a[Nam 6:18]

Acts 18

Polgo te Korin taun bulude sę eyu, po pusali

Te bidi Polgo nosali te Atens be nani taga pelama, agai Korin taun be naniba pali. Tama te bulude bidi me deli bidali, te Juda hani bidi, agai nogi Akwila. Aga bulu mu nogi da, Pontus da. Tama polobadu gana aga dali aga we dali te Itali tǫde bidali taga soai. Aga we nogi da, Prisila da. Te Rom gavman tobolu bidi mu agai nogi Klodius, agai te Juda hani te Rom tǫde bidali aga sela sąwai dao. Tama agai te po wali, “Dage Juda hani Romgo tǫde ma bidigimio,” wali. Tama tibaso, augwali si te Korin be naniba polasa soai madigi, Pol nosali Korin be naniba asai dao. Pol aga augwali sugi pali. Tama sugi pelama, agai augwali dali bidali. Tama Pol agai te we de bidi si te hasa waligo ugwa be hobolama, te mone sabo sę ebo suali. Polobadu Pol aga me te sę yai. Tama augwali sigo Pol hanalu wali, “Nage dadi si dali bidu, e sę yaibao,” wali. Tama Pol aga tede bidu, tigidali Sabat sogo Juda dabego bomo yai po ola mabo beba peyu yali. Tama agai te Juda hani bidi dabe dali me, te Grik hani bidi dabe dali me, agai po ola mani. Tama agai homugo augwali homu begelemainu hagede homu yali.

Te nosali Sailas dali, Timoti dali augwali si te Masedonia tǫ taga solama, Korin be nanide Pol bidibo madigi sabolali. Tama augwali si asobo si, Polgo te ugwa be hobolobo sę tagalali. Agai tigidali sogo te Juda hani we bidi bidibo tomode po ola bilali. Tama agai po bomai mu pusuyu, te po wali, “Te dagego koneao. Te bidi Jisas aga Godigo aga sa muai bidi Krais da, te we bidi tau somainu.” Tiali goli, augwaligo homugo te po pusubo po odobe. Augwaligo agade sębę yali, tama augwaligo aga dali dwai po mu wali. Tama tibaso, Pol aga tama kolesaga yali, agai nogogo te aga gudali ugwade elaluali pobele bage tedala sąyani. Tama tiyu agai te dąį yali, agai nosali augwali ma homu egobeo olama, te sę yali. Tama agai augwalibolo po walali, “Tialima, nosali dage hagawai baso da, duga sę dao,” wali. “Eno sę menio. Tialima, megi eno dage taga peyu, eno te Israel hani isąwai bidi dabebolo Godigo po pusa mawaibao,” te po wai. Tama tibaso, Pol aga te Juda hani taga peyu, aga te Israel hani isąwai bidi me deli, agai nogi Titius, me nogi Jastus, tego beba bidigi pali. Te bidi Titius agai Godibolo lotu po wabo dao. Agai be te Juda dabego bomo yai po ola mabo be sesege badu elalubo. Tama bidi me deli bidibo, agai nogi Krispus, aga Juda dabego bomo yai po ola mabo be tonalubo genuai tobolu bidi mu dao. Te bidi dali, aga bede bidibo we bidi dabe dali, augwali tigidaligo Jisasba augwa homu tigidali mu muani. Tama Korin we bidi umabo augwaligo Polgo wabo po odama, augwaligo homu Jisasba mu munama, tama augwali tigidali baptais mani.

Te me sogo hulide Pol agai nai me deli te nade suali. Tama Genuai Bidigo aga dali po tama wali, “Nage wi egio,” wali. “Nago po bomo elama, augwalibolo wao. Naga pedauwali pania sigio,” wali. 10 “Ena nage dali bidibao. Gasa bidigo nage dologobeo. Magi basowe? E be nanide bidibo we bidi umabo augwali eno sa muai dao. Augwaligo nago po odama, te augwali eno hani gagawaibao,” wali. 11 Tama te po obaso, Pol aga Korinde bidibadi, kibu be deli silama, me tomoba egi pali. Tama agai tigidali we bidi Godigo po ola mani.

12 Te nosali te bidi me deli nogi Galio, te Rom gavman genuai mu tobolu bidi dabe augwaligo te bidi Galio te Grik tǫ tonaluabo tobolu bidi nigilali. Tama te sogo te Juda hani augwali sisinama, Pol selama, augwaligo aga po tųba odasa pali. 13 Augwaligo Galiobolo te po wai, “Te bidi agai homugo dago bomo yai po dolobo. Tama agai te we bidibolo Godigo lotu po wabo gasa kolesaga elama, bugagia ola mabeo,” wali.

