a[Ped 19:11]
b[2 Kin 24:10-16; 2 Sto 36:9-10]
c[Ped 4:6]
d[Ese 10:14; Ped 4:7]
e[Ped 4:5]
f[Ped 4:8]
g[Ese 10:9-13]
h[Ped 4:6]
i[Ped 1:4-15; 19:6]
j[Ese 10:1; Ped 4:2-3]
k[Ese 8:2]

Ezekiel 1

Godigo profet sę Esekielbolo mawai

(Dąį 1-3)

Esekielgo Godigo sia king sualio

Ena Esekiel, ena te Juda dabe dali te wę Kebar pąde bidai, te Babilon tǫ kantri pedaide. Te Babilon dabe augwaligo da kalabus elama, tama da te augwa page bulu tǫba sela pai dao, polobadu. Tama te nanobo me si me si wabo polua, dei a naga wabo side, te kibu be bidi sese deli olama, nogo si wabo 30 yiade, te dagalu buga pabo side eno te nade ebo tiwai te God sualio. a  Te sę pedelali, te Babilon dabe te Juda tǫ kantriba pelama, te hwįagaselama, te Jerusalem king bidi Jehoiakin augwa tǫ kantriba kalabus igi pomainu selasa pabo kibu be a naga nosali elalubo sogo te sę pedelai dao. b  Ena Esekiel, ena te pris Busigo ogwa da, ena te tǫ kantri Babilonde bidali, te ąį Kebar pąde da, tama enaba te Godigo po wabo eno odama, te Godigo bomo enaba asida walio.

Eno ugwaba tonobadi, eno te genuai wali me haowa te not badu asobo suali, te be sele hauwa dali asobo suali. Te genuai ulago te haowa mu bagua selama, tama te ula te isi dabo tiwai bomo umagi mu yali, tama te haowago ula tomode te tigidaliba usu te brasgo ula ebo tiwai yalio. Te genuai wali me haowa si tomode eno te bidi tiwai nai me si me si elalubo suali. Augwaligo tigi te bidigo tigi tiwai elaluali, c  tiali goli te tigidali deli delide te gesabidi me si me si badi, te bogo me si me si elaluali. Augwali sągą te doloba pai elaluali, te augwaligo sągą dani te gesi kibu bulmakaugo sągą dani tiwai si elaluali. Te augwaligo sągąde ula ebo te umabo mu eyu, te bras augwaligo meda holali gegemane tiwai yalio. Te tigidali bogo deli deli dologode te bidigo nogo ąbo tiwai elaluali. Te augwaligo bogo te tama tiwai elaluai. Tigidali deli deligo augwa bogo si diniginani, te deli deligo bogo sabigo te gasa mego mego bogo sabiba pomono pelama, tama augwali te halobage me deli tiwai te nogo habu me si me si pedelai. Te augwali gasaba me painogo ebo sogo da, augwa te tama tiwai naga elalubadi palio. Augwa tigi begelibo sę eyu me ebeo.

10 Tigidali deli deligo te tobage gesabidi me si me si elaluali. Te edaba begelama elalubo badu te bidigo gesabidi elaluali, te dolo nogo badu gesabidi te hasa nogi laiongo gesabidi tiwai yali. Te pobase nogo badu gesabidi te kibu bulmakau omai gesabidi tiwai elaluali, te tudi badu gesabidi te genuai ba kemodage gesabidi tiwai yalio. d  11 Te augwa gesabidigo kolesaga te tama da. Tigidaligo augwa bogo si diliginama, te deli deligo bogo te gasa mego mego bogo sabiba pomono palio. Te augwa gasa bogo me sigo, te augwa tigi mesega salio. 12 Tigidali deli deligo gesabidi te me si me si gesabidigo te me si me si pedaiba tononaluali. Tama augwali deli homu naga elalubaso, augwali gasaba me painogo da, te augwaligo gesabidi gasaba me begeligobeo. Augwali paboba naga tama paibao. 13 Te nai dabego kolesaga te tama elalubao. e 

Eno suali, te nai dabego ula te isi ula me sole tiwai ula te bidi tiwai nai me si me si tomode iba peyu, eda asu yali. Tama te sia bogoli genuai pedelama, te be sele ula te isi pedelama, te pepeda pabo sę ela palio.
14 Tama te me si me si bidi tiwai nai dabe te polo asesa iba peyu, eda asu yalio, te be selego ula tiwai yai dao.

