b[2 Kin 24:10-16; 2 Sto 36:10]

Esther 2

Esta te gavman tuni we kwin nigali

Nosali te gavman tuni bidi kingo wado po wali silama da, teda agai te gavman tuni we Vastigo agabolo yali kolesaga te agai homugo ma kone yagasalio. Agai te kwin we Vasti sela sąnama, te kwin we ma bidigobeo wali po te homugo ma kone yagasalio. Tama te king tau sabo bidi mebago agabolo te dwagi yai kolesaga ola mani, augwali te aga pąba duagi pelama, agabolo tama po wai, “Te nago gasa sawi yai wegi meba gegao,” te po wai. “Nago te naga tonalubo tigidali hanu bidi dabe augwali sa munama, tama augwaligo te sawi wiegi yai te wegi dabe te gavmango polalubo hanu, te Susaba odasa asomainu yao, tama nago te we dabe sisinibo beba sisinama muao. Te nago we dabe sibi tonalubo bidi, te Hegai, agai te augwali tonalumainu yao.
2:3Te bidi da, te tuni bidigo we dabe tonalubo bidi dao. Te gavman tuni bidi Serksis te king bidi bidibo sogo, te king bidi dabe te we dabe hauwa siyu, te we hani si me sai. Augwali te we sibi mubo beba munama, tama te sę ebo bidi mebago augwali tonaluali. Tiali goli, augwaligo te bidi domo dinama, te augwaligo te we dabe penani ebo usu isiąmainu yalio.
Tama te we dabe augwa tigide wel mubadi, te augwa tigi gasa sawi yai mu pedalumainu au ilaibao.
Tialima, te we dabe augwalide te me deli nago aga godolo mu eyu da, nago aga te gavman tuni we kwin nigilama, agai te kwin bidali we Vasti bidali pesage agai somainu yaibao,” te king tau sabo bidi mebago agabolo te po wai. Te king bidigo odama, tama agai te dwagi yai po da te homu yai, tama agai te po wali pai.

Te gavmango moni hanu Susade te Juda bidi me deli bidai, te aga nogi Mordekai. Te aga Jairgo ogwa dao, tama Kis de Simei dali sigo hani, te Benjamin genuai hani dao. Polobadu te Babilon tǫ gavman tuni bidi king Nebukatnesargo te Juda gavman tuni bidi Jehoiakin me, te Juda dabe meba dali selama, tama augwali te tǫ Babilon teba kalabus igi pai. Tama agai te Mordekai augwali dali sela pai. b  Mordekaigo aga hai wegi me deli elaluali, aga nogi Esta. Tiali goli, aga nogi mu Hibru pogo te Hadasa wai. Te Esta aga aya ida isali sogo, te Mordekaigo te Esta selama, tama aga wai negebo tiwai gilama mu yalio. Tama Esta te gasa sawia yai wegi mu, tama aga tonobo te gasagi yai sawi wegi mu bidalio.

Tama te king bidi Serksisgo po te we bidi augwaliba tolali. Tama augwaligo te tigidali buludu te sawi yai wegi dabe te moni taun Susaba odasa asobo sogo, augwaligo te Esta me augwali dali odasa asalio. Augwaligo te we dabe sibi te gavman tuni bidigo be bagulali obo te we dabe sibi mubo be tomoba te we Esta teba muai. Tama Hegaigo te we dabe augwali tonaluali. Hegaigo Esta te wiegi yai sawi yai wegi da te homu elama, tama aga godolo yai. Tama polo agai Estabolo te tigi au yabo doado bage me, te gasa dwagi yai nai dabe mani. Tama agai te we dabe sibi bidibo be te dwagi yai polalubo dąį togwali mu te Estabolo menama, tama te tuni bidigo bede te wegi ogwa a naga olama, me badu nogo si te augwaligo Esta bugagia tonalumainu nigilai.

10 Hasia Mordekaigo Estabolo po weyu, aga te Juda we da po olamuo, te po wali. Tama Estago te aga tonalubo ayago po wali palio. 11 Tigidali side Mordekai te we dabe bidibo obo sunumidu ugwa soyu, eda soyu iduali. Te Esta mena tama bidibowe naga koneainu, tama me te Estabolo augwaligo magi sę ebowe, te koneainogo yali.

