Amos 7

Amosgo nade te kuli mano dabe suali

Me sogo God Genuai Bidigo te nai me deli te nade tiwai enabolo ola mawai. Eno suali, Genuai Bidigo te kuli mano hani genuai me deli pedalumainu ilali. Te sę bidi dabego te kingo bulmakau dabeba maiabo nosai togolama, te gesi nosai kulubi ma pedalubo sogo da, teda te kuli mano dabe me pedelalio. Te nade eno suali, te kuli mano dabego te tǫde nosai dabe me ni yabe tigidali silai yalio. Tibaso, tede noma siyu, eno te tama po i wali, “God, Genuai Bidio, nago naga we bidi dabe augwaligo dwai sęgę sela sąyao, te Israel dabe dao. Augwali dwasianu hani naga dao, te augwali bomo meni yai. Te nago te kuli mano dabe tagala palama, te Israel dabego dwai kolesaga te tiwai wei ponogi sogo da, tede augwali magi ilama bugagia bidaibawe?” wali. Te po obaso, Genuai Bidigo homu hasegelama, agai te tama po wai, “Nago te nade suali nai, te pedalumainu me egobeo,” te po wai.

Amosgo nade isi suali

God Genuai Bidigo enabolo gasa nai me te nade ebo tiwai ola mani. Te nade eno suali, te Genuai Bidigo te isi dodolama, te aga we bidigo dwai sę yai baso, agai augwaliba dene mawainu ebo suai. Tama te isigo te aiyanu mu dulai tamu wę te isi delama, te wę sula selama, te nosali te isigo te gi bulabo tǫ me dabo sę gagalalio. Tialima, megi da, eno tama po wai, “God, Genuai Bidi, woo, nago te sę me elamuo. Nago we bidi dabe te dwasianu hani naga elalubao, te augwaligo bomo elalubo menio. Te nago augwaliba te tobage dwai dene mabo sę ebaso da, teda augwali mena gilama bugagia bidaibawe?” Tama tibaso, Genuai Bidigo homu ma hasegelama, te po wai, “Te sę me, pedalugobeo,” wali.

Amosgo nade te ain walobo hobi suali

Te Genuai Bidigo enabolo te gasa nai ma te nade tiwai ola mawai. Eno suali, Genuai Bidi te be me deli daga pąde dolaluali. Te be sę yani bidi dabe, augwaligo te be sę idubadi, augwaligo te dwasianu ain walobo hobi tolalu, te be daga dolo dolalubowe, ma meniwe, tama usu sainu yai dao. Tama te be daga dabe dolo tama dolaluali. Tama eno suali, Genuai Bidigo te hobi tolaluai. Tama agai enabolo te tiwai po hanalu wai, “Amos, nago magi nai sualiwe?” Tama eno te po wali, “Te be dodolabo ain elalubo hobi me deli suali.”

Tama agai enabolo te tiwai po wali, “Odao. Eno te hobi tolalubo sę ebo te eno ena we bidi augwaligo ebo kolesaga sueinu ebao, te eno augwali suali, te be daga dolo dolalusąbo tiwai suali. Tama tibaso, eno augwaligo dwai kolesaga wei ponaibao homu eyu, te eno homu ma hasegelabo usu egobeo.
Te bulu te Israel dabe, te augwali Aisakgo wąį nǫų hani dabe, te augwaligo lotu wabo pesage dabe te mu dolaibao. Tama eno te king Jeroboamgo hani dabe mu silimainu ilaibao,” te po wai dao.

Profet Amosgo te pris Amasiaba wado ilali

10 Te Amasia, aga te Betel taun pesagede lotu wabo pris bidi dabego tobolu bidi, agai te Israel king bidi Jeroboamba po ola tolali. Agai te tiwai po wali, “Te nago tonalubo tǫ tomode digi te Amosgo te Israel we bidi augwali haliga hodoliyu, dianobo sę eyu, nageba augwaligo boi bidi homu emainogo ebao. Te nago aga sula tagaludubaso da, teda agai pogo te tǫ kantri dolaibao. 11 Amosgo te tama tiwai po obao, ‘Jeroboam te genuai boi hwįbo side me isibaso, tama te Israel dabe te digibulu bulu me deliba kalabus igi paibao.’ Te po wabo dao,” Amasiago te po wali.

12 Tialima, Amasia pelama, Amosbolo te tama po waligi pali, “Profet, nago e Betelde bidibo gudama, wi pao. Nage Juda tǫba ma geasa pao. Nago profet po te Juda we bidiba wagi pobaso, te Juda dabe augwa digi nage mone momainao. 13 Nago te profet po e bulu Betelde pusubo te dago hagela homu ebao. Magi baso meni, kingo te pesagede lotu wabo dao. Tama ede elalubo lotu wabo be da, te tigidali Israel hanigo be dao,” te po wali.

14 Tama Amosgo te tiwai po Amasiabolo wei ponani, “Ena te gasa profet dabe meba tiwai meni, tama eno te profet po wabo sęde mone sabo sę me ebeo. Ena te sipsip dabe tonalubo bidi me deli naga tama, tama eno te ni kaya fik dabe tonalubo sę iduai dao. 15 Tiali goli, eno ena sę idu bidibadi, tama Genuai Bidigo ena tedu selama, enabolo te tiwai po wali, ‘Nage pelama, nago eno po te eno we bidi Israel dabeba pusigi pao,’ wali. Tama tibaso, ena asai dao. 16 Tialima, Genuai Bidigo po odao. Agai te Israel dabede wado po elalubao, tiali goli nago enabolo te profet po augwaliba pusubo te habu selibo dao. 17 Amasia, nago te po wai dao. Tialima, Genuai Bidigo po nage dali megi elalubao. Agai nageba te po obao, ‘Nago we da, te taunde penani sę ebo we pedelaibao. Tama te boi bidi dabego boi hwįagaselama, te nago wai dabe ela mueibao. Te augwaligo nago tǫ selama, gasa bidi dabeba dobawaibao. Te augwaligo nage te dobo kolesaga ebo haiden kantriba sela pelama, tama nage te bulude bidama, isaibao. Tama te boi bidi dabego te Israel we bidi sela peyu, te Israel tǫ taga peyu, te gasa tǫ kantriba kalabus igi peyu, sela paibao,’ Genuai Bidigo nageba te po wai dao,” Amosgo te po wai.

Copyright information for `MPS