a[Sai 23:4-5]
b[Prs 19:19]
c[Nam 15:37-41]
d[Sai 22:16-17]
e[Prs 18:8; 20:11; Bom 27:20]

Deuteronomy 22

“Tialima, me dagego te duga abagi mego kau kibu o sipsip kibu te aga obo tagalama, te olo bulu badu bilibo subaso da, teda dagego te tama bilimainogo sula tagaligio. Menio. Dagego te abagi aga pageba ma odasa pao. Tiali goli, te kau kibu o sipsip kibu aga ayago be digibulu elalubaso, o te dagego te kau kibu o sipsip kibugo aya dagego konesiąma ebaso da, te dagego duga dali beba odasa pao, tama nosali te kau kibu o sipsip kibu aga ayago gege asobaso da, agabolo ma magameo. Tama tialima, dagego duga abagigo te donki kibu o te ugwa dage dabe me, te mu tula pai te sunumide subaso da, te meba nai dabe me te tula pai subaso da, teda dagego te tiwai deli kolesaga naga yao,” Mosesgo te po wai.

“Te naga abagigo kau kibu o donki kibu te sunumide me tula muai me elalubaso da, teda dagego te tama elalumainogo sula tagaligio. Menio. Dagego te abagi tau selama, te abagigo te kau me donki ma hodolomainogo tau sao,” wali. a 

“Te we sibigo te bidi ogwago ugwa gudubo habu mu dao. Me, te bidi sibigo te we sibigo ugwa gudubo te habu mu dao. Genuai Bidi dago God agai te tobage kolesaga dabede dwai homu mu ebo dao. Mu tama dao.”

“Tialima, te ba kimi me te nide o tǫde aga gede pilamubaso da, o aga gǫų dabe dali bidibaso da, teda dagego te ba kimi me selamuo. Dagego te ba wai dabe naga sagameo. Tiali goli, dagego te ba kimi pomainogo tagalao. Tama tiyu da, dage e tǫde bobobage sogo bidama, tama Genuai Bidigo dage bugagia bidimainogo ilaibao,” wali.

“Te dagego gesi be me sę ebo sogo, dagego te be nigilama, te sawale yai pedu sesegede dagego dwasianu obo yao, te bidi me tula muidali weyu. Tama tiyu da, te obo elaluali goli, te bidi me tulaluyu, isilibaso da, teda dagego sęgę sogobeo, te page aga digi dao,” Mosesgo te po wali.

“Dagego te wain gide gasa meba olo nai dabe bulamo dao. Ma, dagego te gasa meba olo nai wai dabe me buliyu da, teda dagego te meba olo nai me, te wain du me, me selamo dao, te habu dao.”

10 “Dagego te kau kibu me donki si te deli gi tǫ elebo ain dagede bono gebelama, tama augwali si te gi tǫ elemainogo tagalamuo.”

11 “Dagego te sipsip kibu nisigo nigai hobi dali, te gasagi yai nisigo nigai hobi dali taluama, te gudubo ugwa nigigio,” wali. b 

12 “Dagego te duga name ugwa habu badu me si me side te au ilabo nai hobolao,” Mosesgo te po wali. c 

