a[Sai 12:1-20; Prs 23:5-8; Nam 28:16-25]
b[Prs 23:15-21; Nam 28:26-31]
c[Prs 23:33-36, 39-43; Nam 29:12-38]
d[Sai 23:6-8; Prs 19:15]
e[Sai 34:13]
f[Prs 26:1]

Deuteronomy 16

Te Genuai Bidi Godigo Israel dabe wiegi yai bidimainogo sula tagalali side te konebo sogo

(Sai 12:1-20)

Tama Mosesgo po geninama weyu, te po wali, “Te tigidali sogo kibu bede, te polua Abipde, teda dagego te Genuai Bidi Godigo dage Isipde bugagia bidimainogo sula tagalali te side sa muyu, nai ulama tuiąo. Tama dagego Genuai Bidi dago God agai nogi ugwaba siąo. Magi baso meni, polobadu me sogo hulide, te polua Abipde, agai dage Isip bulude oda sai dao. Dage te Genuai Bidigo deli sa muaibao te lotu wabo pesage deli, te pesageba pelama, tama te kau kibu deli o te sipsip kibu deli te dagego God dago Genuai Bidibolo ofa tiwai elama elao. Tama duga te Godigo dage bugagia bidimainogo sula tagalali, te Pasova nogi poai sogo, te hasa dabe me te nai dabe tuao. Dagego te nai tubo sogo, dagego yis dali ulai bret tulamuo. Te a naga olama si, te 7 tama sogo, dagego te yis meni yai bret tuao. Magi baso meni. Te polobadu dagego te Isip bulu taga soainogo aseąsa biliyu, dagego te yis meni yai bret tuai dao. Dagego te bret tubo da, teda dagego Isip bulude dodolama bidali me Isip bulu taga soali, te bodolu tigidali kibu be ma kone paliyu, tama te bret tuao, te dage isibo sogoba usu tama nao. Te a naga olama si, te 7 tama sogo, te Yis Meni Yai Genuai Sogo tomode, dagego be tomode te bret bo dabo nai yis elalubo habu mu dao. Tama te hasia wabo deide, dagego hasa dabe ofa ebo te tuao, tama hulide naga silao. Dagego kigamu tuabo me tagalamuo,” wali.

“Dagego te Godigo dage olo taga palali te bubuga kone paliyu, te eleba te hasa dabe Genuai Bidi agai dagebolo mawainogo ebo te hanu dabede elamo dao. Menio. Dagego te agai sa muani lotu po wabo te pesage delide naga elama, tama Genuai Bidibolo ofa yao, te giliga ibaba dega sabo sogo mu dao. Magi baso meni, dagego Isip bulu te giliga dega sabode taga soai dao. Dagego te hasa dabe te lotu wabo pesage delide naga uluyu tuiąo. Tama kigamu duga buluba ma piąo. Te a naga sogo olama deli, te 6 tama sogo naga dagego te yis meni yai bret tuiąo. Tama te dei namba 7, tede dagego God dago Genuai Bidiba lotu po wao. Tama te sogo te sę dabe ebo te habu mu dao,” Mosesgo te po wai. a 

Gide nai siyu, wiegi yai homu ebo genuai sogo

(Sai 34:22, Prs 23:15-21)

Tama Mosesgo po geninama weyu, te po wali, “Te dagego gide wit dabe sabo gagalobo sogo da, teda dagego te Sarere dabe nedebo gagalao. 10 Tama dagego te namba 7 wikde sabi simanobo sogo deli ma magi yao, te Genuai Bidi dago God agaba wiegi yai homu pemene yabo sogo. Tama dagego homugo tiao, Godigo dabolo te nai dabe hauwa mu mani dao homu yao. Tama tialima, duga homugo digi te nai meba bugulama, tama Genuai Bidibolo ofa tiwai mao. 11 Dage sese tama te lotu wabo pesage deliba pelama, tama Genuai Bidigo gedude dage wiegi yai homu pemene igi pao, te dage, me duga wai puluba, me duga sę ebo we bidi, me te Livai dabe, me te gasa bulu bidi dabe, me te wai dabe augwa aya isai dabe, me te we dabe augwa bidi isai dabe, dage te hanu dabede bidalubo bage, dage sese tama wiegi yai homu pemene iyąo. 12 Dagego dage te Isip bulude olo sę bidi dabe bidiyu yali kone palao. Tialima, dagego te bomai po dabe tigidali bugagia wali piąo,” Mosesgo te po wali. b 

