a[2 Kin 24:15-20; 2 Sto 36:10-13]

Ezekiel 17

Te bono me delide, me te ba kemodage side Genuai Bidigo po digi po begelama wali

Genuai Bidigo enabolo te tama po wali, “Tǫde bidio, eno homugo te po me deli begelama, te nago te Israel dabeba po digi po pusumainu homu ebao,” wali. “Ena God Genuai Bidigo po te augwaliba mao. Te moni dobo dwai ba kemodage me deli bidali, aga boma pai bogo da, te bobobage mu elama, te aga nisi da, te dodobolo pai hauwa elalu, te sawi yai mu da. Aga te Lebanon bulu du dabeba bola pelama, tama agai te dwagi yai ni sida tobolu bubu me deli toga sigi palio. Tialima, agai te ni tobolu te mone sabo bisnis sę ebo bidi dabego bulu tǫ kantriba tolasa pelama, tama agai te magi nai dobu si ebo bidi dabego taun me deliba buligi pai dao. Tama aga te tǫ kantri Israelba bola pelama, te hogodo nai me deli sigi palio. Tama agai te nai wai te tǫ ili hauwa elalubo digi bulali. Tama te badu te ni genuai holabo ąį mabo wę hauwa elaluai. Tialima, te nai genuai bono pedelama, te aga nologo tigidali te bobobage mu pedelali. Te ni nologo tigidali te ba kemodage bidibo pesageba gealu tononaluai. Te aga pedali dabe te tǫ tomoba mu dulalio. Tama te bono nologo me yabe hauwa elaluai dao,” wali.

“Tiali goli, te gasa moni dobo dwai ba kemodage me bidali. Agai me te boma pai bogo bobobage elalu, te nisi hauwa elaluali. Megi da, te bonogo aga te bidali tǫ hagela mu ebaso, te aga pedali dabe me nologo dabe te gasa ba kemodage bidibo badu begeligi soabo sę ilali. Te bonogo te gasa ba kemodagego aga ąį hauwa mawaiba homu yalio. Tialima, te bono hasia elaluali tǫ da, te wiegi yai mu da. Te ąį me ili hauwa elalubo tǫde da, te bono wiegi yai holama, te nologo hauwa pedelama, te ni du hauwa walama, te polalubo ni mu pedalumainu eyu, te hasia ba kemodagego aga tede bulai dao.”

“Tialima, ena God Genuai Bidi, eno hanalubo po me deli te tiwai elalubao, te bono bugagia elalu, te genuai pedalubo da, agawe? Menio. Te hasia ba kemodagego wado ebo homu elama, te bono pedali dali gudulama, agai te du dabe sela sąnama, te gesi pedalubo honu dabe te siago boga sabo sę ilaibao. Bomo meni yai bidigo, ma dwasianu hanigo naga, augwaligo gudubaso, usu yaibao. Tama tialima, te bomai ba kemodagego te gudubo sę dene me egobeo,” wai. 10 “Te bono wiegi yai tǫde elaluali, tiali goli aga bugagia elalu, te genuai holabo usu ebeo. Te posola pai wali te sia ge asobo badu asama, te bono aiyaba elalubaso, tama te bono aga elaluali pesagede sasia paibao,” te po walio.

Te begelali po page e dao

11 Te Genuai Bidigo po enabolo te tiwai ma wali, 12 “Te po sela sąnama, hagoma ebo bidi dabeba hanalu wao, augwaligo te po page koneaniwe, ma meniwe? Te po page e tiwai da. Babilon king te Jerusalemba aselama, tama agai te Juda king dali, te ami ofisa bidi dabe dali selama, te Babilonba kalabus sela pai dao. Aga da te hasia asali ba kemodage tiwai dao. 13 Aga te tǫ kantri Judade bidali sogo, te Babilon kingo te dąų walobo po me deli te Juda king aga hani bage me deli dali te po dąų wali. Agai tama po wali, te bidi Juda gesi king bidi pedalumainao wai. Te Juda king da, te bono tiwai dao. Agai te gesi kingba bomai po dąų waliyu, aga te aga dologode bidaibao wali. Te Babilon king aga tǫ kantriba ma pali sogo, agai te Juda dabe genuai polalubo bidi dabe aga dali sela pai dao. 14 Te Babilon king bidigo tama po wali, te gesi kingo te dąų wali bomai po wali pisąma, te aga tǫ kantri bomai ma pedalubo sę elama, te Babilon dali ma boi hwįainu ebaso da, teda Babilon kingo te genuai bidi dabe dolaibao. 15 Tialima, te Juda kingo agai dąų walali bomai po wali pabeo. Agai te Isipba po ola tolama, te hos dabe me te genuai ami bidi hani dabe aselama, aga tau sagasao wali. Te Isip king bidi da, te si wabo ba kemodage tiwai dao. Tialima, te king aga bugagia bidaiba homu elama yali da, agawe? Menio. Agai te Babilon kingo po sela sąbaso, tialima te Babilon king aselama, te agabolo dwai dene mawaibao,” wali. a 

