Amos 6

Te Israel dabe augwa bomogo digi bugagia bidabo tau sobaso, usu egobeo

Amosgo po e dao. Hobede dao, dage Jerusalemde bugagia dugulalubo we bidi, me te Samaria taunde bidibo we bidi, dagego te tiwai homu ebao, te magi nai me deligo dage me dologobe da homu ebo dao. Te hobede ebao, dage te polalubo kantri tǫ Israel gegunai bidi dabe, te dagego augwali tau somainogo te we bidi dageba asidu gebo dao. Hobede mu ebao, dage tigidali dolaibao. Dage pelama, Kalne taun sugi pao. Tama nosali dagego te Hamat genuai taun sugi pao, te dage ma bilama, te Get taun me sugi pao, te kantri Filistia tǫde elalubao. Dagego homugo te taun dabego bomo te dage Juda me Israel dabego tǫ kantrigo bomo edelai da homu eba, agawe? Te dagego homugo augwaligo tǫ te genuai mu elama, te dagego tǫ kantri tiwai si meni da homu eba, agawe? Awe, tiali goli augwali dolai dao. Hobedagia mu. Dagego homugo te dolobo sę dageba pedalugobe da homu ebao. Tialima, hobede mu ebao, te dagego ebo dwai sę dabego te dwai sogo pąba pedalumainu sesebo sę ebo dao.

Dage mone hauwa elalubo bidi dabe, te wiegi yai pibo bet sai mude olo pila mubadi, te wiegi yai nai bulmakau me nisai sipsip mi tubao, dage dua dao. Te dwai sogogo dageba gesabidi si unulaibao. Dagego te gesi olo balia nigibo sę ebo wei ebo dao, te Devitgo yali tiwai eyu, dagego te wiegi yai musik gagali eyu, te gita gagali me ebo dao. Dagego te genuai kap wain wę hauwa tubo dao. Te dagego denami ebo sawi yai sanda, me ili yai nai te duga tigide denami iliyu mubo dao. Tiali goli, dagego te tǫ kantri Israel nosali dolabo homu dene dwasianu me ebo menio. Tama tialima, dage Israel bage te gasa buluba kalabus sela pabo sogo, dage naga te polasa pabo hani mu tiwai pedaluyu paibao. Tama duga te genuai nai daa tuali tiwai munu ma tugobeo.

God, Tigidali Bomo Elalubo Genuai Bidi, Tigidali Nai Tonalubo Bidi, agai te tiwai bomai po dąų wali, “Eno te Israel dabego gagea peyu, te hagoma ebo kolesaga ebo, te eno hagela homu ebao. Te eno augwaligo genuai boma pai be dabe eno haliga sębę yaibao. Tama tialima, eno te augwaligo polalubo taun dali, te tomode elalubo tigidali nai te augwa boi bidi dabego nogoba mawaibao,” te po wai dao.

Te nogo si we bidi naga te deli bede geme me bidiyu da, teda tigidali isaibao. 10 Te bidi me deli isali sogo, te aga deli kaneme bidi me deli asama, te aga tigi selama, ulugi painu yaibao. Tama te deli kaneme hani bidigo te be tomode geme dualalubo bidi i weyu, te tiwai waibao, “Te gasa bidi dabe me bidibawe, ma meniwe?” Te geme dualalubo bidigo te tiwai po wei ponaibao, “Menio,” wali. Tialima, te deli kaneme hani bidigo te tama po waibao, “Pedauwali pania sao. Dago Genuai Bidigo nogi munu me nogi ilamo dao,” te po waibao.

11 Magi baso meni. Genuai Bidigo po obaso, te tigidali genuai be me, dwasianu be dali, te subigila todogola pelama, olo pobele bage hogomu pedelaibao.

12 Dagego homugo te hos kibu dabe te genuai masigi dabe daidu ugwadu udada pabo usu yaiba, agawe? Te menio. Ma, dagego homugo te genuai masigi ugwadu daide te bulmakau dabego te gi tǫ elebo dono kegebo usu yaiba homu eba, agawe? Menio. Te kolesaga dabe mu geda mubao. Tiali goli, te dagego te tobage deli tigi poai kolesaga naga ebao. Dagego te po tų ebo doloba pai kolesaga te bidi isilibo nabi tiwai pedalubao. Tama dagego te wiegi yai kolesaga te dwai ha ebo nai tiwai pedalubo dao.

13 Dagego te taun Lodebar aiyaba elaluali da homu elama, pemene eyu, te dage hagoma eyu, bidibao. Tama dagego duga nogi ugwaba siyu, te po me obao, “Te dena bomogo digi te taun Karnaim sali,” homu ebao. 14 Tiali goli, Tigidali Bomo Elalubo Genuai Bidi agai te tama po wai, “Te eno gasa bidi hani me deli tagala palama, te dage Israelba boi hwįagasomainu yaibao. Augwaligo te dage dali hwįbo sę umabo mu eyu, genuai sęgę mawaibao, te Hamat taun te not badu gagalasa pabo, te wę Araba te saut badu usu nigi paibao,” te po wai dao.

Copyright information for `MPS