12 Augwaligo te we dabe wiegi yai sawi yai mu ilabo sę idubadi, te kibu be deli usu nanio. Te polua a naga me deli tama poluade augwaligo te ni mea kanemego nigai weligo te augwali tigide pilali. Te gasa 6 wabo poluade augwaligo te wel me te denami yai ili daligo te augwali tigide pilai. Te sę silibo si, nosali augwaligo te gesi wegimani deli deli te king Serksis bidibo madi odasa pai. 13 Te wego aga homugo digi te au dobage munama, te tuni bidigo beba pomainu yai. 14 We te tuni bidigo beba pio mu pelama, tama bididubadi, kigamuba usu nagasai. Tama kigamu augwaligo aga selama, te gasa we dabe bidibo beba sela pelama, tama aga te tuni bidigo si wali we hani tonalubo bidi, Sasgasgo nogoba mugi paibao. Tama te we te king bidigo beba munu ma pogobeo. Te king bidigo aga godolo eyu, tama aga i obaso da, teda aga te kingba ma pomainao. Te gasa sunumi me elalubeo.

15 Megi da, te Estago te king bidi sugi pabo sogo bodolu te pedelai. Esta aga te Abihailgo wegi, tama Mordekaigo hai dao. Mordekaigo Esta aga selama, tama aga wai bǫų negebo tiwai gilama yai. Tigidali bidigo Esta sulama godolo ebaso, tama augwali agade mu tulaluai. Tama agai te tuni bidi sugi painu ebo sogo gudali ugwa, te we dabe sibi tonalubo bidi Hegaigo te nogo tų ilali ugwa gudali. Agai te gasa ugwa me gudubeo. 16 Te sogo te king Serksis te tuni bidi bidali te 7 kibu be bidai. Tama te kibu bede te polua nogo si, te polua nogi augwaligo Tebet nogi yali, te poluade augwaligo Esta te king bidi bidibo digi odasa pai.
2:16Te Hibru pogo te polua nogi Tebet, te dago te polua Disemba dali Janueri dali nogi wabo.


17 Tama king bidigo aga godolo mu yali. Tuni bidigo te gasa we dabe godolo ebo usu tiwai gilama te Esta godolo ebeo. Agai homugo Estago augwali aiyaba elaluali homu elama, tama gasa sawi yai we mu dao. Te king bidigo Esta sulama, tama agade mu tulaluai. Tama tibaso, te king bidigo te tuni wego au yai madi te aga toboluba muani. Tama Estago te tuni we Vasti hasegelama, tama aga te gavman tuni we kwin pedelai. 18 Tialima, te king bidigo te dwagi yai homu pemene Estabolo eyu, te genuai nai daa tuaibao wali. Agai te tigidali tobolu bidi badi, te polalubo kiap dabe badi, augwali te genuai nai daa tuboba asomainu i wai. Agai te po wai, “Tigidali eno tonalubo bulude bidibo we bidi tigidali, augwali te e side toma nomainu yao,” te po wai. Tama tuni bidigo wiegi yai nai hauwa te we bidi augwalibolo olo manio, dwasianu nai mabe.

Mordekaigo tuni bidi tau saligo, tama tuni bidi dolabo sęgo geda muanio

19 Te sogo naga, tuni bidigo Mordekai te aga be tonalubo bidi me deli nigilali. 20 Polobadu Mordekaigo Estabolo te po weyu, aga te Juda we da po munu me olamuo po wali. Tama Estago te po wali pali, magi basowe, te aga Mordekaigo po sesemane sogo wali pabo kolesaga yalio. 21 Te Mordekaigo te king Serksisgo sę tuali sogo, te bidi sigo te tuni bidi dali wado yabo homu elaluali, tama augwali sigo aga ela muabo po miani. Te bidi si nogi Biktana de Teres si dao. Te bidi sigo te gavman tuni bidi kingo be dąį togwali sunumi tonalubo sę elaluai. 22 Tama Mordekaigo augwali sigo po odama, tama agai te gavman tuni nigali we Estabolo te po wai. Nosali Estago te king bidibolo te po Mordekaigo te bidi sigo wabo odali po pusai. 23 Augwaligo te po page gegelama, tama augwaligo koneani, te mu po da wai. Tama tibaso, augwaligo te bidi si te ni pedaide walama, tama augwali si isali. Nosali king bidigo te po wai, “Te tiali po te dago dena gavmanigo hasia yali sę po buku, te bukude te po asęao,” wali. Tialima, augwaligo tama tiwai yalio.

Copyright information for `MPS