a[Ais 34:5-17; 63:1-6; Jer 49:7-22; Ese 25:12-14; Amo 1:11-12; Oba 1-14; Mal 1:2-5]

Ezekiel 35

Godigo Idom dabe dolaibao

Genuai Bidigo enabolo te po walali, “Tǫde bidio, nago kantri Idomba tonama, tama nago te po wao, te kantri Idom dolaibao po wao. Nago kantri Idombolo e tama po wao, ‘Ena God Genuai Bidi, eno dage Idom dabego bulu du dabe dali boi bidi homu ebao,’ po walao. ‘Te eno dage dali bomonama eyu, dolama, tagalama, tama dagego tǫ olo tǫ tiwai pedalumainu ilaibao. Tama eno dagego taun dabe dolaibao, tama dagego tǫ dwai olo elaluaibao. Tama tiyu, dagego koneaibao, ena deli naga ena Genuai Bidi yabao homu koneaibao.’ Te po wao,” wali.

“Te po me augwalibolo wao, ‘Polobadu mu dage Idom dabego Israel dabe dali boi bidi elaluai dao, me eno te Israel dabe dolali sogo, me eno te boi bidi dabe tagala palama, augwali dali hwįagasali sogo me, dagego te Israel dali boi bidi elaluai dao. Te sogo asali boi bidi dabe dage Idom bagego tau selama, te Israel dabe elama, isilai dao. Tama tibaso, ena tigidali sogo bidibo God eno mu po mu e obao. Te boi bidi dabego dage elama, isilaibao. Te augwaligo dage munu me ma geda mugobeo. Dagego bidi dabe ela mubo kolesaga ebode hagela homu ebeo. Tialima, boi bidi dabego dage ela mubo kolesagade gagamua sogobeo. Te eno te kantri Idom we bidi sese ela silama, tama te kantri Idom te olo bulu mu pedalaibao. Te eno te boi bidi dabego dage Idom dabe elemainu ilaibao, tama dagego tigi dabego te bulu du dabe, me odogo malu dabe mesega siyu yaibao. Te eno dagego kantri olo bulu elalumainu ilama, tama te tiwai tigidali sogo tama elalua paibao. Tama dagego taun dabede bidi munu me ma bidigobeo. Tama tiyu, dagego e tama bugagia koneaibao, ena deli naga ena Genuai Bidi dao homu yaibao.’ Te po me pusao,” wali.

10 “‘Dage Idom dabe, dagego ena God Genuai Bidi eno te kantri si Israel de Judade bidiba homu me yai menio, te augwali eno we bidi dao. Megi da, dagego te po wali dao, dagego augwali hani sigo tǫ saibao po te wali dao. 11 Tama tibaso, ena God Genuai Bidi, ena tigidali sogo bidibo da, tama eno mu po tama dage dali obao, eno dagego dwai kolesaga wei ponaibao. Dagego Israel dabe godolo munu ma me ebeo, tama dagego augwali dali sębę elama, tama dage augwali dali haliga dwai mu yai dao. Tama tialima, eno dagego te augwali dali yali dwai kolesaga wei dolo ponaibao. Tama te Israel dabe augwaligo ena bugagia mu koneaibao. 12 Tama dage Idom dabego e tama bugagia koneaibao, ena Genuai Bidigo dage Idom dabego Israel tǫba dwai po e tama wabo odali da homu yaibao, “Te Israel dabego bulu du dabe polo dolai dao. Tama megi da, da Idom bage dago te tǫ kantri selama, tonaluaibao.” Dagego te po wabo eno odali. 13 Dage Idom dabego ena dali hagoma elama, tama dagego ena posobo po olama, tama dagego ena dali dwai po wai dao. Tama eno dagego te po odai dao. 14 Tialima, ena God Genuai Bidi eno te po e obao, eno dage sese tama mu dolama, tama gasa meba kantri we bidigo sulama, tama augwali wiegi yai homu pemene yaibao. 15 Dagego te eno we bidi Israel dabe dolobode dage wiegi yai homu pemene yai dao. Tialima, eno dage Idom dabeba me deli tiwai sę naga elama, dage Idom dabe me dolaibao. Tama te bulu du Seir, me te gasa bulu dabe te kantride elalubo bulu dabe te olo bulu mu pedelaibao. Tama te Israel dabe augwaligo e tama bugagia koneaibao, ena deli naga ena Genuai Bidi dao homu yaibao.’ Te po te Idom bagebolo wao,” Genuai Bidigo enabolo te po wali. a 

Copyright information for `MPS