a[Prs 25:10]

Ezekiel 46

Godigo kingo yabo ofa po wali

“Ena God Genuai Bidi eno te po obao. Te tigidali wikde te giliga asobo badu te namba 2 obo sunumi te a naga olama, deli, te 6 tama sogo te sę ebo sogo te be sunumi palialumainao. Tiali goli, augwali te sunumi te Sabat side, me gesi poluago genuai sogo naga dayu emainao. Tialima, te lotu po wabo sogo te king aga eno obo tomoba tula asomainao. Tama king aga genuai sisinibo pesage tagalama, tama aga te giliga asobo badu te si wabo obo sunumi tomoba pomainao. Tama aga sunumi pąde dolaluyu, tama agai altaba ugwaba tonomainao. Tama te pris dabe augwaligo kingo sesali te nai dabe ofa emainao. Te da te isigo sese dela silabo ofa, me homu ena dali deliba yabo ofa dabe dao. Tama king aga bogoli sugunama, tama agai mage basi giluama, tama enaba lotu po omainao. Tama nosali agai te pesage tagalama, tama genuai sisinibo pesageba pomainao. Tiali goli, te pris dabe augwaligo te sunumi dalalubadi, be pioba usu nigi pomainao, tama piode ma paliao. Tama te lotu wabo genuai sogo dabe te we bidi augwali te bede sisinibo pesage genuai te si wabo obo bulu badu sisalumainao, te eno gesabidide. Tama augwali bogoli sugunama, enaba lotu omainao,” wali.

“Te tigidali sogo Sabatde kingo a naga olama, deli, 6 sipsip kibu wai, me sipsip kibu omai te isigo mu dela silabo ofa eyu emainao. Agai te sipsip kibu dabe te augwaligo tigiwali kenigo me dolisąma yai te wiegi yai kibu naga sao. Agai te 14 kilogram wiegi yai plaua te sipsip kibu omai dali seseyu emainao. Tama me agai te sipsip kibu gǫų dabe dali aga homugo plaua sesemainao. Tama agai te plaua sesali tiwai skel te oliv wel me sesemainao. Tialima, agai 14 kilogram plaua seseyu da, teda agai 3 lita oliv wel dali sesemainao,” wali.

“Te gesi poluago genuai sogo te king agai te e tama ofa yabo nai dabe naga seseyu emainao. Te kau kibu omai deli, me a naga olama, deli, 6 sipsip kibu gǫų, me sipsip kibu omai deli tama seseyu emainao. Agai te hasa dabe te keni dabego augwaligo tigiwali dabe me dolisąma yai seseyu emainao. Agai te 14 kilogram wiegi yai plaua te kau kibu omai dali seseyu, me 14 kilogram plaua wiegi yai te sipsip kibu omai dali sesemainao. Tama me agai aga homugo plaua te sipsip kibu gǫų dabe dali sesemainao. Tama agai te sesebo plaua skel usu te oliv wel me agai sesemainao. Skel da e tama dao. Ma, agai 14 kilogram plaua seseyu da, teda agai 3 lita oliv wel seseyu emainao. Te king agai enaba lotu po wainu da, teda aga te genuai sisinibo pesage tagalama, tama aga te giliga asobo badu be sunumi namba 2 obo badu tomoba pomainao. Tama pelama, te sunumi pąba bidigi pomainao. Tama agai lotu ola silama da, teda aga te asali te sunumidu ma teda solama, tama aga te genuai sisinibo pesageba ma asomainao,” wali.

“Te we bidi augwali ena Genuai Bidiba augwaligo te lotu wabo sogo naga lotu wagasiyu yaibao. Tialima, augwali u not badu genuai obo sunumi badu tomoba asai baso da, teda augwali lotu ola silama, tama augwali u saut badu te genuai obo sunumi badu buluba ma pomainao. Tialima, augwali saut badu obo sunumi badu tomoba aselama, lotu wagasai baso da, teda augwali te not badu te obo sunumidu buluba ma somainao. Augwali augwa te asali sunumidu deli naga augwali ma pelamo, menio. Augwaligo te obo gasa sunumidu taga pao. 10 King aga eno obo tomoba te we bidi tomoba tula pabo sogo tula peyu emainao. Tama agai te we bidigo te obo taga soabode, agai me taga somainao. 11 Te lotu po wabo sogo dabe da, te we bidi augwaligo ofa nai mawainogo da, augwaligo 14 kilogram wiegi yai plaua te kau kibu omai deli deli dali mayu, me te sipsip kibu omai deli deli dali te 14 kilogram wiegi yai plaua dali mayu emainao. Tama augwaligo augwa homugo plaua meba selama, tama augwaligo te sipsip kibu gǫų dabe dali sesemainao. Tama augwaligo te sesebo plaua skel usu nama, te oliv wel me tama sesemainao. Te skel da e tama dao. Ma, augwaligo 14 kilogram plaua sesaibaso da, teda augwaligo 3 lita oliv wel seseyu emainao,” wali.

