a[Jer 25:11; 29:10]
b[Lu 1:19, 26]
g[Dan 11:31; Mt 24:15]

Daniel 9

Danielgo gedu haluasa po weyu, Godigo te Israel dabe tau somainu yai

Darius, te Serksisgo ogwa, aga te bulu tǫ kantri Midia bidi dao, tama aga te kantri Babilonde king pedelali. Te hasia kibu bede aga te king bidali, ena Daniel, eno te Godigo buku dabe nededuali. Tama eno te Genuai Bidigo te profet Jeremaiaba mani pode homu kone palali. Agai te po weyu, te Jerusalem dolama elalubadi, te kibu be bidi sese sela olama, te nogo si, te 70 yiaba usu naibao walio. a  Tialima, eno gedu haluasa po te God Genuai Bidiba wabo gagalali. Eno haliga hobede mu yali, tama eno nai munu me tusiąma, tama eno te homu dene ebo ugwa bea selama, tama sia keli eno tigide muani. Ena te tiwai bidiyu, tama eno gedu haluasa po bomonama te Genuai Bidiba wali. Tama eno te Israel we bidi dabego sęgę te Godiba pusali, eno Genuai Bidi da. Eno te tama po wali, “God, Genuai Bidi, nage polalubao, tama dago nago nogi ugwaba sobao. Sesemane sogo nago te naga da dali dąų walali po wali pai. Tama eyu, sesemane sogo te nage godolo elama, tama nago po wali pabo we bidi dabe te nago augwali godolo mu ebo dao,” wali.

“Da te dwai we bidi mu dao. Dago te sęgę sabo sę eyu, dwai sę nageba yai. Dago nago po sela sąyu, tama dago te nago dabolo yao wali te wiegi yai doloba pai kolesaga me isiąwai. Dago te nago sę bidi dabego po odisąwai, te augwali profet dabe. Augwaligo te nago po te king dabeba me, tobolu bidi dabeba me, te bulali wąį dabe me, te da tigidali we bidi dabeba te po pusali. Genuai Bidi, naga duba deligo naga te doloba pai kolesaga ebo God da, tiali goli te dena dwai kolesagago te hale genuai da tigidali Israelba sela asali. Tagala, da Judia tǫde bidibadi, ma Jerusalemde bidibadio, ma tigidali buluba te nago da tagala paliyu ela bilibo da, te dago nago po me sela sąbaso, nago da tagala palai dao. Tama megi te dwai halego da mesegelai dao.”

“Genuai Bidi, te dago king dabego me, tobolu bidi dabe me, dago wąį nǫų dabego dwai kolesaga elama, tama nageba dwai sęgę yai sę dabe nagebolo yai dao. Dago nago po sela sąwani, tiali goli nage te olo mu tau mabo wiegi yai kolesaga elalubo God, tama nago dago dwai sę yali sęgę sela sąbo dao. 10 God, Genuai Bidi, dago nago po odisąma, tama dago te nago homugo dago wali pomainu homu yali kolesaga te wali pisąwai, te nago dabolo te profet dabego pedauwalide wali po tiwai gilama, te nago sę bidi dabe dao. 11 Te bomai po dabe te Moses te nago sę bidigo dabolo mayu, nago bomai po te tiwai wali, dago te bomai po bugagia wali pisąbaso da, te nago dwai sę daba yaibao po wali. Tiali goli, da tigidali Israelgo nago te bomai po togoyu bolama, tama dago nago po odisąbo homu yalio. Dago dwai sę nageba ebaso, tama nago te wali po gilama te dabolo dwai dene mabo sę yai dao. 12 Nago te sę yaibao wali gilama tama te sę nago te dabolo me, dago tobolu bidi dabeba me yali. Nago te Jerusalemba te dwai sę mu elama, tama mu dolali. Te gasa taun me deli te Jerusalem taun dolali tiwai munu me ebeo. 13 Nago te Mosesgo bomai po tomode wali po gilama dago te sęgę tigidali sali. Tiali goli, megi me dago te sęgę sabo kolesaga me tagalisiąma, tama dago nageba hanalu, te dabolo bugai haliga yabo po me hanalusiąwai, tama dago nago mu po wali me pisąwai. 14 God, dago Genuai Bidi, nago te dago yali dwai sę wei ponainu sisi elama tonaluali. Tama megi da, te sę nago yalio, magi baso meni, nage te doloba pai kolesaga naga ebo God dao. Tiali goli, dago te nago po me odobeo.”

