Daniel 6

Augwaligo Daniel te laion dabe bidibo dedageba tula palali

Darius te king pedelama da, teda agai te 120 ofisa bidi nigilama, te augwaligo agai bulu tǫ pedai kantri dabe tonalumainu yalio. Tama agai Daniel me, gasa bidi si dali, te sela bidigo te ofisa dabe tonalumainu yali, me te kingo sę bidi dabego sę tonalumainu yai dao, te aga gavmango mone te olodali hagaidali weyu yali. Kingo suali, te Danielgo sę wiegi yai mu eyu, te ofisa dabego sę, me te aga dali deli sę ebo bidi sigo sę ebo te augwali agai aiyaba elaluali. Tama tibaso, kingo homugo agai Daniel te tigidali bulu tǫde te polalubo ofisa bidi nigilabo homu yalio. Tama tibaso, te gasa ofisa dabe me, te aga dali deli sę yali bidi sigo me, te tama homu yali, te hagela homu yai. Tama te augwaligo Danielgo te dwai sę meba ebo te sunumi gegebo sę yali, te augwaligo aga po tų ilainu tialio. Tiali goli, augwaligo te dwai sę me deli ebo gegebo usu isąwani, magi baso meni, Daniel te doloba pai bidi, tama agai sę te wiegi yai naga yai. Agai te tibo po me wasiąyu, te dolo isąwai kolesaga me ebeo. Tialima, augwa haside digi po miyu, te tiwai po wali, “Dago te Danielgo sę ebode te dwai sę ebo kolesaga gegebo usu egobeo, te dago aga po tų ilainu. Dago te aga Godibolo agai lotu wabo kolesagade suinao, tama te dago aga po tų ilabo sunumi gegebo homu ebo dao,” augwaligo te po wali.

Tama augwaligo te king sugi pelama, agabolo te po wali, “King Darius, nage bugagia sesemane sogo bidagameo,” wali. “Da tigidali ofisa te bulu tǫ kantride nago sę ebao, da te polalubo gavman ofisa dabe, me tigidali gasa ofisa, dago te po mia selama, te bomo yai po me deli muagameo wai. Dago homugo nago te we bidi dabeba te tiwai po omainu homu yai, te bidi sese deli olama, nogo si, te 30 dei wabo side usu nama, bidi me deligo te god me deliba, ma te bidi me deliba, gedu haluasa po me olamuo. Menio. Augwaligo te nageba naga gedu haluasa po omainao. Te mena bidi me deligo te po bolobaso da, teda nago aga te moni hasa laion dabe bidibo tǫ dedageba sąyu, tula palagameo wai dao. Tialima, king, nago te bidi dabeba walama, te bomo yai po te pepaba asęao olama, tama te nago nogi me asęao, te muani po dąų waliyu tiao, tama te tigidali we bidigo wali pomainu yaibao. Te bomai po te da Midia me Persia bagego bomai po me deli pedalaibao, tama te bidi me deligo hasegelimainu ebaso, usu me egobeo,” augwaligo te po wai. Te po odobaso, tama king Dariusgo te bidi dabego te po asęao wali, tama agai te aga nogi te pepade asęai dao.

10 Tama Danielgo te po dąų walali po odobo sogo, aga te aga beba hogodasa palio. Tama aga te ugwa badu elaluali be habu dai badu holama, tama te windo pąde kidu sugunama, te Jerusalemba tonono yalio. Tama agai te sesemane sogo gedu haluasa po weyu, te nage usu da po te Godiba wabo tiwai yali. Agai te deli deli sogo bubugade te gedu haluasa po sela sogo weyu yai dao. 11 Tialima, nosali te Daniel po tų ilainu yali te ofisa dabe, augwa hasi po mia selama, tama augwali te Danielgo beba polo pai, tama augwaligo te aga Godiba gedu haluasa po wabo suai. 12 Tama subaso, augwali kingba pelama, te tiwai po wali, “King o, nago te tama po wali, te 30 dei, te tama side te tigidali we bidigo nageba lotu po waiyąo po wai. Tama te augwaligo god me deliba, ma gasa bidiba, te lotu po obaso da, teda nago augwali te laion bidibo tǫ dedageba tula palaibao wai,” augwaligo kingbolo te po wai.

Tama kingo te po wai, “Te dolo po dao. Te muani po te boma pai mu elama, te hasegelabo usu isąwai, magi baso meni, te da Midia me Persia dabego dąų walali po dao,” te po wai.

