Daniel 2

Nebukatnesargo na yali

Te me deli sogo hulide te si wabo kibu bede te Nebukatnesar king bidibadi, agai na yai. Te na yaligo te aga haliga sęgę mu ilama, tama aga piabo ąǫ ma ebeo. Tama tibaso, agai po te gedugo tonama konebo bidi dabeba me, te pobi wabo bidi dabeba me, te dagalu hǫ dabe suyu nosali pedelabo sę konebo kolesaga koneai elalubo bidi dabe, te augwaliba po ola tolali. Augwali aselama, te agai na yali po page pusagasomainu yalio. Te augwali aselama, kingo geduba dolagasobo sogo, agai te tiwai po augwaliba weyu yai, “Eno na yalio, tama te na yaligo ena homu sęgę tama elalubao,” wai. “Tama tibaso, eno te na yali page koneainu ebao,” wai.

Tama augwaligo te kingba po wei ponoyu, te Aram pogo begelama, te tiwai po wai, “King o, eno homugo nage te sesemane sogo sesabi elama, bugagia bidagameo. Te nago dabolo te nago nade suali nai po bolo pusao,” wali, “tama dago te na page nageba pusa mawaibao,” te po wai dao.

Tama kingo te bidi dabe augwaliba te tiwai po wai, “Eno mu po dageba obao, te dagego enaba te eno nade suai nai dabede po pusisąyu, tama te na yali page enaba te dagego pusa masiąbo usu isiąbaso da, teda te eno ena ami bidi dabeba walama, te dagego tigi tologolama, dolama, tama dage isimainu yaibao,” wali. “Tama augwaligo dagego be dolama, te olo nai kakali hogomu tiwai pedelaibao,” te po wai. “Tiali goli, te dagego enabolo te eno nade suali nai dabe dali, te na yali page dali si pusa mobaso da, teda eno dageba te doado bage hauwa mayu, tama eno dagego nogi genuai pedalubo sę ilaibao. Tialima, megi da, dagego enabolo te eno na yali po page pusa maiyąo,” te po wali.

Tama augwaligo kingba te po ma wai, “Nago te nade suali nai po bolo dabolo pusa mao,” po wai, “tama dago te page pusaibao,” wali.

Tama kingo te po wali, “Eno te dagego tibo po wabo koneanio. Te dagego gesege gana eyu, te sesabi yaibao, magi baso meni, te dagego homugo eno te u wali po hasegelaibao homu yali. Tiali goli, te usu me egobeo. Te dagego enabolo te eno nade suali naide po wasiąbaso da, dage tigidali te deli dolobo sę tobagego naga te dage dolaibao. Dage tigidaligo deli homu elama, te eno homu hasegelibo usu egowe weyu, te dagego ena tibo po ola mobao. Tialima, te eno nade suali nai po te enabolo waiąo. Dagego tama tibaso da, teda eno koneaibao, te dagego te na yali po page dali pusubo usu yaibao,” te po wai.

10 Te bidi dabego te kingo po wabo odolama, tama augwaligo te tiwai po wei ponani, “King, te nago dabolo te yao po wabo sę hanalubo po wali, te tǫde bidi me deligo nagebolo te po nageba obaso, te usu egobeo. King, te bidi osola subo bidi, me te gasa kolesaga koneai bidi dabeba me, te genuai bomai king bidigo te tobage hanalubo po polobadu munu me hanalu wai menio. 11 King, te nago dabolo hanalu wali nai po da kone tųą palio, tama te bidi me deligo yainogo ebaso, usu me egobeo. Te god dabego naga usu yaibao. Tama te god dabe te bidi dali me bidibeo,” wali.

12 Kingo te po odolama, te aga sębę eyu, agai wado po dwai mu wali. Tama agai te ami bidi dabeba po ola tolama, te augwaligo te Babilonde te po page koneai bidi tigidali ela silaibao, wali. 13 Tama te kolesaga konea pai bidi dabe ela muao wabo po augwaligo ola tolama, tama augwali meba pelama, te Daniel me, aga abagi dabe sela dali, te augwali me ela muainu yali.

Godigo te na page Danielbolo ola mawai

14 Tialima, Ariok, te kingo ami bidi dabede te polalubo ofisa bidi, te hodolama peyu, te Babilonde kolesaga konea pai bidi dabe ela mugi painu yai. Tama Danielgo te homu kone bugagia palama, te Ariok dali miabo po sunumi dodolali. 15 Tama agai Ariokba te tiwai po hanalu wali, “Magi baso kingo te sesena pai bidi tiwai eyu, tama bomai po weyu, te kolesaga po page konea pai bidi dabe ela muaiba po waliwe?” Tama Ariokgo Danielba te tama sę pedelali po wai. 16 Tama Daniel te kingba polo pelama, tama agabolo hanalugi pelama, agai te po page koneani bidi dabe te polo asesa ela mugio olama, tama agai te na yali po page pusaibao po wai dao.