16 “Ena God Genuai Bidi, ena sesemane sogo bidibo da, eno po dolo tama obao, te Juda king da, Babilon tǫ kantriba kalabus igi pelama, tede bidibadi, aga isaibao,” wali. “Te page te tiwai elalubao. Te Babilon kingo aga te king pedelao obaso pedelali, tialima agai te dąų wali bomai pode hagela homu eyu, te po sela sąyu, te agai te Babilon king dąų wali bomai po bolai dao. 17 Tialima, te Babilon ami bidi dabe asama, te hwįbo nai hauwa nigilama, te Jerusalem bagua sabo tǫ du holaibao. Tama augwaligo te Jerusalem dabe dali boi hwįnama, te we bidi hauwa ela mueibao. Te sogo, te Isip kingo bomai ami bidi dabe, augwaligo te Juda king tau sabo usu meni yaibao. 18 Te Juda kingo te eno nogi weyu, te Babilon kingba nogo mayu elama, tama agai po dąų walali. Tama agai te Babilon king dali dąų walali po, te bomai po bolaligo te aga dene saibao. Tialima, aga bugagia bidabo usu meni yaibao,” te po wali.

19 “Ena God Genuai Bidi, ena sesemane sogo bidibao, eno mu po tama obao, eno te Juda kingba dwai dene mawaibao. Agai te po dąų wali sogo agai eno nogide bomai po dąų weyu, te dąų wali po wali paibao wali, tiali goli agai wali pabeo. 20 Tama tialima, eno aga tola sabo ba bono gaga mueibao. Tola selama, te aga eno Babilonba sela pelama, te agabolo dwai dene mawaibao, magi baso meni, agai ena dali dąų walali bomai po wali pabeo. 21 Te boi bidi dabego te aga hani ami bidi dabe augwa geme duala sigi pabo pesage dolaibao. Te isisąwani ami bidi dabe, augwali te gasa pedai tigidaliba wi tedela paibao. Tama dage Israelgo te tama sę ebo bugagia koneama, ena Genuai Bidigo digi, eno wali me po da te homu yaibao,” te po wali.

Godigo te Israel dabe tau sabo bomai po dąų walio

22 God Genuai Bidigo te tama po wali, “Ena digi te bobobage ni sida honu me deli toga saibao. Tama eno te Israel bulu du uganu igulai bulu dude bulaibao, te Israelde elalubo gasa bulu du tigidali aiyaba elaluai bulu du da. Tama te ni genuai holaibao. Te agai nologo bobobage elama, tede te wai du walaibao. Te aga polalubo ni sida mu pedelaibao. Te haniani ba dabe te ni tiwąį madi aga nologoba geme duala sagasaibao. Tama augwa be dabe te ni nologo dabede sę yaibao. 24 Tama te tǫde elalubo ni dabe tigidaligo te tiwai bugagia konemainu yaibao, ena Genuai Bidi, eno te bobobage ni gela mubo dao, me eno te dwasianu ni dabe bobobage pedalumainu ilibo dao. Eno te yabe elalubo ni dabe sasia palobo sę ilibo dao. Me te sasia pali ni dabe da, te augwali yabe ma holobo sę ilibo dao. Ena Genuai Bidi, eno te po walio, tama eno te wali po gilama te tigidali sę ela silaibao,” wali.

Copyright information for `MPS