b[Gag 19:24]

Amos 4

Dage Samaria we dabego, te po odiąo. Dage mu nisalio, te Basan bulude elalubo wiegi yai bulmakau dabego nosai hauwa tulama, nisibo tiwai pedelali. Dagego te bomo kimi meni yai we bidi dabeba dwai sę ebo dao. Tama dagego te magi nai doado bage meni yai bidi dabeba sęgę menama, te dagego augwali dwasianu hobede me ebeo. Menio. Dagego te duga bidi tonalu, te augwaliba e tiwai i weyu, “Te tubo bomai ąį hauwa sesao. Da gęǫ page yaibao,” wabo dao. Genuai Bidi Tigidali Bomo Elalubo Bidi aga te wiegi yai doloba pai kolesaga ebo God dao, tama tibaso agai te tama bomai po dąų walali, “Mu tama, me sogo deli pedalubo si da, te boi bidi augwaligo dage te gąų yai bisigigo kekelama, dage sela paibao. Awe, dage tigidali te pis sųgų daboasa holobo gąų yai nai hukgo sųgų sabo tiwai yaibao. Te augwaligo dage te moni hanu taungo obo banis aluali madi dabedu buluba sela pelama, tama augwaligo dage te pesage Harmon habuba sągi paibao,” Genuai Bidigo te po obao.
4:3Te Hibru pogo tede wali po te Harmon bulu mena mu elaluali, te menagiai bulu te dago kuna konebe dao.


Godigo te Israel dabeba dwai dene mabo sę yali, tiali goli augwaligo tobolu dili mu dila pai elaluali

God, Tigidali Bomo Elalubo Genuai Bidigo te tama po wali, “Dage Israel we bidi dabeo, tegoba, dage polo pepela yao. Dagego dwai sęgę sabo sę te lotu wabo pesage taun Betelba egi piąo. Te dage te lotu wabo pesage te taun Gilgalba pelama, te dwai sęgę sabo sę genuagia umabo sę egi piąo. Tama tiyu, tigidali sogo kigamude dagego te ofa yabo hasa dabe sela piąo. Te sela wabo sogo tigidali side, dagego te nogo si wali naide te me deli togolama, enaba mawainu sesao. Tegoba, dagego te eno bomai po boloyu, dagego te yis elalubo bret enaba ofa eyu, te buba hwi wabo ofa tiwai yao. Te dagego duga homugo enaba ofa yainu, te nai hauwa sesebo sogo, tegobao, tebode duga digi duga nogi ugwaba sobao. Dagego te tama tebo tobage kolesaga wei homu ebo dao,” te po wali.

Genuai Bidigo te tama po wali, “Awe, dagego tama tebo dao. Tama tibaso, eno tama, eno te genuai nasi te dagego taun tigidaliba pedalumainu ilama, te tigidali bulude dage nai meni yai. Tiali goli, te dage enaba ma geasa asobeo. Mu menio.”

Genuai Bidigo te po wali, “Ena digi eno te tulubage paliali, te tulubage tulubo sogo te nai wiegi yai pedalumainu ilibo tulubage te eno paliali. Eno te tulubage te taun mebaba tagala palali, te gasaba me tebeo. Menio. Te gi mebago tulubage sali. Tialima, te gasa gi dabego me sabeo, menio, tama tigidali te sasia palio. Te taun me badu we bidi augwali wę nogonego mu salio. Tama tialima, bomo meni baso, dwai biliyu, augwa te gasa taun dabeba wę gege palio. Tiali goli, wę sǫą palio. Eno te tama sę me yali, tiali goli te dage enaba ma geasa asobeo. Mu menio,” wali.

Te Genuai Bidigo te tama po wai, “Hauwa sogo eno te dagego gi dolomainu eyu, eno te posolai wali tagala palai. Me, te hauwa sogo eno te dagego gi nai yabe aminawai holomainogo ilai. Te kuli mano dabego dagego gi nai dabe, me wain gi dabe, me ni kaya fik, me oliv ni dabe tula silimainu yai. Tiali goli, dage enaba ma geasa me asobeo. Mu menio,” wali.

10 Genuai Bidigo po ma weyu, te tama wali, “Eno dage dolabo dwai gasi mu tagala palali, eno te Isip dabe augwaliba yali tiwai yalio. Te boi hwįbode eno dage gesi ogwa bidi ela muyu, eno dagego hwįbo hos dabe te boi bidi dabego somainu ilalio. Te eno dagego te hwįbode isali bidi dabego tigigo te dage bidibo pesagede te dwai kugumini ebo dagego denami odomainu ilalio. Tiali goli, tede me dage enaba ma geasa me asobeo. Mu menio,” wali.

11 Te Genuai Bidigo te po wai, “Eno dage meba dolali, eno te taun si Sodom me Gomora dolali tiwai yali. Me ma, te dage me bidalubo hani, dage te isi dage me te isigo uludubo tiwai ebadi, tialima bidi dabego te iside sela sąwai. Tiali goli, dage enaba ma geasa me asobeo. Mu menio. Tama tibaso, eno dage Israel dabeba dwai dene mabo sę yaibao. Eno te tama tiaibao, tialima dage eno po tųba sabolabo sisi elaluao, dagego God da. Ena Genuai Bidi, eno te po wai dao.” b 

Genuai Bidigo tigidali sę yabo bomo elalubao

(Amos 5:8-9, me 9:5-6)

13 Godigo naga te bulu du dabe nigali,
te wali me pedalumainu ilibao.
Agai aga homu kolesaga te we bidibolo haniliyu,
ola mabo dao.
Agai bomogo naga te be posobo ula hasegeleyu,
tama be hulibo dao.
Aga te bulu du dabe daide ugwadu biliyu,
te tǫ habu tigidaliba tonalubao.
God, Tigidali Bomo Elalubo Genuai Bidi,
aga digi te kolesaga ebo dao.
Copyright information for `MPS