a[Ped 12:4]
d[Lu 1:19, 26]

Daniel 8

Te Danielgo nade te sipsip me meme suali

Te sela kibu be wabode te Belsasar king bidali side, eno te gasa nai te nade subo ąǫ yalio. Te nade polo tama ena pelama, te bulu tǫ pedai provins Elamba sabolama, tama ena te genuai taun Susa tomode dolaluali. Te taun te masigigo nigai genuai boma pai obo elaluali. Ena te moni ąį gamia nogi Ulai pąde dolaluai. Ena tonalubadi, te omai sipsip me deli te wę pąde dolalubo suali. Agai te gąų si elaluali. Te podolali kom gąų te bobobage yai elaluali, tiali goli te si wali kom gąų te polasa pedelali kom gąų nosali badu pedelai, tama te bobobage mu dao. Eno suali, te omai sipsipgo tobolu gąų aiyaba basi gulama, tama udulama peyu, te agai gąų komgo hudula palu ela palio. Aga te giliga degasa dulubo badu pali, tama te not badu me, saut badu me palio. Te niwai hasa me deligo aga paliabo usu me isąwai, tama te me deli agade wi painu ebo usu meni yai. Aga te sę dabe te aga homugo digi eyu, tama te boma pai mu pedelali.

Eno te yali sę pagede homu kone pidubadi, tama eno suali, te omai meme me deli te giliga dega sabo badu bidali tagalama, polo asobo suai. Aga udabo te umaboba pai mu asiyu, tama agai nogo sągągo te tǫ me dįąbe. Agai kom gąų te moni dobo dwai me deli naga te aga gedu page si badu tomode elaluai. Eno te wę pąde dolalubo suali sipsip te memego subo si da, teda te meme sębę eyu, te bomonama udabo bomo mu elama, te sipsip bidibo madi palio. Tama agai te sipsip dali hwįbo eno suali. Te memego wado mu dwai eyu, tama nogo sągą dili bomo dede pelama, tama dolo udayu, tama te omai sipsipba hudula paligi pali, tama agai gąų kom si togwa sąwani. Te omai sipsipgo aga degelabo bomo meni yani, tama te memego aga te tǫba aiya daboasa sąnama, tama aga dolagila mu agaga pali. Tama te magi nai me deligo te sipsip tau sabo usu me ebeo.

Tialima, nosali te memego hagoma umabo mu eyu, tama aga bomo ola mawai. Tiali goli, te aga bomo genuai mu pedalubo sogo, agai gąų kom te togwa palio. Tama te togwa pali kom elaluali pesagede te gasa kom me si me si pedelali. Te me si me si kom te moni dobo dwai mu yali. Te kom me deligo te not badu tonalubo tiwai yali, tama gasa mego te saut badu tonalubo tiwai yali, tama gasa mego te giliga pedalubo madiba tonalu, tama gasa mego te giliga dega sabo badu tonalu yalio. Tama gesi kom dwasianu te ni honu pedalubo tiwai eyu, te me si me si elaluali kom tomodu pedelali. Te gesi komgo bomo te genuai pedelai. Tama agai te saut badu, me giliga pedalubo badu, me te Godigo aga we bidiba te wiegi yai mani tǫde bidali we bidi dabe augwali aiyaba elalualio. 10 Te kom te boma pai mu pedelama, tama te hǫ dabe dali hwįani. Te hǫ dabego hwįani te dagalude ami bidi dabego hwįbo tiwai yali. Tama komgo te hǫ dabe meba te tǫba aiya tula palama, tama augwali agayalio. a  11 Tama te komgo te dagalu ami king me aiyaba elalueinu usu sali. Agai te kingba ofa ebo kolesaga te silimainu elama, tama agai te we bidigo te kingba lotu wabo be dolalio. 12 Te we bidi dabego dwai kolesaga ebaso, tama te komgo te dagalude ami bidi dabe aiyaba elaluabo bomo selama, tama te tigidali side ofa ebo kolesaga silainogo yali. Te Godigo po da, te mu po naga wali, tiali goli, te komgo te po begela dolali, te we bidi dabego wali pomainu me idali weyu tama tialio. Tama me, tigidali sę te komgo yainu homu yali, te agai eyu naga yali.

13 Tama eno odali, te ensel mobo bidi me deligo po wabo odali, tama gasa ensel bidigo te tiwai po agaba hanalu wali, “Megi dago te subo dwai nai dabe, nisu sogo augwali siligowe? Nisu sogo mu te we bidi dabego te Godiba ofa ebo ma gagalama eyu, tama nisu sogo te tigidali nai mu dolobo dwai kolesaga silaibawe? Nisu sogo te komgo bomo silama, tama agai munu ma te lotu wabo be me, te dagalude ami bidi dabe te agai sągągo agalu, te ma dologobewe?” 14 Tama te po miani enselgo, agai te tama po ena dali wali, “Te dwai sę ebo nai te elaludubadi, te umabo sogo, te 2,300, te sogoba usu naibao,” wali.
8:14Te Hibru pogo namba 2,300 elalubao wali. Te deli deli sogo bubugade usu nama, te dąį ilai baso da, teda agai te 2,300 side po olama dolo wali. Tiali goli, agai te tigidali side te kigamude me piode te ofa yabo bodolu mubaso da, teda agai te 1,150 po olama naga te po wali dao.
“Te tama bidibo side dabe te augwaligo ofa dabe te augwa polobadu yali tiwai te kigamu me pio me egobeo. Te side tama silama da, teda augwaligo te Godigo be ma dodolama, tama te ofa dabe ma yaibao,” po wali.

