Esther 5

Estago te king bidi de Haman augwali si te genuai nai daa tuboba asabo po hanalu wai

Estago osogo nai sela sogo gisilama bidai. Tama sela wabo side, agai te kwin tuni wego gudubo ugwa munama, tama tuni bidi kingo be obo tomoba pelama, dologi pali, te tuni bidigo genuai dąį togwali be habu pąde teba dologi pelama, tama te tuni bidi dulalubo saiba tonono yali. Tuni bidi te saide dulalu, tama sunumiba tonono yai. Te kingo Esta te be habu bulu badu dolalubo sulama, tama aga homu dwagi yai Estabolo elama, tama aga te king bidigo gol dono tolalubo nogo dodolali. Tialima, Esta te pąba aselama, tama te dono sesege badu nogogo dia yanio. Tama king bidigo te po wali, “Kwin Esta, nago magi nai godolo ebawe? Nago homugo eno te genuai tǫ pedai te si bugulama, te me deli nagebolo momainu homu usu ebo wida, teda eno nagebolo mawaibao,” wali.

Tama Estago te tiwai po wei ponani, “King bidio, te Haman dage si te genuai nai daa tubo madi megi e sogo hulide eno beba asobo usu egowe?” Te po wai.

King bidigo te po usu da olama, tama agai Haman polo asao po olama, te augwali si Esta bidibo madi painu yai. Tama king bidi de Haman si te Estago genuai nai daa tubo sisi ilali madi pai dao. Augwali te bomai ąį wain tuyu, bidaluyu, tama king bidigo Estabolo hanalu wali, “Te nago mena nai godolo ebo te eno nagebolo momainu te enabolo po wao. Te nago enabolo hanalubo nai tigidali te eno nagebolo awe naga waibao. Te nago eno tonalubo tǫ pedai me badu sainogo homu ebaso da, teda eno nagebolo menama, tama nago tonaluagameo.” Tuni bidigo Estabolo te po wai.

Tialima, Estago tuni bidibolo te tiwai po wei ponani, “Tuni bidio, te nago eno hanalubo po tigidali awe po waibao homu ebaso da, teda nage me Haman dage si te do gasa nai eno dage sibolo sisi ilibo madi do ma asao. Te sogo eno nagebolo eno homude elalubo po waibao,” Estago te po wai.

Hamango Mordekai elabo po minama, dąų wai

Te Hamango te nai daa tuali be habu taga soyu, tama aga wiegi yai homu pemene me dwagi yai homu mu ebadi yai. Aga peyu, suali, tama Mordekai te tuni bidigo be sunumi pąde dulalubo suali. Tiali goli, Mordekaigo aga sulama, tama aga dolugulama, agabolo siade da po wabeo. Tama tibaso, Haman haliga sębę dwai mu yali. 10 Te Hamango haliga sębę mu geninama yali, tiali goli aga homude digi pania selama, tama magi sę me deli ebeo. Aga pelama, sabolama, tama aga abagi dede dabe i ola sisinama, tama aga we Seresbolo me hanaluyu, augwali dali dualama bidali. 11 Augwali sabola silibode, tama augwaligo gedude Hamango aga digi aga nogi ugwaba sali. Agai augwalibolo weyu, agai mone hauwa badi, te doado bage hauwa elalubo da po wai, tama aga ogwa me hauwa elalubo po wali. Tama te tuni bidigo genuai nogi me genuai sę mu agabolo mayu, tama te tuni bidigo sę tonalubo gasa ofisa bidi dabe tigidali te aga dologode bidibo da, po walio. 12 Tama Hamango po ma weyu, te po wai, “Te kwin we Estago te genuai nai daa te tuni bidi de ena dali, da si naga te nai daa tuboba asao wai. Agai gasa bidi me asao olama i me wabeo, mu menio. Tama agai te po wai, te da si aga dali do ma nai tugi paibao po wali. 13 Tiali goli, eno te Juda bidi Mordekai suali, te tuni bidigo be sunumi pąde dulalubaso, tama eno homu dwai mu yali, tama te wiegi yai nai dabe te eno homugo te olo nai tiwai naga yalio,” te po wai.

14 Aga we Seres badi, te aga abagi dede augwaligo agabolo te po wai, “Moni homu me igio. Te bidi dabe augwalibolo olama, augwaligo te ni bobobage me deli tulao, te aga bobobage usu nama nedebo, te bidi sese tama 20 mita, tama do kigamu nage te tuni bidi bidibo madi pelama, te Mordekai te nide walabo po hanalugi pagameo. Te tiwai eyu da, te nage homu wiegi yai elama, te nage nai tugi paibao,” wali. Hamango te wiegi yai po da te homu yai, tama agai te bidi dabe mebabolo olama, tama augwaligo te Mordekai walabo ni me deli tulai dao.

Copyright information for `MPS