Exodus 11

Te gomunai ogwa augwali isaibao

Tama Moses te Isip tuni bidi sugi pesiąbadi, hasia bolo Genuai Bidigo Mosesbolo te po wai, “Eno deli sogo digi me te Isip tuni bidi, aga hani we bidi dali, augwalibolo te eno dene mu ilaibao. Tama tebo si, nosali agai dage tagala palaibao. Tama agai dage dali homu nagame elama, dage tagala palogobeo. Menio. Te agai dage polo mu pao weyu, tama dage te bulude tigidali mu sela sąwaibao. Tama megi nago te Israel we bidi tigidalibolo te po olama, tama augwali te pąde bidibo Isip haniba pelama, tama augwalibolo te au dobage gol, me te au dobage silva te augwali momainogo hanalugi pao,” wali. Nosali augwaligo tama tiwai, tama Genuai Bidigo te Israel bage augwalibolo te genuai nogi te Isip we bidi augwaligo gedude menama, tama augwaligo au dobage gol me silva te Israel bage augwalibolo mawai. Mu tama, te gavman sę ebo genuai bidi dabe dali, te Isip olo we bidi dali, augwaligo Moses te genuai bidi mu da, te homu yali, tama tiyu, augwaligo te sę ebo homu yai. Tama te tuni bidigo te “Nago ena ma sugobeo,” te po olama, tama Mosesgo tuni bidibolo po wei ponoyu, te po wali, “Genuai Bidigo po odao. Agai te po wai, ‘Me sogo be huli tomode ena te Isip tǫ tigidali habuba bilaibao,’ te po wai. ‘Tama tigidali Isip bagego gomunai ogwa isa silaibao. Tama tuni bidi, nago gomunai ogwade digi gagalaibao. Te wai agai nage hasegelama, te tuni bidi pedelainogo yali, te ogwa isaibao. Tama tigidali gomunai ogwa te isiyu, tama te olo sę ebo we dabego gomunai ogwa me tigidali isaibao, te nogi meni yai we dabe sibi augwaligo te tubo nai wit te masingo agaga pelama te bret nigibo sę ebo dao. Tama te tigidali bulmakau dabego gomunai wai dabe me isaibao. Tama tigidali Isip tǫ badu bidibo we bidi augwali homu sęgę me elama, tama gela genuai mu waibao. Te tiwai gela te Isipde polobadu me wai meni, tama te gela ma wagobeo. Tiali goli, eno dwai sę deli me te Israel we bidi augwali dali, me te augwaligo bulmakau nai dabe dali, dwai sę me egobeo,’ Genuai Bidi Yawego te po wai. Tama nago koneama, aga da te Genuai Bidi Yawe da, te homu emainogo yai, agai te deli tigi tiwai kolesaga te Israel bage dali ebe, te dage Isip dabe dali ebo kolesaga tiwai ebo menio.” Tama Mosesgo te po ma wai, “Tama tuni bidi, nage dali, gavman sę ebo bidi dabe, dage tigidali aselama, tama enaba kidu sugunama, po bomonama weyu, te po waibao, ‘Nage pao. Nage naga we bidi hani dali, polo pao.’ Te sę tigidali pedela silama, tama nosali eno te Isip taga paibao.” Tama Moses sębę mu elama, tama agai te tuni bidi tagala buluba soai.

Te Moses te tuni bidi polobadu sugi pesiąbadi, tama Genuai Bidigo Mosesbolo te po wai, “Tuni bidigo nago po me odogobeo, magi baso meni, te eno bomai sę meba te Isipde ma emainogo tama yaibao,” Genuai Bidigo te po wai. 10 Tama Moses de Aron sigo bomai sę hauwa deli deli te tuni bidigo gedude yai, tiali goli Godigo aga homu dąų olama, tama te tuni bidigo te Israel bage augwali agai tǫ tagala palobeo.

Copyright information for `MPS