a[Prs 19:36]
b[Sai 12:1-20; Nam 28:16-25]
c[Prs 23:33-36; Nam 29:12-38]

Ezekiel 45

Te Israel dabe augwaligo Genuai Bidigo tǫ pedai me deli sa mumainao

Genuai Bidigo po ena dali genina ma weyu, e tama po wali. “Te dage kantri Israelba ma peyu, tama deli deli haniba tǫ dobabo sogo da, teda dagego ena Genuai Bidibolo tǫ genuai pedai me dąį ilao. Te tǫ bobobage te 12 kilomita usu nama, me genuai yali te 10 kilomita usu nama dąį ilao. Tama te tǫ pedai te eno tedali gasagi yai tǫ dao. Tama dagego eno te tǫ tomode deli me dąį yao, te eno tempel be tede sę yabo digi. Te tǫ me si me si bogo badu te deli tiwai usu naga emainao, te 250 mita usu nama. Tama dagego te tempel be sę yabo pedai tǫ bagulali tǫ me dąį ilao. Tama agai genuai te 25 mita usu nama magi yao. Tama te namba 2 tǫ pedai te olo tǫ elaluaibao. Tialima, dagego eno pedai genuai si pedao, tama te si te deli usu tiwai si naga emainao. Tama te tǫ bobobage si te deli deli te 12 kilomita usu nama, me genuai yali te si te 5 kilomita usu nama dąį emainao. Te tǫ pedai te me te pris dabego tǫ dao. Te ena be elalubo pesage te tǫ dao. Te pris dabe augwali ena pąba asobo dao, augwali eno be tomode sę yainogo, augwaligo augwa be te tǫde sę emainao, te eno augwali dąį ilali te eno tǫde. Tama te tǫ pedai te ena obode dao. Te da te ena tǫ mu dao. Tama te tǫ te tedali gasagi yai mu dao. Tama eno tǫgo namba 2 pedai te eno Livai dabego tǫ dąį ilibao. Te Livai dabe augwaligo eno tempel bede sę meba ebo dao. Tama augwaligo augwa taun tede nigimainao, te tǫ pedaide,” wali.

“Dagego pris dabego tǫ bogo badu gasa tǫ me ma dąį ilao. Te tǫ bobobage te 12 kilomita usu nama dąį iliyu, me agai genuai te 2 olama, hap kilomita usu siyu yao. Te tǫ da, te tigidali Israel we bidi dabego tǫ dao. Te augwaligo genuai taun te tǫde nigimainao,” Genuai Bidigo te po wali.

Godigo kingo tǫ sa muani

Genuai Bidigo po genina ma weyu, e tama po wali, “Dagego kingo tǫ pedai si dąį iliąo. Te hasia wabo tǫ pedai te giliga asobo badu elaluaibao. Te eno tǫ me dagego genuai taun bogo badu tǫ bogode tama pelama, te giliga asobo badu tama usu nigi paibao, te kantri sabi simanigi paliba usu nigi paibao. Tama si wabo pedai te giliga dega sabo badu elaluaibao. Te eno tǫ me genuai taun pedai bogo badu, tama te kingo tǫ pedai sigo te kantri mesegela saibao. Te giliga asobo badu gagalama, tama te giliga dega sabo kantriba tama usu nigi paibao. Te tǫ pedai te deli deli Israel hani dabego augwa we bidi dobabo tǫ pedai dao. King aga tǫ tali elaluaibao, tama agai te we bidi dali dwai sę me egobeo, te king dabe augwalibolo eno polobadu mani king dabego yali gilama, tama agai Israel dabego tǫ sidali weyu,” wali.

“Ena God Genuai Bidi eno te tama po wali. Dage Israel dabego tobolu bidi dabego dwai kolesaga tagaliąo. Dagego we bidi dabe dali bomonama dwai sę elama, tama dagego augwali aiyaba elaluai dao. Tama tialima, dagego te dwai kolesaga dabe tagalama, tama dagego doloba pai kolesaga naga dolo iyąo. Tama dagego eno we bidi augwa tǫde sela sąbo kolesaga tagalao. Ena God Genuai Bidi, eno te tama po wali dao,” wali.

Te Israel dabe augwaligo tigidali nai dolo dobola somainao

10 Genuai Bidigo po genina ma weyu, e tama po wali, “Dage Israel dabego tigidali nai dabe dolo tiwai si naga dobola siąo. a  11 Efa te wa pai nai dabe skel ebo nai dao, tama bat te ąį dabe skel ebo nai dao. Tama te efa me bat si te deli tiwai usu si naga elaluyu emainao. Tialima, nogo si efa te homa nogi wabo usu sabo nai me deli usu nama dao. Tama te nogo si bat te homa ma kor usu nama dao. Homa te tigidali haniani nai dabe skel ebo nai dao. 12 Te nai nai dabego sęgę skel ebo skel da, e tama da. Te 20 gera te skel deli usu nama dao. Me te 60 sekel te mina deli usu nama dao,” wali.

