Ezekiel 16

Jerusalem te bidigo sai wego bidi tagalobo tiwai ebao

Genuai Bidigo enabolo te tama po ma walio, “Tǫde bidio, nago te Jerusalem dabeba po dolo weyu, te augwaligo dwai kolesaga haniani augwa digi ebaso, te po augwaliba bugagia walao. Eno po da e tiwai, Jerusalem, ena God Genuai Bidigo, eno po nagede elalubao. Nage te we me deli tiwai. Nago aya ida te dwai kolesaga wali pabo hani dabedu asali. Nago aya te Amor hani dabe da, tama nago ida te Hit hani dabe da. Tama naga nage te Kenan tǫde ame nai dao. Te idago nage ame nani sogo augwaligo nage mosogobe togobeo. Te augwaligo nage ąį telabe, ma nago tigide tamu mubeo. Te nage augwaligo ugwa namego belama mubeo. Te mena bidi me deligo nagede dwasianu hobede elama, te tama sę dabe nagede me ebeo. Nage pedelali sogo, augwaligo nage godolo isąma, augwaligo nage te kala dasuba sąwai dao.”

“Tialima, te ena asu, eno nage suali. Eno suali, te kanemego nage mesegasa elaludu, te nage uga begelu, eda begelu iduali. Eno homugo nage isidali te homu elama, te eno tama po wali, ‘Nage bugagia bidali da, te genuai pedelama, te sawi wiegi yai plaua tiwai yao.’ Tialima, nage genuai pedelama, te boma pai elalu, te nage gasa wiegi yai sawi yai wegi pedelalio. Te nage ame elama, aguli nisi holai. Tiali digi nage habu olo bidai dao,” wali.

“Tialima, te sogo ena ma aselama, tama eno nage te bidigo sabo usu yai elalubo suali. Tialima, eno nageba dilapi holobo ugwa saket bulama, te nage tigi mesegelali. Te ena God Genuai Bidi, te eno bomai po nage dali olama, te eno nage sabo po dąų olama, te nage eno we pedelai dao.”

“Eno ąį selama, te nage tigide elalubo kaneme ąį telawali. Tama eno nago tigiba te oliv wel muani. 10 Tama eno nage te gasa sawi yai te haniani au dogia pai ugwa augwaligo hobigo au yai ugwago te eno nage au ilalio. Tama eno nage te wiegi yai su te nadoba dabe mawai. Tama eno nage toboluba te wiegi yai ugwa nami muani. Tama eno nagebolo te gasa sawi yai dila pai holobo ugwa saket me deli mawai dao 11 Tama eno te tobage wiegi yai au dobage dabe nagebolo mawai. Eno nagebolo te nogode holabo nogo mo dabe mayu, te magede domabo beli dabe me mawai dao. 12 Tama eno nage te gunide me olode walabo ring mani, tama wiegi yai sawi yai tobolu madi, te kwin wego madi tiwai mawai dao. 13 Tama nago au yabo gol me silva hauwa elaluali. Tama nago te wiegi yai sawi yai ugwa dabe augwaligo te hobigo hobolama nigali ugwago nageba au ilama muani. Tama augwa te wiegi yai plaua mugo nigai bret eno nage mawai. Tama eno nage te pusu ebo bunu ge hani me te oliv ni du mani. Te nai dabe nago tuali. Tama nage te gasa sawi wiegi yai mu pedelama, nage te nogi yai we kwin pedelai dao. 14 Tama te tigidali bulu tǫ pedai we bidi augwaligo te tama po odali, nage te gasa sawi yai we deli mu pedelali. Nage polalubo we mu da, magi baso meni, ena God Genuai Bidigo, eno nage au ilai dao.”

15 “Tialima, nage sawi yai mu da, nago te tama homu yali. Tigidali bidigo nage godolo yai. Tialima, nage hagoma eyu, nago pemene elama, te nageba asali tigidali bidi dali pagela piali dao. 16 Te nago naga ugwa dabe meba selama, tama nago te tibo godiba lotu wabo pesage dabe au ilalio. Te kolesagade nago te bidi dabego homu bega selama, tama augwali nage dali te pesage dabeba piagasali. Te tobage kolesaga dwai mu yai dao. 17 Eno naga au yao olama mani te silva me gol nago te selama, tama nago te bidi piksa noma dabe nigilama, tama nago augwali dali penani sę ebo kolesaga ebao wali. 18 Tama te au hauwa dogia pai elalubo ugwa name nago te selama, tama nago te piksa noma dabe au ilali. Tama nago te oliv wel me, te wiegi yai denami ebo hano ilibo pauda me sali, te nage eno mani, tama nago te piksa noma dabeba ofa yai dao. 19 Eno te wiegi yai nai nage mani, te wiegi yai plaua mu tiwai, te oliv wel me, te pusu nai bunu ge hani me mani. Tialima, nago te nai dabe da selama, tama te tibo god dabe piksa nomaba ofa ilali, te augwali homu bega sabo sę yali. Tama Jerusalem nago te kolesaga ela pidu, me ela pai dao.”

