Ecclesiastes 6

Bidabo ulade page me elalubeo

Eno suali, te kolesaga dwai me deligo te genuai sęgę te tǫde bidi dabe augwaliba mobao. Te kolesaga e tiwai dao. Godigo te genuai nogi, me te mone doado bage hauwa te bidibolo mawaibao, tama te bidi aga godolo ebo nai me deli agade me sǫą pogobeo. Tiali goli, Godigo te bidi aga te nai dabede wiegi yai pemene emainu sula tagalobeo. Tama nosali, te gasa hani bidi me deligo te nai dabe saibao, tama aga te naide wiegi yai pemene dogia paibao. Te tebo kolesaga te dwai mu elama, te aga page meni yai mu elalubao. Te bidi me deligo wai dabe te bidi sese a naga, te 100 elaluali bidi te kibu be hauwa bidali. Tiali goli, aga wiegi yai doado bagede wiegi yai pemene isąyu, tama te aga isibo sogo augwaligo aga bugagia me pubalusiąyu da, teda te dwai mu yali. Eno mu po tama obao, te wai bǫų me deli aga idago haligade isali waigo, agai te bidi aiyaba elalualio, te bidi te umabo hauwa kibu be te tǫde bidali digi tagalao. Te tobage wai da, te olo nai tiwai da, aga nogi menio, te augwaligo aga pubulali sogo, augwaligo aga homu kone ma ebeo. Te wai bǫųgo te giliga ula me subeo, te mena nai me deli agai me konebeo. Tiali goli, megi aga bugagia toma neyu bidibao, tialima te waigo dugulalubo pagego te nai doado bage hauwa elaluali bidigo dugulalubo page agai aiyaba elaluali. Magi baso meni, te bidi agai aga te nai doado bagede wiegi yai pemene homu menisąwai. Te bidigo kibu be te bidi sese umabo, te 1,000, ma 2,000 kibu be bidali goli, agai te wai bǫų aiyaba me elalubeo. Da tigidali isilama, te bulu deli naga paibao, te mu da, agawe?

Dago nai tuabo homu elama, te dago sesemane sogo sę ebo dao. Tialima, dago te sela tubo naigo, te dago godolo yali homuba me usu nugu pogobeo. Magi baso te kolesaga koneani bidigo te kolesaga konesiąwai bidi aiyaba elalubo dawe? Te magi nai meni yai bidigo wiegi yai kolesaga te we bidi augwaligo gedude ebaso da, teda tego aga magi elama tau saibawe? Te dago dena elalubo naide dwagi yai homu pemene eyu bidao. Te kolesaga ebogo te haniani naide pesą ebo kolesaga aiyaba elalubo dao. Te naide pesą ebo kolesaga aga page me elalubeo, te bidi udayu, te wali nogogo tola sainu ebo tiwai naga ebao. Te dago sali nai dabede wiegi yai homu pemene ebaso, usu yaibao. 10 Tigidali nai pedalubo, te odolali me pedalubeo. Menio. Polobadu mu Godigo po weyu, te augwali pedelao wali gilama, te augwali pedalubo sę ebao. Te Godigo da bidigo kolesaga koneanio. Tibaso, dago aga dali konila po me wagobeo. Magi baso meni, te agai bomogo dago bomo aiyaba elaluai dao. 11 Dago bobobage po wabosi, te tagalao, te usugobeo, dago aga aiyaba elalugobeo. Dago po olo tama waibao, tama tebogo da tau mu sogobeo. 12 Da bidi te pęwadage sogo naga te tǫde bidibao, te ni noma elaluali te pǫgo giliga ge sesela sąbo si te polo menia sabo tiwai ebao. Te dago bidibo ulago page meni yai elalubao. Tialima, mena wiegi yai kolesaga dago wali pabo usu yabo te dego koneaibawe? Te da isai madigi, te magi nai mu e tǫde pedelabo dego mu koneaibawe?

Copyright information for `MPS