Ezekiel 4

Esekielgo te Jerusalem dolabo po pusali

(Dąį 4-24)

Te boi bidi dabe augwaligo Jerusalem dolaibao po wai

Te Godigo te tiwai tama po wali, “Tǫde bidio, nago te brik me deli sigi pelama, te tǫba munama, te Jerusalem piksa noma tiwai te daide ugadu todogo pao,” wai dao. “Tama te brik pąde, nago te amigo te taun me deli bagua selama, te we bidi augwali dali boi hwįnama, te taun sainu eyu, te tigidali sę yabo nai piksa nigibo tiwai yao. Te tǫ te taun obo pąde te tǫ du tiwai me nigao, te ami bidi dabe augwa te daiba bugagia dolugulama, boi hwįabo pesage tiwai piksa nigao. Te ami dabego bidabo pesage te taun pąde nigibadi, te taun aluabo masin dabe piksa me nigao,” wali. “Nigila silama da, teda te aingo nigai nai ulubo pou me deli selama, te nage dali te brik dali tomode ugaba dodolama, te obo dodolao. Tama nago te taunba tonaluao. Te Israel we bidi augwaligo nago te tebo sę sulama, te augwaligo konemainao, nosali te ami bidi dabe asama, te Jerusalem aiyaba elalueibao,” wali.

“Nosali nage te naga pobase nogo badu pigusao, te nago naga we bidi Israel augwaligo sęgę ebo koneaibao. Nage pilamubadi, te 390 dei te sogoba usu naibao. Te 390 dei wali, te 390 yia dąį ilama obao, te tama kibu bede usu nama, te Israel tǫ kantri we bidi augwa yali sęde sęgę tolaibao,” po walio. “Te nago silibo sogo da, teda nage te naga dolo nogo badu te 40 dei piao. Tama nago te naga we bidi Juda tǫ kantri dabego sęgę pedalubo koneao. Te 40 dei wali, te kibu be 40 yiade te Juda dabe augwa yali dwai sęde sęgę tolaibao,” te po olama, wai dao.

“Te nage pila mubo sogo da, teda nago te boi bidi dabego te Jerusalem sainu ebo piksa nomaba tonaluao. Tama nago te hwįabo sisi elalubo tiwai elalu, te nago te tiwai po wao, ‘Te taun da dolaibao,’ wao. Te nago tigi te eno haligago kęnama, te nago tigi begelainu ebaso usu egobeo. Nage te tiwai tama me pila mudubadi, te eno nage dąį ilali sogoba usu nubaso da, te usu dao.”

“Megi da, nago te wit meba sobadi, te rais bali me, te tobage tęgabi si me sobadi elama, te wit tiwai nai si me sao. Te nai tigidali deliba sisinama, te belegelama, bret nigao. Nago te tobage bret naga pibo badu munama tudubadi, te 390 dei wali sogoba usu nubo sogoba usu naibao,” te po walio. 10 “Nago te tiwai 200 gram tobage bret te deli deli sogo tudao, te wali nago edelamu dao. 11 Te nago ąį tuabo me dąį elalueibao. Nago te ąį kap delide deli deli sogo tuao. 12 Tama nago te bidigo di selama, elaluao. Tama te di wa pabo si da, teda nago selama, te nago isi tiwai elaluyu, tego te bret ulao. Tama nago te tama sę ebo te we bidi augwaligo sumainao,” wali.

13 Te Genuai Bidigo po te tiwai ma walio. “Nago te tama tebo kolesaga te Israel dabego yabo kolesaga dąį ilibao. Nosali eno te boi bidi dabe te Jerusalemba hwįgi pomainu sula tagalaibao, tama te Israel dabe augwali te gasa tǫ kantriba sela paibao. Tama augwali te tǫ kantri dabede bidalu, augwaligo te eno gedude dwagi yai isąwai meda yai nai dabe tueibao,” Genuai Bidigo te po wali. 14 Ena Esekiel eno te tama po odama, eno te tiwai po wei ponani, “God Genuai Bidi, hobede mu ebao. Eno te tama kolesaga munu me ebeo. Mu menio. Eno digi eno meda yai sę nago gedude me ebeo. Te ena dwasianu ogwade bidali sogo, te eno te kibu aga digi isai kibu me, ma hasa mi, te uni hasa dabego ela muani tusiąbadi, te megi bidibo sogoba usu nagasobao. Te bomo yai pode habu seleyu, te nago gedude meda yai nai, te tiwai nai deli eno me tubeo,” eno te po wali. 15 Godigo te po wabo odama, te po wali, “Te nago tama homu ebaso da, teda nago bret te bidigo di olali iside te nai ulugobeo. Menio. Nago te kibu bulmakau dide naga ulagameo,” te po wai dao.

16 Te Godigo po ma weyu, te tiwai po wali, “Tǫde bidio, eno te Jerusalem dabe te nai mu sǫą pabo sę ilaibao. Tama te we bidi augwali dwai midigi selama, te sęde haliga sęgę mu yaibao. Tama te we bidi dabe augwa te nai me wę bugagia dagalaibao, te augwaligo deli deli side tuabo nai dagalobo sę eyu, tama yaibao. 17 Awe, te augwali nai me wę mu sǫą paibao, tibaso te augwali haliga sęgę dwai mu yaibao. Augwali te dwai sę ebo bidi naga da, tibaso te eno augwaligo nai sǫą palaibao, tibaso augwali mu nomona selama, dili pulu hania mu pedelaibao,” te po wai dao.

Copyright information for `MPS