Te osogo bidabo bede bidibo genuai sogo dabe po

(Prs 23:33-43)

13 Tama Mosesgo po geninama weyu, te po wali, “Dagego te wit bo sela sąyu, me dagego te wain du agalama, silama, nosali da, teda te osogo bidabo yano be, te bede olo bidibo genuai sogo dao. Tama te 7 dei wabode, 14 dage tigidali sese tama olo toma tuyu bidao, te dagego homu wiegi yai pemene eyu bidao. Te duga, me duga wai puluba, me duga sę bidi, me duga sę we dabe, me te Livai dabe, me te gasa bulu bidi dage dali bidibo, me te wai puluba augwa aya isai, me we augwa bidi isai wilawe we dabe, dage sese te hanu dabede bidalubo, te bage. 15 Dage sese tama te Godigo sa muaibao wali lotu wabo pesage delide dage te Genuai Bidi dago God agaba lotu po weyu, tama agai nogi ugwaba siyu yao. Dagego homugo tiao, ‘Genuai Bidigo dago gi me dago sę dabe sese tama wiegi yai ilai dao,’ te homu yao, tama dage wiegi yai homu pemene mu yao,” wali. c 

16 “Tama tialima, sela sogo deli kibu be tomode te duga hani bidi dabe dage naga te Genuai Bidiba lotu po wabo sa muani pesage deliba pelama, lotu weyu yao. Te sela sogo te e tama dao. Te Yis Meni Yai Bret Genuai Sogo, me te Gide Nai Siyu Wiegi Yai Homu Pemene Ebo Sogo, tama me te Osogo Bidabo Yano Bede Bidibo Genuai Sogo. Tama dage bidi deli deli nogo olo Genuai Bidigo geduba olo me aselamuo. 17 Menio. Dagego Genuai Bidibolo maiabo nai dabe sesao. Dagego te homu yao, ‘Godigo dabolo wiegi yai nai hauwa mani dao,’ te homu yao. Tama tialima, dagego te nai dabe meba bugulama, meba agabolo mao,” Mosesgo te po wali.

Po tų ebo kolesaga po

18 Tama Mosesgo po geninama weyu, te po wali, “Te dage hani deli deli tomode, dagego te jas me te ofisa dabe sa mumuna pao, te Genuai Bidi dago God agai dage mawainogo ebo te hanu dabede bida bida pabo, te bidi dabe. 19 Te bidi dabe augwaligo te po tų odobo kolesaga te doloba pai kolesagadu naga yao. Augwaligo te po tų ebo dolama, tama bidi meba naga tau selama, tama te bidi meba aiyaba me elaluamuo. Tama augwaligo te bidi mebago augwali nai momainogo me elamuo. Magi baso meni. Te bidi gugu po olama mabo te nai dabego te doloba pai bidi dabego kolesaga dolama, tama te wiegi yai homu kolesaga yai bidi dabe te po tų ebo sogo augwaligo te po tų eyu, po bugagia dodologobeo. d  20 Tigidali sogo dagego mu po naga olama, tama dagego doloba pai kolesaga naga te po tų ebode wali pao. Tama tiyu da, dage te Genuai Bidi dago Godigo mawainogo ebo te tǫde tigidali sogo wiegila bida bida peyu, bidaibao,” wali.

21 “Te dagego Genuai Bidi dago God agai alta nigibo sogo, dagego haniani ni pos togolama, tama te we god Aseraba lotu wabo pos dabe me tede bulamuo. e  22 Tama dagego te tibo god agaba lotu waboba te masigi du pos tede me bulamuo. Te tobage nai dabe te Genuai Bidi dago God agai gedude te dwai nai mu dao,” Mosesgo te po wai. f 

Copyright information for `MPS