me, Matyu me, te gasa me Jems, aga aya nogi Alfius, te Saimon, te independes sainu ebo hani bidi me, te gasa Judas me, aga aya nogi Jems. 14 Tama augwali hauwa sogo deliba sisinagasali, Godibolo po omainu yali. Tama te Jisas wali pai we dabe me, Jisas aga ida me, Jisas aga ama dede me, te bidi dabe dali hodobo deliba sisinagasali, Godibolo po omainu yali.

15 Te nosali si sela sogo silibaso, tama te sogo te Jisasde homu dąų wai we bidi dabe deliba sisinagasali. Bidi sese me sela me sela 120 tama bidi sisinagasali. Tama Pita doligulama, te we bidibolo po me wai. 16 Pitago te po wai, “Ama dede, Godigo bukude polobadu asęani po mu dią holai dao. Polobadu Godigo Mobogo te Devitgo pedauwalidu po omainu ilai tiwai, te bidi Judasde. E Judasgo te Jisas tuabo sunumi te bidi dabebolo ola mawai bidi da. 17 Jisasgo aga polobadu sa muani, aga da dali sę emainu yali. Tama tibaso, Judas da dali bilai dao,” te po wai. 18 (Polobadu Judas agai Jisasde dwai sę elama, masigi dabe sai dao. Tama te masigigo tǫ abelama, tede tulaluyu, aga tabi peda peyu, aga haliga dabe buluba dią soyu, tama isai dao. 19 Tama te Jerusalemde bidibo we bidi tigidali augwaligo te sę po odali. Odolama, tama te tǫ augwaligo pogo nogi poai, te nogi Akeldama. Te nogi page e dao, “Kaneme tǫ dao.”) d 

20 Te Pitago po ma wai, “Te lotu tęąbi buku asęani bidigo te bukude te po wai,

‘Aga be olo elalumainao, tede bidi me bidamuo.’
e 
E po me te bukude asęani, ‘Me bidigo aga sę sao,’ te po wali,” Pitago te po wali, Judasde.

21 Te Pitago po ma wai, “Te bukude asęani po elalubaso, bidi me deli daba wadolama, da dali hodobo bidimainao. Te bidigo te we bidi dabebolo te po waibao, ‘Te Genuai Bidi Jisas isilama, ma hodaluali, ma bidibao,’ te po waibao. Tama polobadu Jongo we bidi baptais mabo sogode da dali hodobo bilai bidi me dąį ilinao. Te tama aselama, Jisas dagaluba peyu dąį yali. Te Jisas dali da hodobo biliyu bilali bidi, te bidi dago dąį ilaibao, te Judas hasegelainu, te Judasgo polobadu yali sę tiwai yaibao,” te po wai.

23 Te po obaso, te Jisasde homu dąų wabo we bidi augwaligo bidi sigo nogi muai. Me bidi nogi Josep, agai nogi me si elaluali, me nogi Barsabas, me nogi Jastus. Tama gasa me bidigo nogi Matias. 24 Tama augwaligo Jisasbolo te gedu haluasa po wai, “Genuai Bidi, nago tigidali bidi dabego homu kolesaga konebo dao. Tama tibaso, Genuai Bidi, te bidi si me deli nago dabolo dąį ilama, 25 da ola mao, te Judasgo yali sę somainu, nago tagala pali bidigo sę. Te sę Judasgo tagalama, aga digi dwai sę yali. Tialigo da, aga genuai sęgę mu salio,” te po wai. 26 Tama olama, augwaligo Matias dali Jastus dali sigo nogi yai nai dabe kapde munama, tama begelali, te Matiasgo nogi yai nai hasia asali. Tama tibaso, Matias nogo si olama, sągą deli bidi dabeba wadolai.

Copyright information for `MPS