a[Sai 17:7; 28:30; Nam 20:13]

Deuteronomy 33

Mosesgo tigidali Israel dabe wiegi yai ilao olama hanalu wali

Te Moses te Godigo po pusubo bidi isabo sogo pąde ebaso, agai Godibolo Israel dabe dali wiegi yai sę yao po olama, tama hanalu wali. Agai te po wali,

“Genuai Bidi Sainai bulu dude bidama asali.
Aga te Idom bulu ugwadu te giliga tiwai asali,
tama agai ula te Paran bulu dude elaluali,
tama te ula aga we bidiba ula yali.
Te ensel sibi tausen hauwa aga dali bidali,
tama agai dolo nogo badu isi bogoli
genuai mu iduali.
Godigo aga we bidi godolo mu ebao,
tama agai augwali bugagia mu tonalubo dao.
Tama tialima, dago agaba kidu sugunama,
agaba tobolu basiliyu yao.
Tama dago agai bomai po wali pinao.
Ena Moses dao.
Eno te Godigo te bomai po dagebolo
mani dao, tama dago wali pinao.
Te bomai po da, te dago kantride polaluabo po mu dao.
Te Genuai Bidigo we bidi tigidali me,
augwali tobolu bidi dabe me, deliba sisinai dao.
Tama te sogo Genuai Bidi
te augwa tuni bidi king bidai dao.”

“Te Ruben hani te dwasianu hani dao.
Tiali goli, te hani munu me silamo dao.”

Tama Moses agai Juda hani kone
palama, agai te po wali,

“Genuai Bidi, nosali nago te Juda dabe
augwaligo augwali tau somainu i wabo odao.
Nago augwali ma odasa aselama,
meba hani dali sisinagasomainao.
Tama nago augwaligo
augwa boi bidi dabe dali hwįbode tau sao,” wali.

Tama agai Livai hani dabe kone palama, agai te po wali, a 

“Genuai Bidi, te Livai dabe te augwali
nago wiegi yai sę ebo bidi dabe dao.
Tama nago augwali te masigi si mani,
te nago homu kolesaga tiwai dabolo
ola maiabo masigi si.
Nago augwali te bulu Masade me
Meribade nago augwaligo kolesaga
usu selama, suai dao,
tama augwaligo kolesaga doloba pai
mu elalubo suai dao.
Augwaligo nago po me nago kontrak
dąų wali po wali pabo bomo elalubao.
Tama augwaligo augwa ida aya, me augwa ama dede,
me augwa wai bǫų dabego
homu kolesaga wali me pabeo.
Menio. Augwaligo te nago
homu kolesaga naga wali pai dao.
10 Tama augwaligo Israel dabego
nago bomai po wali pomainu ola mawaibao.
Tama augwaligo nago altade augwaligo
ofa dabe eyu yaibao.
11 Genuai Bidi, nago Livai dabe dali
wiegi yai homu elama,
tama nago augwali tau selama,
augwaligo sę bomo mu emainogo tau sao,
tama nago augwaligo ebo sęde
wiegi yai homu pemene yagameo.
Tama nago augwaligo boi bidi dabe sese
aiyaba agayagameo,
tama augwali munu me ma hodalogobeo,” wali.

12 Tama Moses aga Benjamin hani kone palama, agai te po wali,

“Genuai Bidigo Benjamin hani godolo mu elama,
agai tigidali sogo beasa bilibo dao.
Tama tigidali sogo aga augwali dali
pąde mu bidibo dao,” wali.

13 Tama agai Josep hani kone palama, agai te po wali,

“Genuai Bidigo Josep hanibolo
tulubage hauwa magameo.
14 Tama augwaligo tǫde wę hauwa ilimainao.
Tama Genuai Bidigo augwaligo gi wiegi yai iliyu,
tama giligago augwaligo gide
tigidali nai tau dabe bugagia mu
augwa side bugagia tau emainao.
15 Tama te polobadu bulu du dabe
te gi yabo pesage wiegi yai
bulu dabe pedalomainao.
16 Wiegi yai nai dabe te Josep hanigo
bulude hauwa mu pągąna pomainao,
te Josep hanigo tǫde.
Genuai Bidi te dwasianu ni me isi dabo digi bidama,
tama ena Mosesbolo te po wai dao,
agai te Josep hani dali wiegi yai sę yaibao po wai
dao. Magi baso meni.
Josep aga te aga ama dedego tobolu bidi bidai dao.
17 Te Josep hani augwali bomo elalubo,
te bulu uni kau kibugo tobolude
gąų holai tiwai elalubao.
Te Josepgo ogwa me Manase, te hani we bidi augwali
te kau kibugo tobolu gąų me deli tiwai dao.
Tama me te Josepgo gasa ogwa Efraim
aga we bidi hani tausen hauwa
te kau kibugo me tobolu gąų tiwai dao.
Tama te tobolu gąų sigo te gasa we bidi hani enebo dao,
tama augwali popogolo pelama,
te tǫ sabiba usu nigi paibao,” wali.