17 Kingo te pode usu da po obaso, tama Daniel aga beba ma begasa pelama, tama aga abagi selabolo te po walali, te Hanania, me Misael, me Asaria, te tama sę pedelali po wali. 18 Tama agai augwaliba te tiwai po wai, “Dago te dagalude bidibo Godiba gedu haluasa po wainao, te Godigo olo tau mabo wiegi yai kolesagago te dabolo te geme dualali nai page ola momainu elama, tama da te gasa po page koneani bidi te Babilon bulu bidi dabe dali isidali weyu, te dago tama tinao,” wai. 19 Tialima, te sogo hulide naga, te Daniel aga na tiwai ebadi, tama Godigo Danielba te kingo na yali page ola mawai. Tama Danielgo te po wei ponoyu, tama te Godigo nogi ugwaba siyu, 20 tama te tiwai po wai, “God, eno nago nogi sesemane sogo ugwaba saibao. Tigidali bomo me koneani kolesaga te nagede naga elalubao. 21 Nago te giliga side, me tulubage side te tonalubao, tama nago digi te bidi dabe king pedalumainu elama, tama nago te king dabe augwa sęde sela sąyu ebo dao. Tama nago te wiegi yai konebo homu kolesaga te we bidi dabeba mabo dao. 22 Te nai hauwa geme dualalubo te bidi dabego konesiąwai. Tiali goli, God, nago te nai dabe te bidi mebabolo ola mabo dao. Te nanobo ula te nagede elalubao, tama nago te be hulia side elalubo nai te konea pai dao. 23 Te eno wąį nǫų dabego God, eno nageba gedu haluasa po weyu, usu da olama, te nage nogi ugwaba sobao. Magi baso meni, nago enabolo te konebo kolesaga me te bomo enaba mawai, tama nago eno gedu haluasa po wabo odolama, tama enabolo te dago nageba hanalu wali nai ola mawai. Tama nago dabolo te dago te kingba aga nade pusabo po meba mawai dao,” Danielgo te gedu haluasa po wai.

Danielgo te na yali po page kingba pusali

24 Daniel te Ariokba pali, te bidi te kingo nogo tų dąį ilama, te Babilon po page koneai bidi dabe elimainu yali bidi da, tama Danielgo agaba te tama po wai, “Nago te po page koneai bidi dabe munu me eligio,” wai. “Nago ena te kingba sela pao, tama eno agaba te na yali po olama, tama te na yali page agaba pusaibao,” wali.

25 Tialima, polo asesa Ariokgo te Daniel kingba sela pelama, tama agabolo te po walali, “Eno te dago te augwaligo page bulude sesali Juda bidi me deli gegalio, tama agai nageba te na yali po page pusa mabo usu yaibao,” wali.

26 Tama kingo Danielba hanalu wali, “Beltesasar, te nago enabolo te eno na yali po weyu, tama te na yali po page pusubaso usu mu yaibawe?” te po wai.

27 Tialima, Danielgo kingba te tama po wai, “King o, te kolesaga page koneai bidi me deligo te geme dualali nai page po pusainu ebaso, usu me egobeo, te gedugo tonama konebo bidi dabe me, te pobi wabo bidi dabe me, augwali usu me egobeo. 28 Tiali goli, te dagalude bidibo God deli elalubao, tama agai te geme dualalubo nai page hania hanilaibao. King, Godigo nageba te nosali pedelabo nai dabede te na nagebolo ola manio. Megi da, te eno nageba te nago na yali po waibao. 29 King, nage pilamubadi, tama nago te nosali pedelabo sęde homugo kone paluyu, tama te nade Godigo nageba te nosali pedelabo nai dabe ola mani. Te God, te geme dualalubo nai dabe hanilibo God dao, tama agai nageba te nai dabe pedelaibao olama, te ola mani dao. 30 Tama te Godigo enabolo te geme dualaluali nai ola mawai. Te eno koneani kolesaga genuai da homu eyu, tama eno te gasa kolesaga koneani bidi dabe aiyaba elaluali da, te homu me egobeo. Menio. Godigo te sę enaba ola mobaso, te nago na yali po page te nago konemainogo ebo dao,” wali.

31 “King, te nago nade te moni dobo dwai bidi me deli piksa noma suyu, bididuali. Tama te nai te bomo elama, te ula mu yai. Nago sulama, te nage wi dwai mu yai. 32 Augwaligo aga tobolu te wiegi yai golgo nigai, te ula mu elaluali. Te hagawia me te aga nogo si augwaligo te silvago nigai, tama aga tabi me sągą tele si te brasgo nigai. 33 Te aga sągą pąno me sugu mi te aingo nigali, tiali goli te aiyadu sągą sawali si te ain me tǫgo dali nigai. 34 Nago te piksa nomaba tonaludubadi, tama masigi me deli aga digi te bulu dudu gebu aluasa dulu, te piksa sągą augwaligo te tǫgo me aingo nigali pedai badu elali. Tama te sągą si dwasianu mimia pelama, kakali nigilali. Bidigo te masigigo te dolobo sę me ebeo. 35 Tama te tigidali ain, me tǫ, me bras, me silva, me gol, tigidali te pepeda pelama, tama te wit tigiwali bo te dago sela sąbo tiwai pedelali. Tama te waligo te kakali hogomu selasa pelama, tama te dwasianu hogomu dabe me elalubeo. Tiali goli, te piksa noma elali masigi, te genuai bulu du pedelama, tama te tǫ pedai tigidali mesega salio,” wali.

