Exodus 5

Moses de Aron si pelama, Isip tuni bidi sugi pai

Tama nosali Moses de Aron si te Isip polasa tuni bidi bidibo teba pelama, tama te po wai, “Da Israel bagego Genuai Bidi Yawe Godigo te po wai, ‘Eno hani augwali te bidi meni yai bulu, te masigi saneba pelama, enabolo te genuai lotu po weyu, ena nogi ugwaba somainogo, augwali pomainao,’ wali. “

Tiali goli te tuni bidigo te po wai, “Genuai Bidi Yawe de dawe? Magi baso eno agai po odolama, te dage Israel hani pomainogo yaibawe? Eno te Genuai Bidi Yawe konebeo, tama tiyu, eno dage pagameo te po wagobeo,” wali.

Tama augwali sigo te po wali, “Da Hibru bagego God te da si bidibo digi pedelai dao. Da te masigi sane yai buluba sela sogo bidigi painogo homu yai, tama dago Godibolo te ofa mawainogo, te dago Genuai Bidi dao. Tama nago da pao wabo te usu yaibawe? Te dago tama tisąwani da, te agai da genuai gasigo, me te hwįbo sogode, te da mu dolaibao.”

Tama te Isip tuni bidigo Moses de Aron si dali te po wai, “Magi baso dage sigo eno sę ebo te we bidigo tagalomainogo te po obawe? Dage si sęba polo ma pao. Dage Israel hani hauwa mu pedaliyu, tama da bulu page bidi aiyaba elaluai, tama megi dagego te sę ebo taga painogo obawe?”

Tama te sogo naga te tuni bidigo po me deli te Isip bage dali, te Israel augwa digi te Israel sę ebo bidi tonalubo bidi augwali dali te po wai. Agai te po wai, “Dagego te wa pai nosa te Israel hanigo te be sę yabo dila pai nai brik nigimainogo magio, te dagego tebo dao. Augwa digi te nosa dabe sigi pomainao. Tiali goli, augwaligo te sesemane sogo te nigibo tiwai brik naga augwaligo nigimainao. Dagego te namba te pęwadage iligio. Mu menio. Augwali sę hagela ebo we bidi dao. Tama tibaso, augwaligo te po wai, ‘Da pelama, dago Godibolo ofa igi pomainogo emainao.’ Augwalibolo sę hauwa menama, tama augwali sę dene mu yao, tama augwaligo te tiwai tibo po wabo odabo sogo te meni yaibao,” te Isip tuni bidigo te po wai.

10 Tama te Isip sę tonalubo tobolu bidi dabe, me te Israel sę tonalubo bidi dabe me, augwali te Israel haniba pelama, augwali dali te po wai, “Tuni bidigo te po wai, dago nosa dabe dagebolo sela magasigio wai. 11 Duga digi pelama, tama te nosa gegegi pao wai, tama dagego te mama tǫgo nigibo nai brik te polobadu nigali tiwai hauwa nigao, tama te nigibo brik namba te aiyaba me dulugio. Te namba te polobadu elaluali tiwai naga tama elalumainao,” te po wai. 12 Tama te Israel we bidi augwali te tigidali Isip teba tedela pelama, te nosa dabe tigidali sisinai. 13 Tama te sę tonalubo bidi dabego sę polo yao weyu, augwaligo te po wai, “Dagego deli sę tiwai naga tigidali sogo eyu, te dago nosa dagebolo mobadi yali sę tiwai sę yao.” 14 Tama te Isip sę tonalubo bidi dabe augwali te Israel augwa digi te sę tonalubo bidi nigilali, te bidi pageba pai. Tama augwaligo te bidi dabe augwali eliyu, te po wai, “Magi baso dagego te brik namba te polobadu nigali tiwai nigibewe?”

15 Tama tibaso, te Israel sę tonalubo bidi dabe augwali te Isip tuni bidi bidibo teba pelama, aga dali te po wai, “Magi baso nago te tiwai kolesaga da dali ebawe? 16 Augwaligo nosa dabolo magasobeo, tiali goli augwaligo dabolo te brik nigao te po wedu gebo dao. Tama megi me augwaligo da elai. Te brik namba sǫą pali kolesaga page dago menio. Te kolesaga te Isip bage duga digi te sę yai dao,” te po wai.

17 Tama te polasa tuni bidigo augwalibolo te po wai, “Dage sę hagela ebo bidi dabe mu dao. Tama tiyu, dagego te po wai, ‘Dago dena Genuai Bidibolo ofa magi pobaso, te dagego da sula tagalao,’ te po wedu gebo dao. 18 Woo! Dage duga sęba ma pao. Augwaligo nosa dagebolo magasogobeo. Tiali goli, dagego te brik namba augwaligo dagebolo po weyu, te nigao,” te polasa tuni bidigo te po wai.

19 Tama te Israel sę tonalubo bidi dabe augwaligo te tuni bidigo wabo po odolama, augwaligo te brik namba pęwadage ilisiąyu, tama augwaligo koneani, megi genuai sęgę augwaliba pedelali, te homu yai. 20 Tama augwaligo te tuni bidi taga sobadi, te sogo augwaligo te Moses de Aron si gesabidi suai. Augwali sigo augwali te be bulu badu asobo tonaluai. 21 Tama augwaligo te bidi si dali te po wai, “Dena homugo te Genuai Bidi Yawego dage sigo kolesaga osola suao, tama Genuai Bidi agai dage sibolo dene mawaibao, magi basowe, dage sigo te tuni bidi dali, te aga tobolu bidi dabe dali, augwaligo da te dwai nai tiwai mu, te homu ebo dage sigo ilalio. Te tuni bidigo da elemainogo dage sigo tų nigibao,” te po wai.

Moses aga homu sęgę eyu, Godibolo gedu haluasa po wai

22 Tama Moses ma pelama, tama Genuai Bidibolo te po wai, “Genuai Bidi, magi baso nago naga we bidi hanibolo te dene maniwe? Tama magi baso nago ena eba tagala palai dawe? 23 Te nago po eno te tuni bidibolo wagi pali, tede gagalama dąį megi tama, agai dwai sę augwali Israel we bidi dali ebao. Tama nago augwali tau selama, magi sę me deli ebeo,” Mosesgo Godibolo te po wai.

Copyright information for `MPS