13 “Te dagego te nai dabe enabolo ofa tiwai sesebo sogo da, dagego te tama nai dabe skel eyu yao. Dagego tigidali 60 kilo wit me bali bugwai deli ofa eyu yao. 14 Tama me dagego 100 lita ni oliv du wel bugwai deli ofa eyu yao. 15 Tama me dagego te tigidali 200 sipsip kibugo dagego wę hauwa elalubo tǫde nosai tubo te sipsip bugwai, me deli dagego ofa eyu yao. Dagego te nai dabe te wit ulubo ofa yainu, me isigo mu dela silabo ofa yabo nai, me ena dali haliga deli yabo ofa yabo nai tama seseyu yao. Dagego te ofa eyu da, teda eno dage Israel dabe sesego sęgę sela sąwaibao. Te da God Genuai Bidi eno po dao,” wali.

16 “Tigidali we bidigo te ofa yabo nai dabe tigidali tama Israel dabego king pageba sesiąo. 17 Tama kingo te sesali naigo te isigo sese dela silibo ofa mayu, me wit ulubo ofa mayu, me wain gelebo ofa mayu yao. Kingo te ofa dabe te genuai sogo dabe, te gesi polua nanibo sogo, me Sabat side, me gasa meba genuai bodolu muani sogo eno Israel dabe augwalibolo mani, te si pedalobaso augwaligo te ofa yabo nai dabe seseyu yao. Tama me, agai Israel we bidigo sęgę sela sąyabo ofa me mayu emainao. Te da te sęgę sela sąbo ofa dabe, me wit ulubo ofa dabe, me isigo sese dela silibo ofa, me ena dali deli haliga ebo ofa mayu yao,” te po wali.

Te lotu po wabo genuai sogo

18 “Ena God Genuai Bidi, eno e tama po obao, te hasia wabo dei te hasia wabo poluade nago te gesi kau kibu omai agai tigi kenigo me dolisąma yai selama, ofa yagasao. Te ofa ebo te eno tempel be te eno gedude wiegi yai pedelemainu yaibao. 19 Tama pris bidigo te sęgę sela sąbo te ofa ebo te kau kibu kaneme selama, tama eno tempel be ni posde pilaibao. Te eno be sunumi si badu elalubo pos nide, me te alta me si me si te dage badu piliyu, me te eno be bagulali te si wabo obo sunumi te pos ni dabede piliyu tama yao. 20 Tama nago deli tiwai kolesaga naga te hasia wabo poluago te 7 wabo deide nago te tiwai kolesaga naga yao. Tialima, bidi mebago augwa kolesaga bugagia homu kone palisąma, tama augwaligo sęgę saibaso da, ma augwaligo augwa sęgę sali konesiąwai baso da, teda te augwaligo te kolesagago eno be meda ilibo dao. Tama te ofago eno be wiegi yai ma pedelaibao,” wali.

21 “Te hasia wabo poluago 14 deide da, dagego Godigo Israel Dabe Augwali Olo Bugagia Bidimainu Sula Tagalali Sogo dąį ilao, te Pasova bodolu muani sogo dao. Tama a naga olama, si sogo bididubadi, dagego te yis musiąwai bret tuiąo. b  22 Te genuai sogo dabego hasia wabo deide da, dagego kingo te kau kibu omai me deli te pris dabebolo menama, tama te kingo me te tigidali we bidigo sęgę sela sąbo ofa emainao. 23 Tama te Yis Meni Yai Bret tubo sogo da, te Sarere me deli dao, te kingo ena Genuai Bidibolo agai a naga olama, si kau kibu omai, me a naga olama, si sipsip kibu omai mayu emainao, te isigo sese dela silibo ofa tiwai dao. Agai wiegi yai hasa dabe naga somainao. Te hasa dabe augwaligo tigiwali te kenigo me dolisąma yai sao. Tama me tigidali sogo kingo meme kibu omai te sęgę sela sąbo ofa tiwai eyu yao,” te po wai.

24 “Tama me kingo 14 kilogram wiegi yai plaua, me 3 lita oliv wel te deli deli kau kibu me sipsip kibu dabe dali mayu yao. Tama te pris bidigo te kau kibu o sipsip kibu ofa ebo sogo, agai te plaua me, wel me ofa eyu emainao,” wali.

25 “Te Osogo Bidabo Bede Bidibo Genuai Sogo te 7 wabo poluago 15 deide gagalama, tama a naga olama, si sogo tama bidaibao. Tama te sogo te king agai te Yis Meni Yai Bret tubo sogo sesebo ofa tiwai mu sesemainao. Te tigidali sogo agai deli namba tiwai kau kibu me sipsip kibu ofa yabo sesemainao, te isigo sese dela silabo ofa, me te sęgę sela sąyabo meme kibu deli. Tama agai deli tiwai skel yai witgo nigai plaua me, oliv wel me sesao, te ofa yabo,” God Genuai Bidigo te po wali. c 

Copyright information for `MPS