14 Te bidi Pol aga doligulama, agai po gagalainogo, te gavman bidi Galio agai te Juda dabebolo te po tama wai, “E bidi Pol agai dwai sę mu egi sogo da, teda eno tonaluama, dagego po tų ebo po page tigidali eno odigi da. 15 Tiali goli, dage dolaga aselama, tama dagego umabo me me nogi wabo po obaso, te dage Juda hanigo bomo yai po dabe po me obaso, dagego homugo ena te tiwai po odobo bidi dawe?” wali. “Menio. Duga digi te po dodolao,” po wali. 16 Tama agai te Juda hani bidi dabe augwali te po tų ebo bede sela sąyani. 17 Augwali te be tagalama, buluba soali. Tede augwaligo te Juda dabego bomo yai po ola mabo be tonalubo bidi nogogo tuali. Te bidi nogi Sostenes. Augwaligo te po tų ebo be sesegede te bidi osogo elali. Tiali goli, Galiogo sulama, tama agai te dwai sę ebode moni homu ebe.

Pol aga Antiokba ma geasa pali, te Siria tǫba

18 Te bidi Pol aga te Jisasgo po wali pabo hani dali hauwa sogo bidali, te Korin be nanide. Tama nosali agai augwali taga soali. Agai te Prisila dali, Akwila dali augwali sela te Siria tǫba pabo gagalali. Tama Senkria be naniba tǫdu sabolama, tede Pol agai Godibolo bodolu mawai. Aga tobolu nisi poayali, te bodolu mani po dąų omainu yai. a  19 Tama tilama, augwali sela te moni gebadu pelama, te tamu ąį bolama tama Efesus moni be naniba sabolali. Tama Pol aga te Juda dabego bomo yai po ola mabo be tomoba pelama, te Juda dabe dali umabo po miani. 20 Augwaligo agabolo augwalide hauwa sogo mu bidaimai hagede hanalu wali. Tiali goli, Polgo “Menio,” wali. 21 Agai augwali taga peyu, te po wai, “Te Godigo ‘Usu da’ obaso da, teda nosali ena dage pageba ma geasa asaibao,” wali. Te po olama, Pol te moni gebadu pelama, Efesus be nani taga pali.

22 Te bidi Pol te moni gebadu pelama, te nabis be nani Sisaria teba sabolali. Tedu tǫdu pelama, Jerusalemba pali. Tama agai Jisasgo po wali pabo hanibolo “Dage tao,” wali. Tama nosali aga tedu pelama, Antiokba pali. 23 Tede aga hauwa sogonu bidama, aga Antiok taga pali. Tama ma pelama, tǫdu pelama, te Galesia tǫ me, Frigia tǫ me tomodu pelama, Jisasgo po wali pabo hani we bidi suali. Tama agai augwalibolo dwagi yai po pusa mani, augwali bomo somainogo yali.

24 Te Juda bidi me deli Efesus be naniba sabolagasali. Agai nogi da Apolos, agai page bulu Aleksandria be nani da. Tama te bidi aga da po digi wabo bidi, te agai dwagi yai Godigo po asęani bukude ebo po page tigidali koneai bidi mu da. 25 Tama agai koneai, te Genuai Bidigo agai tigidali we bidi ma sabo tų koneani. Tama tigidali sogo agai homugo dąų mu eyu Jisasgo yali sę po dabe tigidali pusali, bugagia dolo pusa mani. Tiali goli, agai koneani, te Jongo agai te we bidi baptais mabo sę yali wali po naga agai koneani. 26 Tama te bidi Apolos agai te Juda dabego bomo yai po ola mabo bede agai po bomonama wali, wi ebe. Prisila dali Akwila dali sigo agai po wabo odama, augwali sigo beba aga odasa pali. Tede augwali sigo agabolo Godigo pabo tų po page bugagia hania ola mawai. 27 Tama nosali Apolos agai homugo te Grik po wabo bidi dabego page bulu tǫba pomai hagede homu yali. Tama tibaso, te Efesusde Jisasgo po wali pabo hani we bidigo bugai homu elama, te Grik tǫde bidibo Jisasgo hani dabebolo pas asęani, te Apolos tau somainu yali. Te pas tomode augwaligo te po asęani, “Te bidi Apolos asobo si, dagego aga bugagia tau sao.” Tama Apolos pelama, sabalobo si, tigidali sogo augwali sisinama, po mibo sę yali, augwaligo Godigo po bukude asęani po wali. Te po agai tigidali we bidibolo Jisas ola mani. Aga “Te bidi mu polobadu Godigo agai da tau somainogo sa muai bidi Krais da,” wali. Tama tigidali sogo Apolosgo te Juda hanigo konila po wabo aiyaba elaluali. Tialima, Apolos agai Jisasgo po wali pabo we bidi hani tau mu sali, polobadu Godigo augwali hobede ebo kolesaga olo menama, tau sali.

Copyright information for `MPS