a[Est 2:21-22]

Esther 6

Tuni bidigo genuai nogi Mordekaibolo mawai

Te sogo hulide digi, te king bidi aga godege bugagia piabo ąǫ ebeo. Tama agai augwalibolo po olama, augwaligo agai te tonalubo tǫ pedaide ebo po tigidali asębo te buku sesao po wali, tama augwaligo po meba te bukude asęani nedainogo tialio. Augwaligo te Biktana de Teres sigo yali po me deli nedai, te king bidigo be habu tonaluali bidi si dao. Polobadu te bidi sigo te tuni bidi elabo tų gegali po wai. Nosali Mordekaigo augwali sigo homude te po gegelama koneani, mu tama yaibaso, tama te bidi si po tų ilali. a  Tama king bidigo te po wali, “Dago mena dwagi yai sę Mordekaigo te yali sęde yaliwe?” Tama te bidi dabe augwaligo agabolo te po wai, “Dago magi nai agabolo me deli mawai menio,” wali. Tialima, king bidigo augwalibolo hanalu wali, “Te eno sę tonalubo bidi ofisa bidi meba te bede bidibowe, ma meniwe?” Tama te po obadi, megi naga tama Hamango te tuni bidibolo hanalu wainu asali, te agai sisi ilali nide te Mordekai walainogo hanalu wagasali. Tama Haman aga digi te tuni bidigo be obo tomoba solama, asalio.

Te sę ebo bidi dabe augwaligo aga soabo sulama, tama augwaligo te king bidibolo wali, “Haman aselama, tama tonalubao. Agai nage suainu ebo.” Tama king bidigo te po wali, “Aga e be tomoba odasa asao,” po wai. Tialima, Haman te be tomoba asobode, king bidigo agabolo te po wai, “Te bidi me deli bidibo bidi agabolo eno te genuai nogi mawainogo ebao. Te eno mena wiegi yai sę agabolo yabo te eno konebe. Nago homugo eno magi sę emainogowe?” wali.

Tama Haman agade digi te tiwai homu yai, “Te tuni bidigo te sę debolo egowe?” te homu yai. “Te gasa bidi me meni, enabolo naga yaibao.”
Tama Hamango tuni bidibolo po wei ponoyu, te po wai, “Naga mubo ugwago digi sela asama, tama te bidiba muao. Tama sadel me te hos bono baklaingo bugagia au ilama, tama naga hosba digi dualao. Tama hosgo tobolu me, mage dali, au ilao. Tama naga polalubo tobolu bidi me deli nigilama, teda nago ugwago te bidi aga au ilaibao. Tama te bidi te hosde dualama, tama te tobolu bidigo aga te bidi sisinibo genuai pesage te hanuba odasa pomainu yao. Tialima, te augwali si pabo sogo, te tobolu bidigo te tiwai i wao, ‘Te bidi suao. King bidigo genuai nogi agabolo mawai. Te wiegi yai sę tuni bidigo agabolo yali,’ po waibao,” Hamango te po wai.

10 Te king bidigo te po odama, tama Hamanbolo te po wai, “Nage polo pelama, te gudabo ugwa me, hos me selama, tama eno sę ebo bidi Mordekaibolo genuai nogi mao, te Juda bidi dao, te aga eno be sunumi pąde sę idu bidai. Te tigidali sę nago megi wali po gilama yao,” wali.

11 Tama Hamango te ugwa de hos dali si selama, tama agai te ugwa Mordekaibolo muani. Tama Mordekai te hosde dualama, tama Hamango aga te bidi sisinibo pesage hanuba odasa pai. Te augwali si pidu digi, te Hamango te tiwai po i olama, augwalibolo wai, “Te bidi suao! Te king bidigo genuai nogi agabolo mawainogo ebao. Tama agai te wiegi yai kolesaga agabolo yai dao,” tama wai.

12 Nosali Mordekai te tuni bidigo sęba ma palio. Tiali goli, Haman da, te genuai hale elama, tama haliga sęgę yali, tama aga gesabidi halua selama, tama aga beba ma geasa pai. 13 Tama agai aga webolo, me te aga abagi dede dabe dalibolo te agaba pedelali sę po tigidali wali. Tialima, we Seres dali, te abagi dede augwali daligo te kolesaga hauwa koneai elaluai, augwaligo te tiwai po agabolo wali, “Megi da, nago bomo me nogi elaluali te hagayu, tama Mordekaigo nage aiyaba elalualio. Aga te Juda bidi da, tama nago aga sunumi paniabo usu meni yaibao. Te nage doloyu naga yaibao.” Te po wai dao.

Augwaligo Haman ela muani

14 Augwali po midubadi, tama te king bidigo sę ebo bidi dabe augwali sabolali. Augwaligo Haman polo te Estago genuai nai daa tubo madi sela painu yai.

Copyright information for `MPS