36 “King, te tama na nago suali. Tialima, megi da, eno nageba te na yali po page pusaibao. 37 King, nage te polasa mu polalubao, tama nago te tigidali gasa king aiyaba elaluai. Te dagalude bidibo Godigo agai nage sa munama, tama agai nageba te genuai bomo, me genuai nogi mawai dao. 38 Agai nago te tigidali tǫde bidibo we bidi hani, me tigidali hasa sibi, me ba sibi, te tonalumainu ebo bidi nigali. Te nade te augwaligo te tobolu golgo nigali tiwai, te nage digi dao. 39 Te nage tudi badu gasa king bidi hani pedelaibao, tiali goli te augwaligo bomo te nago bomo tiwai me egobeo. Tama nosali te sela wabo king bidi hani pedalubo sogo, te tigidali tǫ pedai tonalueibao. Te king hani te bras tiwai dao. 40 Nosali te me si me si wabo king bidi hani pedelaibao. Agai bomo te aingo bomo tiwai yaibao. Aingo te tigidali nai elibo si, te kakali mu elama, te hogomu tiwai ebo dao. Tialima, te tiwai te king hanigo te kantri bulu tǫ pedai te tigidali mu dolama siliyu, te polobadu yali king bidi hani ela silaibao. 41 Te nago nade te tiwai suali, te naigo sągą sawali me sągą ge dabe augwaligo te tǫ de ain si taluama, nigali. Te page te tiwai. Te kingo tonaluali we bidi te pepeda pelama, te hani si pedelaibao. Tiali goli, te hani si te bomo elaludaibao. Ain te tǫ dali sągą side elaluali, tama te da te tiwai ola mawai, augwaligo bomo tigidali te polo tama me siligobeo. 42 Te sągą ge dabe augwaligo te ain me tǫgo nigali te tiwai ola mawai, te king bidi hani me badu te aingo bomo tiwai elalueibao, tiali goli te gasa pedai badu te tǫgo dwasianu bomo naga tiwai me elalueibao. 43 Augwaligo te piksa sągą nigainogo te ain me tǫ dali taluama, nigali. Te page te tiwai dao. Te king dabego homugo te pepeda pali hani dabe ma sisinabo homu elama, tama te augwaligo te gasa king dabego wegi dabe sabo homu elama, tama tiaibao. Tiali goli, te augwali deliba bugagia me dagana sogobeo, magi baso meni, ain te tǫ dali bugagia me dagana sabo menio,” wali.

44 “Tama te king dabe bidalubadi, te Godigo te we bidi tonalubo bomo te tomo hodolama, tama te tonalubo bomo te sesemane bidada peyu, bidada paibao. Te gasa king dabego te Godigo tonalubo bomo te elalueinu ebaso, usu me egobeo, te gasa bagego te bomo me sogobeo. Tiali digi, te agai da te augwali aiyaba elaluama, tama te gasa king dabe mu dola silama, tama agai tonalubo bomo te sesemane elaluaibao. 45 Nago suali, te masigi olodali aluasa dulu te tulaluama, tama te piksa augwaligo te ain, me bras, me tǫ, silva, gol, te tama naigo nigali piksa elibo suai. Te masigi te Godigo bomo tiwai nigali. Te Godigo genuai nogi elalubao, agai nageba te nosali pedelabo nai dabede sę ola mawai. Te nade nago te suali nai dabede te sę te eno nagebolo wali po gilama te tiwai sę dolo mu pedelaibao,” Danielgo te po wai.

Kingo Danielba genuai nogi mawai

46 King Nebukatnesargo te Danielgo po odolama, tialima agai Daniel pąba kidu sugunama, tama te po weyu, te augwa tibo godiba ofa ebo tiwai me te denami ebo nai me te Danielba ofa yao po wali. 47 Tama kingo Danielba te tama po wali, “Mu tama dao, nago Godigo te gasa god tigidali aiyaba elaluai. Aga te tigidali kingo Genuai Bidi, tama agai te geme dualali nai page ola mabo bidi dao. Megi eno te koneai, magi baso meni, nago te geme dualaluali na page te hania hanilalio,” wali.

48 Tama kingo Daniel dąį ilama, te Babilon Provinsde polalubo tuni bidi nigali, tama aga te kingba wiegi yai homu mabo bidi tigidali tonalubo bos bidi nigilali. Tama me te kingo te wiegi yai homu pemene ilibo nai hauwa te Danielba menama, tama Daniel genuai nogi elaluai dao. 49 Kingo te Danielgo po wali pelama, tama te Satrak, me Mesak, me Abetnego, te augwali sa munama, te Babilon Provins tǫ pedai tonalubo sę mawai. Tama Daniel aga digi te kingo bede bidalio.

Copyright information for `MPS