Exodus 27

Augwaligo alta sai niga wai

(Ma Dobola Sali 38:1-7)

Tama Genuai Bidigo po ma naga weyu, te po wai, “Dagego te ni akas selama, te alta sai nigao, te moni halobage tiwai pąde dao. Te tigidali bogo sesege badu te deli tigi gagawai naga nigilao, te usu ni 2 mita 30 sentamita, tama te daide ugwadu usu sabo me ma te usu ni 1 mita 30 sentamita, tama usu nama nigao. Tama te kibu bulmakau gąų tiwai nai me si me si te ni akasgo nigilama, tama deli deli dage badu dąų walama, tama te alta tigidali te brasgo mesegelao, te aga deli tigi naga elaluaibao. Tama bras selama, te sia keli sabo pou me, te dwasianu savol me, pou me, te ofa hasa mi dodolobo age yai ną me, tama te sia dage sela pabo plet nigibadi yao. Tama dagego te moni bras sawali selama, tama polola polola pelama, tama te tama pololai bras sawali te alta halobage tomoba muao. Magi baso meni, aga ugwadu daide augwaligo te sia nogelama, tama te ofa mabo nai te siago udubadi, tama te keli aiyaba tuloluaibao. Tama bagua si nai deli deli te bras sawali nai habu badu munama, tolabo madi muabo nai te brasgo nigao. Tama te alta halobage tomode te tigidali habu badude te aiya badudu usu siyu, ugwaba asiyu, tama tomode mu te dwasianu sai nigiyu, tede dąų wao. Tama te moni pololai bras sawali, aga te dwasianu sai dabe ugwadu daide munaluaibao, te alta halobage tomode. Tama dagego te ni akas dage si selama, tama dulama, tama te dono si brasgo haluao. Tama dagego te alta tolasa painogo ebo sogo, te baguali dedageba te ni dono si munama, tama tolao. Dagego ni name selama, te alta te halobage tiwai nigao, tiali goli dagego te ni name te halobage habu pagede musiąma, te dedage elalumainogo yao. Dagego te eno nagebolo te bulu dude ola mani piksa te tiwai nigao,” tama po wali.

Godigo ugwa be bagulali obo po wali

(Ma Dobola Sali 38:9-20)

“Dagego te genuai gasagi yai ugwa obo ebogo te lotu ugwa be mesalo bagulao. Bobage nigibo usu sabo te 44 mita, te wiegi yai bobage ugwago obo tiwai bagulubo te me badu bogo badu nigilao. 10 Tama te wiegi yai bobage obo ugwa walomainogo eyu, tama te kapa bras selama, tama pos te bidi sese deli nigao. Te pos dabe bulabo page dabe me te brasgo nigao. Tama te wiegi yai kapa silva selama, tama bobage dono dabe nigiyu, tama huk dabe hauwa nigiyu yao. Tama te pos dabe si si dolaluyu, tama pos me si tomode ugwadu te dono me deli dąų wao. Tama te donode te huk meba munama, tama te ugwa obo te huk dabede tama walao. 11 Tama hasia te nigali tiwai naga, te me badu bogo badu obo bagulubo te tiwai nigao.”

12 “Tama te sia ge dega sabo badu obo, te ugwa me deli te bobage usu sabo te 22 mita te usu nama nigao. Tama pos nogo si badi, te pos page dąų walabo bras nai, te me nogo si te pos dodolabo madi dedage elalumainogo nigilao. 13 Tama te sia ge pedalubo badu obo te tų elalubo madi, te usu sabo me te 22 mita dao. 14 Te bobage ugwa walabo madi, te aga bobage usu nama, te 6 mita 90 sentamita, te tų si dali si badu dao. Te ugwa deli delide te pos sela te bras page dolalubo madi wawalo pao. 16 Te tų dolo gasa wiegi yai name ugwa walao, te aga te 9 mita usu dao. Tama aga haniani te sipsip kibu nisigo nigai, husugu hobigo, me mama yai hobigo au ilama, hobolao. Tama dagego te pos me si me si te brasgo nigali pagede dodolama, tama te posde te bobage wiegi yai ugwa wawalo pao. 17 Tama dagego te obo pos si si te ba silva dabego tigidali dąų walao. Tama te bisigi gąų dabe te silvago nigilama, tama te pos dabe te ba silva kęnao. Tama bras selama, te pos dabe dodolabo madi nigao. 18 Tama te obogo bobage usu nama, te 44 mita, te aga genuai usu ni te 22 mita, tama te ugwadu usu sabo te si 2 mita me 20 sentamita dao. Tama dagego wiegi yai tedela yai ugwa te obo bagulabo selama, nigao. Tama dagego te bras selama, te obo pos dabe dodolabo madi nigilao. 19 Dagego te bras naga selama, te ugwa bede sę yabo tigidali nai te brasgo nigao. Te ugwa be dali, aga mesalo obo dali si tuloluidali weyu, te bono dabe te augwali side gebelama, tama bobobage nil dabe tǫba enama, tama te bono dabe te nil dabeba gebelao. Tama dagego te bobobage nil dabe te brasgo naga nigao.” Genuai Bidigo te po wai.

Te sole dabe tonalubo kolesaga ebo po wali

(Prs 24:1-4)

20 “Nago te Israel we bidi augwalibolo te po olama, augwaligo te wiegi yai oliv ni dude sabo wel te lamde muabo sela asa wao, tama te lamgo ula te tigidali sogo elaluaibao. 21 Tama Aron aga ogomani dali, augwaligo te lam sole tolalubo nai eno ugwa be tomoba sela peyu, dodolomainao, te walali ugwa e badu me bogo badu, te bomo yai po elalubo halobage te ugwa tudi badu munalubao. Te ugwa bede ena te we bidi dali sisinabo be dao. Tama tigidali sogo Aron aga hani bagego wel te lamde munama, tama te lam ula ena bidibo madi ula elaluaibao, tama pio gagalama, kigamuba usu nigi paibao. Dage Israel dabe dali, dagego te nosali pedalobo wai dabe dali, augwaligo te eno te lamde wali bomo yai po sesemane sogo tolalua peyu, bidada paibao.”

Copyright information for `MPS