a[Sai 20:25]
b[Jos 8:30-32]
c[Bom 11: 29; Jos 8:33-35]
d[Sai 20:4; 34:17; Prs 19:4; 26:1; Bom 4:15-18; 5:8]
e[Bom 5:16]
f[Bom 19:14]
g[Prs 19:14]
h[Sai 22:21; 23:9; Prs 19:33-34; Bom 24:17-18]
i[Prs 18:8; 20:11; Bom 22:30]
j[Sai 22:19; Prs 18:23; 20:15]
k[Prs 18:9; 20:17]
l[Prs 18:17; 20:14]
m[Ga 3:10]

Deuteronomy 27

Mosesgo Israel dabe augwali augwa kolesaga yali dononama, wiegi yai pe me o dwai pe me saibao

(Dąį 27-30)

Augwaligo Godigo bomai po masigide asęao po wali

Tialima, Moses de Israel dabego tobolu bidi dabe, augwaligo te Israel we bidi dabebolo te po walali, “Dagego eno megi dagebolo mabo te po tigidali wali piąo. Te dage te Jordan wę nogelama, u badu Genuai Bidi dago God agai dagebolo mawaibao wali te tǫba saboligi pabo sogo da, teda dagego genuai masigi dabe selama, tama simenigo pilao, tama te bomai po dabe sese te simen daide aseąo, te dage te wiegi yai ili hauwa elalubo tǫba saboligi pabo sogo, te dago wąįgo Godigo dagebolo mawaibao wali te tǫ. Tama dage Jordan wę u badu saboligi pabo sogo da, teda dagego te masigi du dabe te bulu du Ebalde duadalao, tama te masigi du dabe te simengo mesesegele pao, te eno megi dagebolo wabo gilama. Tama dagego masigi meba selama, alta nigao. Tiali goli, te alta nigibo bagego te masigi aingo nigai hama haluyu, o togoyu elamo dao. Dagego te masigi augwaligo halisąma yai masigi selama, dagego te alta geselao, te Genuai Bidi dago Godigo alta. Tama te alta delide naga dagego te isigo dela silibo ofa yao, a  me te God dali haliga tigi deli ebo ofa me yao. Tama dagego te haliga tigi deli ebo te ofa ebo kibu mi te pesagede naga tuao, tama Genuai Bidi dago God agai gesabidide wiegi yai homu pemene iyąo. Tialima, dagego te masigide simenigo pilali te masigi dagede Godigo bomai po tigidali haninama, bugagia mu aseiąo,” wali. b 

Tama tialima, Moses te Livai hani pris bidi dabe dali augwali doligulama, te Israel dabebolo te po walali, “Dage tigidaligo odiąo. Olo bugagia eno po waboba muao. Megi da, dage Genuai Bidi dago Godigo we bidi mu te pedelali dao. 10 Tama tialima, dagego agai po wali piąo. Tama dagego agai bomai po eno megi dagebolo mabo, te po tigidali mu wali piąo,” wali.

Godigo po sela sąbo we bidi dolaibao

11 Tialima, Mosesgo Israel dabebolo te sogo ma walali, 12 “Dage Jordan wę nogelama, nosali te Godigo dage tigidali te wiegi yai ilabo po odainogo dage hani we bidi meba pelama, te Gerisim bulu duba dolalugi piąo. Te da, te Simeon hani, me Livai hani, me Juda hani, me Isakar hani, me Josep hani, Benjamin hani, tama tiao. c  13 Tama tialima, meba hani da, augwali te Ebal bulu dude dolo si dolaluaibao. Te da, te Ruben hani, me Gat hani, me Aser hani, me Sebulun hani, me Dan hani, me Naptali hani dao. Tama te Godigo po odobo sogo da, te hani bage augwaligo te po wali pisąbo bagede te dwai dolabo bomai po te po walaibao. 14 Tama te Livai dabego po bomonama weyu, e tama po deli deli te we bidi sesebolo weyu, tama te we bidigo te po deli deliba po wei ponaibao. 15 Te Livai dabego e tama wao, ‘Te bidi mego te tibo god te masigigo nigilama, ma te nigo nigilama, ma aingo nigilama, tama agai geme dualama, tama agai geme teba lotu po odubaso da, teda Godigo te bidi dolaibao. Te nai dabe da, te bidigo digi nigai nai dabe dao. Tama Godigo te tibo godiba lotu po wabo we bidi godolo ebo menio,’ wao. Tama te we bidi sesego te po wei ponoyu, e tama po waibao, ‘Te mu tama dao, Godigo te tama timainao,’ waibao.” d 