20 “Nago te wai dabe ame nani, tiali goli nosali nago te ena God Genuai Bidi eno te wai dabe selama, te nago augwali ela munama, te tibo god dabeba ofa yalio. Nago koneao, nago penani ebo kolesaga te wiegi yai me ebeo. Tialima, te kolesaga usu meni da, nago te homu elama, 21 tama nage te we dwai mu pedelabo homu yali. Tialima, nago eno wai dabe ela munama, tama augwali te tibo god dabeba ofa tiwai yali dao. 22 Nago te penani sę ebo kolesaga me, te dwai kugumini yai kolesaga wali peyu ebao, tama nage te dwasianu wai bǫųde elalubadi, te nageba pedelali sęgę po, te eno nageba mani po nago homu kone palisąwani. Te sogo nage te habu olo mu elalu, te kanemego nage mesega sai elaludu, te nage tǫde bulude uga bebege, eda bebege iduai dao.” Genuai Bidigo te po wai.

Jerusalem penani we mu tiwai pedelali

23 Genuai Bidigo po te tama ma wali, “Ena God Genuai Bidigo, eno te tiwai po nageba walobao, nage mu dolaibao. Nago te dwai sę tigidali yaligo da, 24 teda nosali nage te tigidali sunumidu pelama, te tibo god dabeba lotu wabo pesage dabe me te penani ebo kolesaga yabo pesage dabe nigaibao po wai dao. 25 Nago homugo nage sawi yai we da homu elama, tama te bidi me deli te sunumidu asobo nago subaso da, teda nago aga i olama, nage dali piagasali. Tama nago penani ebo kolesaga umabogia mu pedaludu geai dao. 26 Isip dabe, te augwali pąde bidali bidi dabe, augwali te haliga hogodalubo bidi dabe mu da, tama nago augwali nage dali pagela piagasomainu yalio. Nago ena hagela sębę ilibo sę eyu, te nago penani sę yali kolesaga te umabogia mu ela palio.”

27 “Tialima, polobadu eno dwai dene nageba menama, te eno nageba mani wiegi yai nai hauwa sela sąwani. Tama te Filistia dabego nageba dwai sę yagasomainu eno nage sula tagalai. Augwaligo nage homu godolo mu isąma, tama nago dwai kolesaga tigidali ebaso, te augwaligo nagede haliga dwai yalio,” wali.

28 “Te bidi dabe nage dali piagasali, te augwaligo nago godolo ebo homuba usu nusiąbaso, tama nago penani sę ebo kolesaga te Asiria bidi dabe dali yali. Tialima, augwaligo me nago godolo ebo homuba me usu nubeo homu yali. 29 Tibaso, nage te Babilon bidi dabego penani we pedelali, te augwali mone sabo bisnis sę ebo bidi dabe da. Tiali digi, augwaligo me te nago wei ebo homuba me usu nubeo.”

30 “Tialima, ena God Genuai Bidigo, eno po nagede elaluali. Nago naga te homu godolo ebo wali pidu, tama nage te hale menisąbo we me deli tiwai pedelai dao. 31 Te tigidali sunumide nago te tibo god dabeba lotu wabo pesage nigiyu, te penani ebo kolesaga ebao. Tialima, nage da, te gasa penani we dabego ebo kolesaga tiwai ebeo. Menio. Nago te kolesaga ebadi, tiali goli nago augwaligo te sabo mone tiwai me sabo homu ebeo. 32 Nage da, te tiwai we me deligo aga bidi tagalama, te gasa bidi dabeba penani igi pabo we tiwai ebo dao. 33 Tigidali penani ebo wego mone saibao. Tialima, nago me tebeo. Nago te tigidali badu bidiba te wiegi yai homu ilibo nai tiwai mayu, te nage dali piagasomainu homu bega sabo sę ebo dao. 34 Nage gasagi yai tedali penani we mu da. Te bidi me deligo nage homu bega sabo sę ebaso, nage te penani we pedalubeo. Tama nago te mone me siyu ebeo. Menio. Nago mone augwaliba mobao. Awe, nage tedali gasagi yai mu dao,” te po wai.