18 Tama Moses agai Sebulun hani me Isakar hani si kone palama te po wali,

“Sebulun hani, dagego gasa bulu
bidi dabe dali bisnis sę ebo wiegi yai pedalaibao.
Tama me Isakar hani augwaligo
augwa bulude ebo bisnis me wiegi yai pedalaibao.
19 Te bidi hani augwali sigo gasa
we bidi hani augwaligo
bulu duba sisinagasomainogo i waibao.
Tama augwaligo wiegi yai doloba pai ofa mu yaibao.
Tama augwaligo te bisnis sę augwaligo
te tamu ąįde sali nai dabede yaibao,
me te kemi sanede sali naigo me.
Tama augwaligo te bisnis sęde
augwaligo mone hauwa mu saibao,” wali.
20 Tama agai Gat hani kone elama, te po wali,
“Godigo Gat hanigo tǫ genuai pedalomainu ilai dao.
Te tama tialima, dage sesego
Godigo nogi ugwaba sagameo.
Te Gat hani te boma pai dao,
te laion te uni yowi te bulu hasa
ela tuainogo nogo guda sąbo
o tobolu wali me dagala sabo tiwai yaibao.
21 Te Israel hani tobolu bidi dabego tǫ
dobola sainogo sisinibo sogo,
te Gat hani augwa digi augwa sabo tǫ
genuai bage wiegi yai me dąį elama sali.
Te wiegi yai tǫ dage me deli te Gat hanigo sali.
Tama augwaligo Genuai Bidigo po me
bomai po bugagia wali pali,”
Mosesgo te po wali.

22 Tama Moses agai Dan hani homu kone elama te po wali,

“Dan hani te tamadi nisai laion yowi tiwai dao.
Agai te bulu Basan tagalama, sasamano asali,” wali.

23 Tama agai Naptali hani kone elama, te po wali,
“Genuai Bidigo nai wiegi yai hauwa
te Naptali hanibolo mani.
Te Galili sigi ąį augwaligo bulude elalubao.
Tiali goli, te tǫ te wę edelama,
ibanu pelama, ganama dao, te ąį u badu.”
24 Tama agai te Aser hani kone pelama,
agai te po wali,
“Genuai Bidigo te Aser hani dali
wiegi yai sę genina mu elama,
gasa meba hani augwali dali usu egobeo.
Tama me Israel hani dabego augwali
godolo umabo mu yaibao.
Tama te ni oliv augwaligo tǫde hauwa mu pedalama,
tama augwaligo te oliv wel hauwa mu saibao.
25 Tama augwaligo taun obo
sunumi dabe te boma pai ain
sunumi dabe elaluaibao.
Tama tibaso, tigidali sogo augwali bugagia mu bidiyu,
augwali wi me egobeo,” wali.

26 Tama Mosesgo te po wali,

“Israel dabe, dago God tiwai gasa god me menio.
Agai genuai bomo elaluyu,
tama genuai ula tomode bidiyu,
tama te dagalu pǫ daidu ugwadu asali, te da tau sainogo.
27 God Tigidali Sogo Bida Bida Pabo God dao,
aga te dago duala sabo pesage dao.
Tigidali sogo da aga nogogo tolaluyu,
tama agai da me tagalobo menio.
Dage te duga tǫ dabe sigi pabo sogo da,
agai te boi bidi dabe sela sąwaibao.
Tama dagebolo augwali sese elama,
isila sila po walaibao.
28 Tama tiyu da, te Jekopgo hani
augwali bugagia bidaluyu,
tama te boi bidi dabego augwaliba
me hwįagasogobeo.
Tama te pesagede te hulide
ąį segeni tulama, tama tǫ tedolama,
tama tubo nai dabe hauwa elama,
wain dabe me hauwa elaluaibao.
29 Te Israel dabe, dage wiegi yai
homu pemene mu yao.
Genuai Bidigo dage tau selama,
ma oda sali tiwai, agai gasa we bidi hani me
tau sai menio.
Genuai Bidi aga digi te dagego awa tiwai elama,
me dagego moni ge hwą tiwai dao.
Agai dage obo ela selama,
tama dagego wąbi hwįbode dagego gasa bidi dabe
elalumainu ilibo dao.
Dagego boi bidi dabe dageba aselama,
tama dagego augwali hobede emainogo dageba
gela wagasaibao.
Tiali goli, dagego augwali agalama,
tama augwali aiyaba elaluaibao,”
Mosesgo te po wai.

Copyright information for `MPS