15 Eno te bidi tiwai nai dabe subo sę elama, te eno suali, tigidali deli deligo te tǫde augwa sągą pąde te wil me deli dolalubo suai dao. 16 Te tigidali wil deli tigi poai naga elalu, te ula umagia mu yali, te sęwa yai tedali gasagi yai masigi mu tiwai yalio. Te wil tigidali deli deligo te gasa gasa wil te augwa tomode elalu, te gasa tononalua palio. 17 Tama tialima, te wil dabe te tigidali me si me si pedai badu te iba soyu, eda soyu emainu ebo dao. 18 Eno suali, te wil dabe moni dobo dwai mu yai baso, ena wi yalio. Te wil tigidali deli deli sabi badu te tononalubo gedu hauwa mu elalualio. f  19 Te bidi tiwai nai dabe iba soyu, eda soyu ebo sogo da, teda te wil dabe me augwali dali iba soyu, eda asiyu yali. Tama te nai dabego te tǫ tagalama, ugwaba holobo si da, teda te wil dabe me ugwaba holoyu yalio. 20 Te nai dabe augwa menaba pabo deli homu ebaso da, teda augwali pelawaibao. Tama te wil dabe me augwali dali paibao, magi baso meni, te me si me si nai dabego me, te wil dabego me te deli homu naga elalubo dao. 21 Te nai dabe augwali gasa me pabo homu ebaso da, teda te wil dabe me paibao. Tama te nai dabe te me badu pedaide bidibaso da, teda te wil dabe doligi pai elalueibao. Te nai dabe augwali hogodama, ugwaba holobaso da, teda te wil dabego me tama tiaibao, magi baso meni, te me si me si nai dabe dali te wil dabe dali augwaligo deli homu naga elalubo dao. g 

22 Tama eno suali, te dagalu ugwadu tede te genuai dąį tiwai elalubo suali. Eno suali, te nai ula mu yali, te wiegi yai dula tiwai elalubaso, ena wi yali. Te nai te bidi tiwai nai me si me si te nai daide ugwadu munalubo suali. h  23 Te me si me si nai dabe te genuai bagua sai nai dologode elaluali, te augwaligo bogo si diligina palalio. Te me deli deligo bogo sabi badu ununulu palio. Te augwa tigi dabego digi te augwa bogo sigo mesega salio. 24 Te augwali bola pabo sogo eno odali, te augwaligo bogo kulukulu wali, te tamu ąį genuai ąį dini holama, degasa dulu bugusu wabo tiwai yali, tama te genuai ami bidi hanigo pesagede bidu posolu dala sabo tiwai yalio. Te augwaligo bogo u wabo te Tigidali Bomo Elalubo Godigo i wabo tiwai yalio. Te augwali me badu pedai badu doligi pelama, te augwa bogo bea sali. Tialima megi da, te bagua sai naide ugwadu daide te bidigo po wabo odai. i 

26 Te bagua sai nai daide ugadu te nai me deli king dugabo sia sai tiwai augwaligo te gasa tedali sisi dagalu tiwai masigigo nigai elalualio. Tama bidi te dugabo sia kingde dugulalubo tiwai elaluai. j  27 Te bidigo tigi ugwadu te bras pedai me deli ula te tomode elalubo tiwai yali. Te tigi pedai aiyadu te sia ula tiwai yali. Te genuai ulago aga bagulai elaluali. k  28 Tama te ula te dagalude unigi bidi elalubo tigi poai tiwai hauwa elaluali. Te ula ebo eno suali, te ula te God agade digi genuai ula asobo tiwai yai dao.

Copyright information for `MPS