15 “God, te dago Genuai Bidi, te nago bomo te dabolo ola mayu, te da te bulu Isip kantride kalabus sę yali sogo, te nago da sela asali. Tama megi me, te gasa bulu tǫ kantri we bidi dabego nago te yali bomai sęde homu kone palama, tama augwaligo nageba genuai nogi mawai. Mu tama, dago dwai sę elama, tama dago dwai kolesaga hauwa yai dao. 16 Tama nago dago dwai sę, me dwai kolesaga dabe te dago wąį nǫų dabego me ebo sulama, tama nago dabolo dwai dene sabo menama, tama te taun Jerusalem dolali. Tama te Jerusalem pąde elaluali bulu tǫ kantri we bidi tigidali, augwaligo te Jerusalemba me, te nago we bidi dabolo me, posobo po weyu, gisugu mabo po wali. Tiali goli, megi te dago homugo te nago wado po te Jerusalemba munu ma wagi homu yali, magi baso meni, te nago taun da, tama te naga bulu dude digi ugwadu elalubao. Te polobadu nago da tau sabo wiegi yai sę hauwa yali, tama dago homugo nago te tiwai ma emainu homu ebo dao. 17 God, te eno gedu haluasa po me hanalubo po odao. Eno homugo te naga genuai nogide homu kone palama, tama te augwaligo dolali be te nago ma dodolabo homu yao. 18 God, te dago gela wabo odama, tama da suao. Te dade elalubo sęgę, me te naga taunde elalubo sęgę, suao. Da te doloba pai we bidigo tama dago nageba hanalubeo. Menio. Dago koneani, nage te homu dene eyu, olo tau sabo wiegi yai kolesaga elalubo God, tama tiyu dago nageba hanalu obao. 19 Genuai Bidi, dago gedu haluasa po wabo odama, tama dago sęgę sela sąyao. Genuai Bidi, dago wabo po polo odama, te da tau sao. Te taun Jerusalem dali, te we bidi dabe dali, te naga dao. Tama tiyu, te nago me tonalugio. Te naga genuai nogide homu kone palama, te da polo tau sao,” eno te tama gedu haluasa po wai.

Ensel Gebrielgo te profet Jeremaiago wali po page pusalio

20 Ena Daniel, eno gedu haluasa po odubadi, tama ena sęgę, me eno we bidi dabego sęgę, te hania pusubo sę yali, te Israel dabe dao. Tama eno Godiba hanalu wali, ena Genuai Bidi, te aga be te bulu dude ma sę emainu yali. 21 Eno gedu haluasa po odubadi, tama te ensel Gebriel, eno te hasia yali nade suali, te aga bola dulu, te ena bidibo pesageba asali. Tama te sogo, te dago polobadu iduali te pio ofa ebo sogo dao. b  22 Agai eno homu ula tega sawainu, tama agai te tama po wali, “Daniel, ena te nage homu ula tegelainu asalio, te nago wiegi yai homu kolesaga hauwa elalueibao. 23 Daniel, Godigo nage godolo mu ebao. Tama nago gedu haluasa po wabo gagalubo sogo, agai te po me deli pusali, te eno nageba magasu asali. Megi te nago olo bugagia munaluao, tama eno nago te nedali po page pusaibao,” ensel bidi Gebrielgo te po wai.