Te we bidi dabego te meda meni yai kolesaga naga yao

13 Tama Mosesgo po geninama weyu, te po wali, “Tialima, bidi me deligo we me deli selama, tama aga dali pagela pilama, tama nosali aga te we godolo ma isąma eyu da, 14 tama agai te webolo po olo dali kisilama, te we te gasa bidi mego penani yai te eno megi koneai dao po obaso da, 15 teda te wego aga ida ayago te wegigo te penani me yai menio olama, te sa munama me elaluali te nai selama, ola mao. Tama me agai hanu tomoba tula pabo sunumiba sela pao, te po tų ebo pesageba. 16 Tama te we aga ayago te tobolu bidi dabebolo e tama po walao, ‘Eno wegi te bidibolo tama menama, tama aga tama sai dao. Tiali goli, megi agai godolo ma ebeo. 17 Tama te bidigo te wegibolo ili po weyu te po wali, “Eno te sali goli, eno suali, te we te penani sę polobadu yai eno tamadi tama sualio,” po walio. Tiali goli, dagego suao, te name ugwago te wegi te penani sę me isąwai dao olama, te sa elaluali, te name ugwa e dao,’ po wao. Tama agai te ugwa te tobolu bidi dabego gesabidide tǫba mumainogo yao. 18 Tama tialima, te tobolu bidi dabego te wego bidi te bįgo elemainao. 19 Tama te bidigo te mone K1,000 tego te kot abelemainao, tama te mone te wegi aga ayago somainao, te aga ayabolo mao. Magi baso meni, te bidi agai te Israel we wiegi yai me deli hale ilai baso. Tama te we aga te bidigo we bidama, tama te bidi isiboba tama usu nigi pomainao. Te bidigo te me sela sąmainu me elamuo. Mu menio,” wali.

20 “Tiali goli, te po mu tama olama, tama augwaligo te we aga bugagia dolo bidai dao olama, augwalibolo ola maiabo nai meni baso da, 21 teda te we te tobolu bidi dabego te we aga ayago be sunumi bulu badu odasa pelama, tama aga te hanu page bidi dabe augwa digi te masigi sąnama, tama isibode tagalao. Agai te dwai hale yai sę te dago we bidi tomode te yali dao. Magi baso meni. Aga te aga bidigo sisąbadi, aga ayago bede bidiyu, te bidi me deli dali te penani yali dao. Tama tialima, dagego aga ela mubaso, te dwai kolesaga sela sąnama, silaibao,” Mosesgo te po wali.

22 “Tialima, dagego te bidi mego te gasa bidigo we dali pibo subaso da, teda te we de bidi si tama ela muao. Tama tialima, dagego te tama tiyu da, dagego te dage tomode elalubo dwai kolesaga ebo sela sąwaibao.”

23 “Tialima, dagego te bidi mego te wegi me te bidi mebolo odolai elalubadi, te bidi mego penani ebadi subaso da, 24 teda dagego augwali si te hanu bulu badu odasa pelama, masigigo elama, isilao, te augwali si isimainao. Te we aga te hanu pąde te gela wabo odabo pąde goli, tama agai augwaligo aga tau somainogo hae wasiąama ebaso da, teda aga isimainao. Te bidi me isimainao. Magi baso meni, agai te aga abagi mebolo odolai we penani yai baso. Te tama tiyu da, dagego te dage Israel tomode elaluali dwai kolesaga ebo sela sąwaibao,” wali.

25 “Tiali goli, te we me te bidigo sabo kegalubadi, tama aga te hanu pąde bidisąma ebadi, te bidi mego sulama, tama agai odasa pelama, tama agai te wegi penani sę yai baso da, teda augwaligo te bidi naga elama isilimainao. 26 Te kolesaga da, te bidi mego aga abagi me olo dali elama isilibo tiwai dao. Tiali goli, augwaligo te wegi dali te magi sę me deli elamuo. Magi baso meni, agai dwai sęgę me sabeo, te augwaligo aga elama isilabo page menio. 27 Te bidigo te hanu bulu badu mu bomonama eyu, te wegi dali penani yali dao. Tama te wegigo te bidi dabego aga tau somainogo hae wai goli, te bidi meni yalio, pąde me bidibeo,” Mosesgo te po wali.

28 “Tialima, dagego te wegi me te bidigo noma sisąwai olo bidai wegi dali te bidi mego bomonama penani yai baso da, 29 teda te bidigo te wegi aga ayabolo te mone 500 kina te we aga ayabolo menama, tama agai te we somainao. Magi baso meni. Te bidigo te wegi kegelama, aga dali te piali dao. Tama tialima, te we te bidigo we bidama, te bidi isibaso tama usu nao. Tama te bidigo te we me sela sąnamo dao. Mu menio.” d 

30 “Te me, te bidi mego aga ayago we dali penani sę me elamuo. Tiyu, augwaligo aga aya hale ilabuo,” Mosesgo te po wali. e 

Copyright information for `MPS