12 “Tialima, king aga homugo ena Genuai Bidiba ofa yabo nai dabe sesebaso da, te isigo dela silabo ofa, ma ena dali homu deli yabo ofa yabo nai seseyu da, teda te pris bidi dabe augwaligo te giliga asobo badu te si wabo obo sunumi badu sunumi dayao. Tama king aga te pris dabego agai ofa ebode te obo sunumide bidimainao, te agai te Sabat side ebo tiwai tama yao. Agai lotu ola silibo si da, aga te be taga solama, tama te pris dabe augwaligo te sunumi ma palimainao,” wali.

Godigo tigidali bubuga side ofa dabe po wali

13 Genuai Bidigo po genina ma weyu, e tama po wali, “Tigidali sogo kigamu dagego sipsip kibu gǫų deli agai tigi kenigo me dolisąma yai, tama agai kibu be deli yai tama seseyu yao. Tama dagego ena Genuai Bidibolo te siago mu dela silibo ofa mayu yao. Dagego te tama tobage ofa tigidali be posobo sogo eyu yao. 14 Tama me ma dagego tigidali sogo kigamu dagego wit ulubo ofa te siago mu dela silabo ofa dali uluyu yao. Dagego 2 kilogram plaua selama, tama 1 lita oliv wel dali begelao, te wit ulubo ofa yainu. Te tigidali sogo kigamu ofa ebo bomai po te tigidali sogo nosali me ma elalua paibao. 15 Tigidali sogo kigamu dagego sipsip kibu gǫų, me plaua, me oliv wel seseyu yao, te siago sese dela silabo ofa tiwai tama,” te po wai.

King bidigo tǫ po

16 “Ena God Genuai Bidi, eno e tama po obao. Tialima king aga ogwa me delibolo aga tǫ me togwa mani da, teda te tǫ te wai aga tǫ elaluyu, tama aga hani we wai tǫ nosali me elaluaibao. 17 Tiali goli, kingo agai tǫ meba aga sę bidibolo me mani da, teda te tǫ kibu be 50 wabode te tǫ king aga tǫ ma gagawaibao. Te kibu be da, te nai dabe ma wei ponobo kibu be dao. Te tǫ te king aga wai puluba dali augwa tǫ dao. Te king aga hani mu augwali te tǫ aya mu dao. a  18 Tama me ma king agai te we bidigo tǫ wi me selamu dao. Tialima, agai aga wai puluba bolo tǫ pedai me mawainu da, te agai aga tǫ pedai mu naga momainao. Tama tiyu da, eno we bidi augwa tǫ elaluyu, tama augwali tǫ sǫą pai me elalugobeo,” God Genuai Bidigo te po wai.

Esekiel agai ofa ulubo pesage dabe suali

19 Te bidi agai ena odasa, te pris dabego be gesabidi badu bilibo sunumiba odasa pali, te Godigo tempel be not badu. Tama te bilibo pesage te pelama, te tǫ dage me te giliga dega sabo badu elalubo suali. 20 Te bidigo enabolo e tama tiwai po walali, “Te da, te pris dabe aselama, tama te kibu mi senede uluyu yabo digi dao, te sęgę sela sąyu, me dwai kolesaga dodolabo ofa nai uluyu yabo pesage dao. Tama augwaligo wit ulubo plaua ofa siyu elama, tama augwaligo tede ulaibao. Te pris dabe augwaligo te ofa te genuai sisinibo pesageba sela pigio. Tiyu, augwaligo te ofa maiabo naigo te we bidi dolidali weyu,” wali.

21 Tialima, te bidigo ena te tempel be bulu badu elalubo te bidi sisinibo pesage genuaiba odasa pali. Tama dadi si te sisinibo pesage me si me si dage badu odasa pali. Tama eno te dage badu deli deli badu te tǫ dage elalubo suali. 22 Tama te tǫ dage te deli tiwai usu ni naga elaluali, te bobobage te 20 mita usu nama, me genuai yali te 15 mita usu nama dao. 23 Tama te tǫ me si me si deli delide te masigigo nigai sai bagulai elaluali. Tama te sai dologode te sia nogobo pesage dabe elaluali. 24 Tialima, te bidigo enabolo e tama tiwai po walali, “Te Godigo tempel bede sę ebo bidi dabe augwali te kibu mi ulubo te pesage dabeba te we bidigo ofa yabo nai sesebo teba ulugi pomainao,” wali.

Copyright information for `MPS