24 “Godigo dąį ilali te 70 taims 7 kibu be dabe silibo si, te agai nago we bidi dabe dali, me Jerusalem te wiegi yai ma ilabo po wali, tama aga taun dao.
9:24Profet Jeremaiago te tama po wai, te Israel bulu kantri tǫ dwai elaludubadi, te kibu be bidi sese sela olama, nogo si, te 70 yia bidaibao wali. Tiali goli, te vesde wali po te ensel mobo bidi Gebrielgo e tama po wai, te bidi sese sela olama, nogo si wabo te “70 kibu be,” te 70 kibu be po olama, te po dolo wabeo wali, te “Sarere 70” po da olama walio. Bidi hauwago te tama homu yali, “te Sarere” po wali te Hibru pode te kibu be a naga olama, me si, te tama olama dąį ilali. Tama tiyu, te 70 Sarere tede te 70 taims eyu da, te kibu be a naga me si teba ma te kibu be 490 dao. Tiali goli, bidi mebago te homu yali, te Hibru pogo te Sarere dabede te po dolo wali da, te homu yai. Tama te gasa bidi dabego homugo te nosali badu pedelabo nai dabede te olo po begelibo po naga wali homu yai, tama te dolo sogo mu me dąį ilibe homu yai dao.
Agai te tigidali we bidigo sęgę sela sąnama, tama augwa yali dwai kolesaga tigidali siminaibao. Tama agai te sesemane bidada pabo sogo pedalumainu ilaibao. Tama aga te Gasagi Yai Tedali Mu pesage me deli nigilaibao.
9:24Bidi mebago homugo dago te po begelina homu yali, “Te agaduba tedali habu selai bulu mu elalueibao,” te kolesagade, te “God aga digi te bidi me deli dąį ilaibao, te bidigo te wiegi yai doloba pai kolesaga yabo bidi dao.”
Godigo te sę dabe te nade wali sę me, te profet dabego wali po me, te usu nagasu, te tama yai dao.
25 Nago odama, te tiwai koneao, te Jerusalem taun ma gagalama nigaibao wabo po pedalubo sogo, te 7 taims 7-pela yia, te tama kibu be siliyu bolo yaibao, tialima te Godigo Sa Muani Genuai Bidi, aga te sabolaibao. Te augwaligo te Jerusalem dali, te taun tomode sunumi dabe, me te taun bagulali genuai masigi obo dabe, te ma nigaibao.
9:25 Bidi mebago homugo dago te vesde wali po te e tiwai begelinao homu yalio, “Nago odama, te tama koneao, te Jerusalem ma nigaibao weyu, te po ma pedalubo sogo da, te 7 taims 7 kibu be olama, te 62 taims te 7 kibu be te silibo si da, teda te Genuai Bidi Godigo Dąį Ilali Bidi pedelaibao. Te sogo tomode augwaligo te Jerusalem taun ma nigiyu, te taun tomode sunumi dabe me nigiyu, tama te taun bagulali genuai gamia dali te dodolama nigaibao. Tiali goli, te kibu be dabede te sęgę yabo sogo dao.”
Tama te Jerusalem elalubadi te 62 taims 7-pela yia, teba usu naibao, tiali goli te kibu be dabede te sęgę elalubo sogo dao.
26 Te 62 taims 7-pela yia wali, te silibo si da, teda augwaligo te Godigo Sa Munama Nigilali Genuai Bidi ela mubaso, tama aga nai deli me elalugobeo. Tama te bomai king me deligo genuai ami hani aselama, tama Jerusalem me Godigo be dali dolaibao. Te hwįnama dolobo sę me te genuai wę asiyu, te pobele bage daseasa soabo tiwai yaibao. Tama te genuai boi hwįbo te elalua pidubadi, te tigidali nai sia sabo sogoba usu nama, tama tigidali nai te Godigo wali po gilama te dolaibao. 27 Te kingo te dąų wabo bomai po te hauwa we bidi dali eyu, te agai po augwaligo wali pomainu yaibao. Tama te dąų wali po kontrak te elalua pidubadi, te kibu be a naga olama, me si teba usu naibao. Tama nosali te sela kibu be, me te kibu be pedai me badu siminigi pabo si da, teda agai te we bidi dabego te Godiba ebo tobage ofa tigidali te paliaibao. Tama te king bidi agai te dwai nai mu me deli te Godigo be pedu daide ugwadu munama, tama te doado bage me nai dabe dolabo dwai nai tede munaluyu, te Godigo te king dolabo sogo bodoluba usu nagasaibao,” ensel Gebrielgo te po wai dao.
9:27Te Hibru pogo te ves 27de wali po te kuna konesiąwai, tama bidi mebago te po gasa kolesagago begelibo sę yali.
,
g 

Copyright information for `MPS