Ecclesiastes 4

Te tobage dolo isąwai kolesagade eno homu kone ma palali, te tǫde we bidi augwaligo ebo kolesaga da.

Te dwai sę ebo bidi dabego te we bidi
hauwa aiyaba elalubaso,
tama te we bidi augwali dwai mu gela wali.
Tiali goli, augwali tau sabo bidi meni yai.
Magi baso meni, te dwai sę ebo bidi dabego
bomo hauwa elalubao.
Eno te tama homu yali,
te isali bidi dabe augwali da, te usu mu yalio.
Magi baso meni, augwali da, te sęgę meni ebao,
te da tǫde bidibo bidi dabego
sęgę sabo tiwai me ebo meni.
Tialima, e tǫde ame nisiąwani we bidi hani dabe,
augwali ugwanu ela holama, te isali bage dali,
te megi bidibo bage dali si aiyaba
elalubo dao. Magi baso meni,
augwaligo te bidi dabego dwai
kolesaga e tǫde ebo munu me subeo.

Tama me eno gasa kolesaga sualio. Te bidi dabe augwali sę dene mu elama, te tobage wiegi yai nai dabe nigibao. Tialima, te page e tiwai elalubao. Augwaligo homude te augwa abagi dabego genuai nogi elalu, te nai hauwa elaluba homu yali. Tama tibaso, augwaligo me te sę dene hauwa eyu, te abagi dabe augwali genuai nogi elalubo tiwai augwali me bidabo homu yali. Te wabo pabo homu kolesaga tiwai mu ebao, te bidigo wali nogogo tola sainu udabo tiwai gilama ebo dao. Te bidi dabe augwaligo te tiwai po obao,

Te bidi olo dugulalu, sę isąbo bidi da,
aga te wabo pabo bidi tiwai ebao.
Te agai bomo sia siyu, te aga isaibao.
Tialima, eno tama homu ebao,
ma, bidigo dwasianu nai elaluyu,
tama aga haliga nagamea pai eyu bidibaso da,
teda te bidi bugagia bidibao.
Tiali goli, te doado bage hauwa elalubo bidi,
aga tede moni homu eyu,
aga sę sesemane sogo bomonama
ebo bidi da, aga dwai bidibao.
Agai te wali nogogo tola sainu
ebo tiwai ebo dao. Te dwalio.

Eno te gasa page meni yai kolesaga me suali. Te kolesaga e tama tiwai elalubao.

Te yǫya pai bidi deli bidali.
Aga wai me, aga ama me meni yai,
tiali goli, sesemane sogo agai sę
naga ela pidubadi geani,
te aga dwasianu toma me nabeo.
Agai doado bage hauwa elaluali,
tialima te nai dabe aga usu meni homu yali.
Agai te tiwai homu ebeo,
“Magi baso ena odolali sę dene eyu,
te eno pemene meni ebawe?” te homu ebeo.
Te tobage bidigo kolesaga te hobedagia mu elalu,
te aga page meni yai elalubao.
Te bidi agaduba deli bidibaso, te wiegi yai me ebeo.
Te bidi si bidibaso, te wiegi yai da.
Te bidi si kisasa sę ebaso da,
teda augwali sigo sę te wiegi yai mu pedelaibao.

10 Ma, te bidi me deli te tulalubaso da,
teda gasa mego aga ugwaba
ma sagolobaso, usu yaibao.
Tialima, te bidi agaduba deli bidali bidi
te tulalubaso, te hobede mu ebao.
Te aga tau sabo bidi meni ebao.

11 Te augwali si kedau ebaso da,
teda augwa si deliba pageasa piao,
tama augwa si kedau me egobeo.
Tialima, te deli naga bidali da,
te magi elama aga digi aga tigi posolo ilaibawe?
12 Te boi bidigo deli dali hwįbaso,
te boi bidigo aga aiyaba elaluabo homu ebao.
Tiali goli, boi bidigo bidi si dali hwįbaso
te aga usu meni da homu yaibao.
Awe, te tiwai me, te augwaligo
dila pai hobi sela selama, te haliga tubaso da,
teda te haliga polo me togwa pogobeo.

13 Te magi nai meni yai bidi me deli, ma kalabus bidi me deli, te tobage bidi si te tǫ kantri pedai tonalubo bidi king pedelali. Tialima, te king monu dabe pedalubo sogo, te bidi dabego agaba te wiegi yai homu kolesaga momainu yali goli, agai augwaligo po odobeo. Teda aga dwai king dao. Me ma, te wiegi yai homu kolesaga elalubo gesi bidi, aga magi nai meni yai goli, te bidi agai te tobage monu dabe king bidi aiyaba elalubo dao.

15 Eno suali, te monu dabe king bidi isibaso da, te gesi ogwa bidigo agai pesage selama, te king pedelali. Tama te tigidali tǫ pedai we bidigo te gesi king bidi wali pai, te eno suali. 16 Agai te genuai hani we bidi mu tonaluai, te bidigo augwali nedabo usu meni yaibao. Tiali goli, aga te isiyu da, augwaligo te agai yali genuai sę dabe homu kone ma palogobeo. Te kolesaga me aga page meni yai elalubao, te bidi udulama, te wali tola sigi painu ebo tiwai ebo dao.

Copyright information for `MPS