a[Sai 22:20]
b[Nam 35:30; Bom 19:15; Mt 18:16; 2 Ko 13:1; 1 Ti 5:19; Hi 10:28]
c[1 Ko 5:13]
d[1 Sml 8:5]
e[1 Kin 10-28; 2 Sto 1:16; 9:28]
f[1 Kin 10:14-22, 27; 11:1-82; 2 Sto 1: 15; 9:27]

Deuteronomy 17

“Dagego te kau kibu o sipsip kibu te agai tigi dolai me selama, tama Genuai Bidi dago God agaba ofa me elamuo. Genuai Bidigo te tiwai nai mu godolo me egobeo,” wali, Mosesgo.

“Te me sogo te dage hani we bidi me deli aga te Genuai Bidigo dagebolo mani hanude bidibo bage, agai te Genuai Bidi dago Godigo te da dali dąų walali bomai po bogi paibao, tama te ebo kolesagago da, agai agade sęgę saibao. a  Teda agai Godigo bomai po sela sąnama, tama agai te tibo godiba lotu po waibao, te giligaba lotu weyu, o te poluaba lotu weyu, o te hǫba lotu weyu yaibao, tama agai te nai dabe wali peyu tiaibao. Tialima, dagego te tama kolesaga tiali po obaso da, teda dagego te po page bugagia gegelama suyu bolo yao. Tialima, te po mu tama elama, tama te dwai sę dage Israel dabe tomode pedalobaso da, teda dagego te we o bidi te hanu bulu badu odasa pelama, tama masigi aga tigiba sąnama, tama aga mu isilao. Tialima, te bidi sigo ma selago te we o te bidigo te dwai kolesaga ebo subaso da, teda dagego te we o te bidi elama, isilao. Ma, bidi deligo naga suai baso da, teda te we o bidi elama isilabo sunumi meni yaibao. Usugobeo. b  Te bidigo me o te wego te we o bidigo te dwai kolesaga ebo suali da, te we bidi augwa digi bolo masigi hasia te bidi tigiba sąnama, tama olo we bidigo nosali masigi te bidi tigiba sąmainao. Dagego te bidi elama isiliyu, dagego te dwai kolesaga dage tomode pedalali sela sąyu yao,” wali. c 

“Te me sogo te po sęgę genuai mu te hanude yaibao, tama te jas dabe te hanu dabede bidibo te bagego dodolobo usu egobeo. Te bidi dabe aga hasi boi bidi homu elama, me bidi ela muai baso, o te bidigo tǫ hagede o be hagede wado yai baso, o te bidi dabe aga hasi hwįnama, me bidigo tigi mu dolai baso. Tiali tama, te tobage nai dabe te jas dabego dodolobo usu isąbaso da, teda dage te lotu wabo pesage Genuai Bidi dago God agai sa muaiba, te pesage deliba naga pao. Tama dagego te Livai hani dabego pris dabebolo me te sogo te po tų ebo tonalubo te jas dabebolo hasia bolo pusao, tama augwaligo dagego po dodolomainao. 10 Augwaligo te po tų ebo kolesaga page sese tama pusaibao, te Genuai Bidigo sa muai bulude, tama dagego augwaligo wabo sę dabe sese tama wali piąo. 11 Dagego augwaligo te po dabe sese selama, tama augwaligo po sese tama wali pao, te augwaligo dagebolo mabo te po. 12 Ma, bidi mego te jas o te pris te Genuai Bidigo gedude sę ebo bidigo po sela sąwani da, teda dagego te bidi elama, isilao. Te tama tiyu, dagego te dwai kolesaga te Israel tomode sela sąyu yao. Po menio. 13 Tama tiyu da, te po te tigidali we bidigo odama, tama augwali wi elama, te gasa we bidi mebago te tobage dwai kolesaga me egobeo,” Mosesgo te po wali.

Te tuni bidigo ebo kolesaga po

14 Tama Mosesgo po geninama weyu, te po wali, “Dagego te Genuai Bidi dago God agai dagebolo mawainogo ebo te tǫ selama, tama dage te tǫde dualaluyu da, teda dagego homugo tiaibao, ‘Te tuni bidi te kingo da tonalumaina,’ te homu yaibao, ‘te gasa hani bidi dabego ebo tiwai inao,’ homu yaibao. d  15 Tialima, teda te sogo dagego Genuai Bidi aga digi te bidi me deli te king tuni bidi pedalomainogo sa mumainao. Dagego duga homugo me sa munamo dao, tama me ma duga hani bidi me deli te tuni bidi pedalomainogo yao. Dagego gasa hani bidi te tuni bidi nigimainogo sa mugio. 16 Te tuni bidi dolo siyu, tama agai ami bidigo hos kibu hauwa me selamo dao. Tama agai te bidi dabe te hos abelemainogo Isipba tagala palamuo. Magi baso meni, God Genuai Bidigo te po wai dao, ‘Eno we bidi te Isip buluba ma pelamuo,’ po wai dao. e  17 Te tuni bidi kingo we hauwa selamo dao. Magi baso meni, augwaligo agai Genuai Bidiba tudi ola momainogo yaibao. Tama me ma, agai gol me silva hauwa sabo sę elamuo wao. f  18 Te bidi aga tuni bidi king nigibo sogo, agai te Godigo bomai po asęai buku me deli e tiwai somainao. Agai te Livai pris dabego tonalubo bomai po elalubo buku nedama, tama aga nogogo digi te gasa bukude te bomai po asęao, tama te buku agade munolumainao. 19 Agai te buku aga pagede munama, tama agai te tigidali po page agai tede nedemainogo yao. Tama tiyu da, agai Godigo bomai po wali peyu, aga tigidali sogo Genuai Bidi dologode elaluyu, tama agai te bukude elalubo po dolo wali paibao. 20 Tama tialima, agai aga digi ugwaba siyu, tama agai meba Israel dabe aiyaba me elalugobeo. Tama me ma, agai te Genuai Bidigo dwasianu bomai po dabe me bolamuo. Tama dwagi yai kolesaga tama tiyu da, aga tuni bidi king kibu be hauwa sogo bidaibao. Tama nosali nosali me tuni bidi king aga hanide naga pedaliyu, iduaibao,” Mosesgo te po wali.

Copyright information for `MPS