16 “Te Livai dabego ma weyu, tama wao, ‘Tialima, te bidi mego aga ida ayago nogi dolai baso da, teda Godigo te bidi dolomainao.’ Tama te we bidi sesego te po waibao, ‘Mu tama dao. Godigo te tama timainao.’” e 

17 “‘Tialima te bidi mego aga abagigo tǫ dąį poagasai baso da, teda Godigo te bidi dolaibao.’ Tama tigidali we bidigo te po waibao, ‘Te mu tama dao. Godigo te tama timainao.’” f 

18 “Te Livai dabego ma weyu, te po waibao, ‘Tialima, te bidi mego me gedu widai bidi kegasa pelama, tama aga sunumi dolo painogo isąma ebaso da, teda Godigo te tobage dwai sę ebo bidi dolomainao,’ waibao. Tama tigidali we bidigo te po waibao, ‘Te mu tama dao, Godigo te tama timainao.’” g 

19 “‘Tialima, te bidi mego dwai sę te gasa hani bidi dali me, o te augwa aya isai wai puluba dali me, o te wilawe we dabe dali me yai baso da, teda Godigo te bidi dolomainao.’ Tama tigidali we bidigo te po waibao, ‘Mu tama dao. Godigo te tama timainao.’” h 

20 “‘Te bidi mego aga ayago we dali dwai sę me yai baso da, teda Godigo te bidi dolaibao. Te tama tiali kolesagago aga aya hale dwai mu te ilali dao.’ Tama tigidali we bidigo te Livai dabego te po wei ponoyu te po waibao, ‘Mu tama dao, Godigo te tama timainao.’” i 

21 “‘Te bidi mego te hasa dabe me penani yai baso da, teda Godigo te bidi dolomainao,’ te Livai dagego te po waibao. Tama tigidali we bidigo te po wei ponaibao, ‘Mu tama dao, Godigo te tama timainao.’” j 

22 “‘Te bidi mego aga abe dali penani ebo sę yai baso da, Godigo te bidi dolomainao.’ Tama tigidali we bidigo te po waibao, ‘Mu tama dao. Godigo te bidi dolomainao.’” k 

23 “‘Te bidi mego aga au, te aga wego ida dali penani ebo sę yai baso da, teda Godigo te bidi dolomainao.’ Tama te we bidi tigidaligo te po waibao, ‘Mu tama dao. Godigo te tama timainao.’” l 

24 “‘Te bidi mego geme gasa bidi me elama, mu isilai baso da, teda Godigo te bidi dolomainao.’ Tama tigidali we bidigo te po wei ponoyu, te po waibao, ‘Mu tama dao, Godigo te bidi dolomainao.’”

25 “‘Te bidi mego te bidi me sęgę meni yai bidi ela muabo mone sai baso da, Godigo te bidi dolomainao.’ Tama tigidali we bidigo te po waibao, ‘Te mu tama dao, Godigo te bidi dolomainao.’”

26 “‘Te bidi mego Godigo bomai po wali pisąma yai baso da, teda Godigo te bidi dolomainao,’ te Livai dabego te po waibao. Tama te we bidi sesego te po wei ponoyu, te po wao, ‘Te mu tama dao. Godigo te bidi dolomainao,’ tama po wao,” Mosesgo te po wali. m 

Copyright information for `MPS