15 Ena te Daniel, eno te yali naba tonaluabo homu idubadi, tama eno te na page gegabo homu bomo yali. Tama polo tama te eno bidi me deli te ena pąde dolalubo suali.
8:15Te bidi aga te ensel Gebriel naga da, te ves 16 me 17 tede suao. Tiali goli, Danielgo homugo aga te gasa bidi deli tonobo tiwai yalio.


Ensel Gebrielgo te na page po pusali

16 Tama eno te bidi me deligo i wabo te ąį gamia Ulai tomode i weyu, te tama po wabo eno odali, “Ensel Gebriel, nago te Danielgo suali sę po page pusao,” wali. d  17 Tialima, Gebriel te ena pąba dolagasali, tama ena agade wi dwai mu elama, tama ena degasa dulama, tama eno gesabidi te tǫba aiya pogulai. Tama Gebrielgo enabolo te tama tiwai po wali, “Nage olo bidi tama da,” wali, “tiali goli, eno homugo nago te na page konemainu ebao. Te nade yali sę te tigidali dagalu dali, tǫ dali si silabo sogo pąde te pedalubo sę po te elaluali dao,” po wai. 18 Agai po odubadi yaide, ena gedu gęǫ page elama, tama ena tǫba mu degasa dulali. Tiali goli, agai ena nogo tola selama, te ena ugwaba sagolama, tama ena dolugulai. 19 Tama agai te po wai, “Eno nagebolo te Godigo haliga sębę yali silainu ebo sogo te pedelabo sę dabede po wainu ebao,” wali, “te Godigo dagalu de tǫde muani nai dabe silainu ebo bodolu muani sogo pąde te tama tiaibao. Te tiali sę dabe nago te nade suali sę tiwai mu pedelaibao,” wali.

20 “Nago te omai sipsip me deligo te gąų kom si elalubo suali. Te bulu tǫ kantri si, Midia me Persia sigo king bidi side po wai dao. 21 Tama nago te meme suali, te bulu tǫ kantri Grikde dąį iliyu wali, tama te aga gedu page si badu tomode elaluali te moni bage kom dolaluali, te Grik dabego hasia polalubo king bidi te da, wali. 22 Nago te moni bage kom togwa pabo suali, tama aga te pesagede gasa gesi kom me si me si pedelali. Te page e tiwai dao. Te kantri Grik te peda pelama, te gesi kantri me si me si pedelaibao. Tiali goli, te kantri bulu peda pisąbadi, te bomo elaluali, te tiwai gilama nosali me elalugobeo,” wali.

23 “Te bulu tǫ kantri dabe te tulaluainu ebo sogo, te augwali we bidigo dwai sęgę sabo sę mu pedalubaso, teda te sogo naga, te king me deli pedelaibao. Aga te bidi dwai mu dao. Aga te hagoma ebo bidi, tama tibo po wabo bidi dao. 24 Aga te bomai pedaliyu, tama te nai hauwa dolaibao wali, tiali goli te aga bomo digi egobeo. Tama agai homugo yainu ebo sę, te mu eyu naga yaibao. Agai te bomai bidi dabe doliyu, tama te Godigo we bidi dabe dolaibao. 25 Agai te we bidi dabe tibo po ola mabo sę ebo tomoba mu pabo bidi pedelama, tama aga te tibo po homu hauwa dogia pabo kolesaga tigidali te ugwanu mu igulaibao. Tama aga haligade digi, aga te polalubo bidi mu da homu yaibao. Te we bidi dabego homude augwali te bugagia bidiba homu yaibao, tiali goli te polo tama mu te aga homu hogodalu, te augwali hauwa dolaibao. Aga te hagoma eyu, te tigidali king aiyaba elaluali, te genuai King God dali hwįabo homu yaibao. Tama te sogo te mena bidi mego te aga me dologobeo, tiali goli te aga dolaibao. 26 Eno te pio ma kigamu ebo sę elalubo te na yali po page pusali. Te suali nai dabe te pedelaibao. Tiali goli, nago te na yali po gasa we bidi dabeba me pusugio, magi baso meni, te sę dabe te polo tama me pedalugobeo,” te genuai ensel bidi Gebrielgo enabolo te po wai.

27 Eno te po oda selama, tama ena haliga sęgę mu yali, tama meba sogode ena gasi tiwai yali. Gasi silama da, te ena hogodama, tama ena te king Belsasargo mani sęba ma palio. Tama te nade eno homu hauwa ebo sę yali, tiali goli eno te na page kuna koneabo usu meni yanio.

Copyright information for `MPS