13 Tialima, augwaligo kingba te tiwai po wai, “Daniel, te Juda hani bidi me deli, agai te nago po sela sąnama, tama nago te muani po wali me pabeo. Sesemane sogo agai te aga Godiba gedu haluasa po te sela sogo te deli bubugade weyu ebo dao,” te po wai. 14 Kingo te po odama, tama aga haliga sęgę mu ebaso, tama te Daniel tau sabo sunumi gegebo sę yalio. Aga homude te Daniel tau sabo sunumi gegebo sę bomo mu idubadi, te giliga dega sigulali, tiali goli aga te sunumi me deli gegebeo.

15 Te be pio igi pabode, te ofisa dabe te kingba ma begasa aselama, tama agabolo te tiwai po wagasali, “King, nago te da Midia me Persia dago ebo kolesaga koneani. Te kingo te po me deli dąų walai ebaso da, te dąų wali po me hasegeligobeo,” wali. 16 Tialima, kingo te gasa bidi dabebolo te Daniel sao po olama, tama aga te laion dabe bidibo tǫ dedageba tula palali. Tama agai Danielba te tiwai po wai, “Eno homugo te nago konealubo homu dąų mu olama, agaba sesemane sogo te lotu po udubo Godigo, agai nage tau somainao,” te po wai dao.

17 Augwaligo Daniel te tǫ dedageba tula palama, tama augwaligo te genuai sawali masigi me deli selama, tama te dedage pania palali. Tama king dali, te ofisa dabego dali, te augwa nogode elaluali ringo dąį te masigide ilama muani, te bidi dabego te Daniel tau siyu, te magi sę me idali weyu, te habu selali. 18 Nosali king te aga beba ma pali. Tama te sogo hulide aga te nai me tusiąma tama agai te we bidi dabe i olama, aga wiegi yai homu pemene ilagasomainu me ebeo. Tama me, te aga godege piabo ąǫ me ebeo. Mu menio.

19 Te kigamu digi mu king te hodaluama, te tǫ dedageba polo palio. 20 Te siligi pelama da, teda aga haliga sęgę mu elama, tama te tiwai i wali, “Daniel, nage te sesemane sogo bidibo Godigo sę bidi, odao. Nago te wali pelama, te agaba sesemane sogo lotu udubo God, agai te laion dabego pedauwali paniama, te nage gąų kelama tubewe, ma meniwe?” te po wai.

21 Tama Daniel te tǫ dedage tomode bidiyu, tama te tiwai po wei ponani, “King, eno homugo nage sesemane sogo sesabi elama bidao. 22 Godigo te aga mobo bidi ensel tagala palama, tama te laion dabe pedauwali paniama, tama augwaligo ena me dolobeo. Agai koneani, eno magi dwai sę me isiąwai, tama eno dwai kolesaga nageba me ebeo. Tama tibaso, agai ena tonalubo dao,” Danielgo te po wali.

23 King te wiegi yai homu pemene umabo mu eyu, tama te bidi dabeba weyu, te Daniel te tǫ dedagedu ugwaba kegao po wali. Augwaligo aga kegelama da, tama augwaligo te tiwai suali, te aga tigi me dolisiąwai elaluali, magi baso meni, agai konealubo po te Godiba dąų mu wai dao.

24 Tialima, kingo te Daniel po tų ilali bidi dabe augwali sao po olama, tama te augwali dali, te augwa we wai dabe dali, augwali te laion bidibo tǫ dedageba tula palalio. Augwali te tǫba tulalusiąbadi, te laion dabe posoga palama, tama augwali daboa sigulama, tama augwali tigi pepeda tulama, te mu dolai dao.

25 Tama nosali king Dariusgo te tigidali bulu tǫ pedai we bidi dabe, me te tigidali haniba, me tigidali haniani po wabo hani we bidi te pas asęna tolalio. Agai te tama po wai, “Dage tigidali te bugagia bidiąo,” wali. 26 “Dage eno bulu tǫ pedai kantri dabe we bidi dabeo, eno te po odiąo. Dage tigidaligo genuai nogi te Danielgo Godiba menama, tama te God dologoba pelama bidao. Te God te sesemane sogo bidada pobao. Aga te king sesemane sogo bidada pidu, bidada paibao, tama aga te we bidi tonalubo bomo te me siligobeo. 27 Agai te we bidi dabe dolainu ebo sogo te augwali ma sabo dao. Tama agai te tobage te genuai bomai sę te dagalude me tǫde ebao. Te Godigo te Daniel tonalu, tama te laion dabego aga me dolobeo,” te po wai dao.

28 Tama te Darius king bidali sogo, me te Sairus te Persia king bidali sogo me, Daniel te moni nogi yai genuai bidi mu pedelama, bidai dao.

Copyright information for `MPS