a[Ese 1:26; Ped 4:2]
b[Ped 8:5]
c[Ped 4:8]
d[Ese 1:15-21]
e[Ese 1:10; Ped 4:7]

Ezekiel 10

Te Godigo genuai ulago te Godigo be taga soali

Tama eno te dagalu ugwadu tede te genuai dąį tiwai nai ma suali, tama te bidi tiwali nai me si me si te dąį dologode elalubo eno suali. Tama te ugwadu dąįgo ugwadu daide eno te bidi dugulalubo nai sia king me deli augwaligo te sisi dagalu masigi te gasa sawi yai mugo nigai sualio. a  Tama Godigo te wiegi yai nami ugwa bea sali bidibolo te tiwai po walali, “Nage te bidi tiwai nai me si me sigo elalubo te wil me si me si tomodu pelama, nago nogo sigo te sia meba selama, nage pelama, te taunba sąsą biligi pao,” wali. b 

Godigo wali po silibaso da, teda eno suali, te bidi te me si me si nai dabe dologo badu palio.
Augwali te saut badu te Godigo bede dolaluali. Tama te genuai haowa me deligo te Godigo be bagulali obo pedai badu tigidali mesega selama, elaluai dao. Tialima, Godigo genuai ulago te me si me si bidi tiwai nai taga soyu, te be sunumi pąba dolagasalio. Tama Godigo te genuai ulago te be bagulali obo tigidali una selama, te ula umabo mu elaluai dao. Te bidi tiwai nai dabego bogo dabego pala pala wabo bomo yali, te genuai obo badu bidali we bidi augwaligo te augwali odobo usu yalio. Tama te pala pala wali, te Tigidali Bomo Elalubo Godigo i wabo tiwai yalio.

Tama Godigo te wiegi yai nami ugwa bea sali elalubo bidiba te tama po waliyu, te pelama, isi meba sigi pao wali sogo da, teda te bidi pelama, te wil tiwai nai me deli pąba doligi palio. Te me si me si wali bidi tiwai nai dabe me deligo te augwali tomode elalubo isiba nogo munama, agai te isi meba selama, te bidigo nogo siba muanio. Tama te bidigo te isi selama, palio. Eno te me si me si nai dabe suali, te bidi nogo ąbo tiwai te augwa bogo dologode elaluai suai dao. Tama eno suali, te me si me si nai dabe pąde te wil deli delide elalua palio. Tama te me si me si wil dabede te ula umabo te sęwa yai tedali sawi yai masigide tama elalubo suai dao. 10 Tigidali deli deli wil te deli tigi poai elalu, te gasa tomode me elalubo wilgo te gasaba me tononaluali. 11 Tibaso, te tigidali wil te tigidali pedai iba peyu, eda asu yali. Te bidi tiwai me si me si nai te menaba pabo homu yali da, teda augwali te peyu naga yalio, te augwali begeleyu me ebeo. 12 Te bidi tiwai me si me si nai dabego tigi, me tudi, me nogo, me bogo dabe, te tigidali te augwa wil dabego me, te tonobo gedu hauwa elaluali. c  13 Augwaligo te wil dabe nogi te tiwai polali eno odali, “Te bebege ebo wil dabe da,” po walio. d 

14 Te tigidali me si me si nai deli deligo te me si me si gesabidi tobage elaluali. Te polalubo gesabidi te ensel me deli gesabidi tiwai yali, te si wali te bidigo gesabidi tiwai elaluali. Te sela wali te hasa laiongo gesabidi tiwai, te me si me si wali gesabidi te ba kemodagego gesabidi tiwai yai dao. e  15 Eno te megi suali me si me si nai dabe augwali, te me si me si nai dabe polobadu eno te wę Kebar pąde suali. Augwali hogodasa pabo sogo, 16 te wil dabe augwa dali palio. Te me si me si nai olo dolalubo si da, te wil dabe me olo dolalueibao. Te me si me si nai ugaba bola holobo sogo da, te wil dabe me augwa dali ugaba paibao, magi baso meni, te me si me si nai dabego te wil dabe tonalubo dao.

18 Tialima, te Godigo genuai ulago te Godigo be sunumi tagalama, te ma geasa pelama, te bidi tiwai me si me si nai daide ugadu bidalio. 19 Eno tonalubadi, te me si me si nai dabe augwa bogo diniginama, te ugaba bola holali. Te me si me si wil augwa dali palio. Augwali te giliga pedalubo badu te Godigo be bagulali obo sunumi pąba dolalugi pali. Te Godigo genuai ula augwali daide ugadu elalualio. 20 Eno koneani, eno te nai dabe suali, tialima augwali te Israelgo God dologode te ąį Kebar pąde bidali. Te megi da, eno koneanio, te nai dabe augwali te Godigo mobo ensel tobage me deli dao.

21 Tigidali deli deli mobo enselgo gesabidi me si me si elalu, bogo me si me si elalualio. Te nai me deli te bidigo nogo ąbo tiwai te augwa bogo dologo deli delide elaluai. 22 Ena te ąį Kebar pąde bidali sogo polobadu eno te mobo bidi ensel dabe suali. Te eno megi ma suali, te augwali polobadu elaluali gesabidi tiwai yalio. Te me si me si mobo bidi ensel dabe te augwali me badu deli painu ebo sogo, augwali peyu naga yaibao. Augwa tigi begeleyu me egobeo.

Copyright information for `MPS