Godigo Jerusalemba dwai dene mabo sę ilaibao wali

35 Genuai Bidigo po ma weyu, te tama po wali, “Jerusalem, nage penani we da, ena God Genuai Bidigo po odao. Nago naga ugwa dabe pepeda sąnama, tama naga digi naga tigi te godolo ebo tigidali bidiba mobao. Tama nago te kugumini ebo kolesaga wali peyu, te tibo god dabeba lotu obao. Te nago naga wai dabe ela munama, te tibo god dabeba ofa tiwai mabo dao. 37 Tialima, eno te nago godolo yali abagi augwali me, nago godolo isąwani me tagalao, te tigidali eno deliba sisinaibao. Te eno augwali odasa aselama, te augwaligo nage bagua sagasaibao. Tialima, eno nago ugwa peda sąnama, te nage habu olo elalubo augwaligo sueibao. 38 Nago te penani kolesaga ebo we tiwai bidiyu, tama nago te we bidi meba ela muani. Tama tibaso, eno nago yali dwai sę dagalama, tama tede sębę posolo mu eyu, nage dolo mu wei ponoyu, dwai dene mawaibao. 39 Naga te abagi dabego nageba dwai sę ilibo eno sula tagalaibao. Tama augwaligo nago te tibo godiba lotu weyu, te aga dali penani kolesaga ebo pesage dabe aluaibao. Te augwaligo nago ugwa dabe, me beli, me ring te au dobage pepeda sąnama, te nage habu olo elaluaibao.”

40 “Te abagi dabego te we bidi dabe homu hodolobaso, te augwaligo nageba masigi sąyagaselama, tama augwaligo te bainat hwą selama, te nago tigi dwasianu denegene mimiaibao. 41 Tama te abagi dabego nago be dabe isi ulaibao. Tama te we hauwago nageba te ebo sę augwaligo sueibao. Nago te dwai kolesaga ebo eno mu silimai hagede ebaso, tama nago te bidi dabe nage dali piagasomainu homu bega sabo sę me egobeo. 42 Tialima, te tama tebo kolesagade te eno wado genuai ebo po me eno haliga sębę ebo silaibao. Te ena dua digi bidaibao. Te eno nageba wado po me haliga dwai munu ma egobeo, te po wai dao. 43 Te nage gesi wegi elalubo sogo eno wiegi yai sę nagebolo yali. Tialima, te nago homu kone gegeda palama, nago te tobage dwai kolesaga dabe ebao. Tibaso, eno wado po nagebolo wali, te ena God Genuai Bidi, te eno nago dwai sę tigidali wei ponoyu, te nageba dwai dene mu ilaibao. Nago dwai kolesaga hauwa yalio. Magi baso nago te penani yabo homu kolesaga me elalubo dawe?” te po wai.

Wegigo te idago kolesaga wali paibao po wali

44 Genuai Bidigo po te tiwai ma wali, “Jerusalem, nosali te we bidi dabe augwaligo nage sulama, te tama po waibao, ‘Wegigo te aga idago kolesaga wali pabo dao,’ waibao. 45 Mu tamao, nago kolesaga te naga idago, me naga ama dabego kolesaga tiwai tobage ebao. Augwaligo augwa bidi dabe me, augwa wai puluba dabe dali homu godolo me isąwai. Nago ida te Hit hani we me deli da, nago aya te Amor hani bidi dao,” wali.

46 “Te Samaria taun te not badu elaluali, te nago ama genuai we me deli tiwai da. Te aga pagede elaluali bulu dabe augwali te aga wegi dabe tiwai yali. Tama te taun Sodom polobadu te saut badu elaluali, te nago abe gesi ogwa bidi tiwai da. Tama te aga pąde elaluali bulu dabe te aga wegi dabe tiwai dao. 47 Polobadu te wegi ama nami sigo dwai kolesaga mu yali, tama nago augwali sigo te kolesaga wali pali. Tiali goli, tego nago godolo ebo homuba usu nubeo. Menio. Te sesabi menisąbadi, te pąde sogo te nago kolesaga te dwai mu umagi elama, tama te wegi ama nami sigo yali dwai kolesaga aiyaba elaluai dao.”

48 “Ena God Genuai Bidi, ena sesemane sogo bidaibao, eno te tama tiwai po dolo dageba obao. Nago ama Sodom, te aga wai dabe dali, augwaligo te nago naga wai dabego dali ebo kolesaga tiwai me ebeo. 49 Aga te aga wai dabe dali augwaligo te nai hauwa elalubaso, te augwa bugagia dugulalu te me hwįbeo, tibaso augwali te hagoma elama, te augwaligo nai sǫą pali bidi dabe bugagia tonalubeo. 50 Augwali te hagoma elama, te augwaligo tobolu te masigi dila pai tiwai elalu, tama augwaligo te eno godolo menisąbo sę yali. Eno augwaligo te kolesaga ebo sulama, te eno augwali dolai dao,” wali.

51 “Samariago me te nago ebo kolesaga tiwai te dwai sę hauwa me ebeo. Te nago dwai kugumini yai kolesaga mu ebogo te nago ama dabego ebo dwai kolesaga te aiyaba elalubao. Eno te dage selago dwai kolesaga ebo subao, te tonobo nago kolesaga naga te dwai mu ebaso, tama naga ama dabego dwai kolesaga da, te olo bage tiwai ebao. 52 Nage hale umagi mu yao, magi baso meni, te eno nago kolesaga dali, te naga ama sigo kolesaga me dagalobo sogo, eno suali, nago kolesaga te dwai mu eyu, te nago ama dabe augwali te sęgę meni yai we dabe tiwai pedelali. Tialima, megi da, naga te hale ebo kolesaga yali sęgęde te sęgę tolobaso, te nage dwai haliga yagameo,” wali.

Godigo wiegi yai sę te Sodom dali Samaria siba yaibao

53 Genuai Bidigo po ma weyu, te tiwai po wali, “Jerusalem, megi da, Sodom me Samaria te augwa si wai dabe dali dolali elaluai. Tialima, eno naga te ama si tau selama, te augwali si bugagia bidaibao. Te nage eno dolaibao, tiali goli nosali nage me eno tau selama, te augwali dali bugagia bidaibao. 54 Tama naga te yali dwai kolesaga dabede nage hale ebo sę yaibao. Te ama sigo nage sulama, tama augwali sigo te homu elama, augwaligo sęgę te genuai ebe homu yaibao, te po waibao. 55 Te eno augwali talu si tau selama, te augwa polobadu bidali tiwai bugagia ma bidaibao, te nage naga wai dabe dali, dage bugagia bidaibao. 56 Te nage eno dolisąwani sogo, nago hagoma elama, nage te wiegi yai we da homu yai, tama nago Sodom te we dwai mu da homu yai dao. 57 Tialima, megi da, nago dwai kolesaga te hanilama, hania pedelai. Tama te gasa hani we bidi augwaligo nage gisugu mani, te nago Sodom gisugu mani tiwai yali. Te Siria me Filistia we dabego, me te nage pąde bidali gasa hani dabego, augwaligo te nage magi nai meni yai we da augwa te homu eyu, te augwaligo posobo po nage dolo wai dao. 58 Te tama kolesagade ena Genuai Bidigo te eno naga te penani ebo kolesaga, me te tobage gasa dwai kolesaga ebo sęgę te naga tolomainu yai dao,” po wali.

Te Godigo gesi dąų wali bomai po te sesemane sogo elalua pidu, elalua paibao wali

59 Genuai Bidigo po ma weyu, te tama po wali, “Jerusalem, ena God Genuai Bidi, eno nageba maiabo gasa po me elalubao. Te nage gesi ogwa bidi bidali sogo, te eno nage dali dąų wali bomai po wali paibao po wai. Tiali, nago te dąų wali po olo nai da homu elama, te nago bolalio. Tialima, eno nago te yali dwai kolesaga wei dolo ponani. 60 Tialima, eno digi nago te bolali bomai po dąų wali te eno homu kone me gegeda palogobeo. Tialima, eno gesi bomai po nage dali dąų walama, tama te dąų wali gesi bomai po te sesemane elalua paibao,” wali. 61 “Tama eno te we ama nani si te nageba ma asobo sę ilaibao, tama eno augwali si te naga wegi si dolo tiwai pedelaibao. Mu tamao, eno te yainogo ebo kolesaga te dąų wali bomai pode elalubeo, tiali te ena digi homugo yaibao. Eno te tama tebo sogo, te nago naga yali dwai kolesaga haniani te homu kone paligisu, te nage hale umagi mu yai dao,” po wai. 62 “Eno te gesi bomai po nage dali dąų walobaso, te nago te tiwai bugagia koneaibao, ena digi ena Genuai Bidi da po waibao. 63 Tama eno nago te yali dwai kolesaga dabe sela sąnama, tama tede homu kone ma palogobeo. Tiali digi, te nago te nago yali dwai kolesagade ma kone paliyu, hale dwai mu ebaso, te nago po me deli wagobeo. Ena God Genuai Bidi, eno te po wai dao.”

Copyright information for `MPS