a[Sai 34:11-16; Bom 7:1-5]

Ezra 9

Te Juda dabe mebago te Godigo bomai po wali pisąbo Israel hani isąwai bidi dabego wegi sesa pali

Dago te sę tigidali ela silama da, teda dago te polalubo bidi dabe aselama, tama enabolo te tiwai po wagasalio, “Odao. Te pris dabe, me Livai dabe, me te dago we bidi tigidali te Godigo po odisąbo bidi hani bage digibulude me bidibeo. Menio. Augwaligo te Kenan dabe, me Hit dabe, me Peres, me Jebus, me Amon, me Moap dabe, me Isip dabe, me Amor dabe, te tama hani dabego ebo dwai kolesaga wali pobao,” wai. “Da te Juda bidi dabego te hani bidi dabego wegi sobao, tama te da Godigo dolo mu sa muani tedali gasagi yai we bidi hani te Godigo bomai po odisąbo bidi hanigo kolesagaba palio. Te polalubo bidi dabe me, te ofisa dabego me, te tiwai e hasia bolo ebaso, tama te gasa we bidi dabego augwa me te dwai kolesaga ela palio,” augwaligo te po wai.

Eno te po odolama, tama ena haliga sęgę dwai mu yai. Tama te ena ugwa pisilama, tama ena tobolu nisi meba me, te penane nisi badi, te gudalio. Tama eno homu te mu umuna selama, tama ena te olo dugulalualio. Ena dugulaludubadi, te pio ofa eboba usu nanio. Tama te we bidi dabego koneani, te da Israel dabego Godigo te dwai sę ebo we bidi dabeba te haliga sębę ebao weyu, tama augwali wi dwai mu yai. Tama hauwa te ena dulalu bidibo madiba aselama, sisinagasalio. Te ofa ebo sogoba sabalobaso da, teda ena hodaluama, tama ena kidu sugunigulama, tama gedu haluasa po weyu, tama te eno nogo si te Godiba ugwa sali, te eno Genuai Bidi dao. Eno te pisawali ugwa te ena tigide digi gudalualio. Tama eno gedu haluasa po te tiwai wali, “God, te ena genuai hale mu elalubao. Tama eno homugo te eno gedu haluasa po nageba wagasogobeo homu yai. Dago te dwai sę hauwa mu yalio. Tama dago sęgę te pobele bage pesage genuai moni bage me deli te dagaluba usu nainu holobo tiwai mu ebao,” wai. “Te wąį nǫų dabe bidada asali, te megi e sogoba usu nagasobo sogo, da nago we bidi dabe dali, te king dabe me, te dago prisgo me, te dwai kolesaga umabo eyu, sęgę umabo siyu yai dao. Tama tibaso, nago te gasa bulu tǫ pedai king tagala palama, te da elagaselama, tama dago doado bage wi siyu elama, tama da te digibulu buluba te kalabus bidi sela pabo tiwai yai. Tama tialigo te da hani dabe polobadu te hale dwai mu yali, tama megi me da te tiwai me bidibao,” wai.

“Tiali goli megi da, God, dago Genuai Bidi, nago te olo tau mabo wiegi yai kolesaga te daba gagalama ma yalio. Tama da dwasianu hani naga te kalabus yali pesage tagalama, tama da te Jerusalemba ma asai, te naga wiegi yai bulu digi dao. Tama nago bomo dabolo megi ma mobaso, te da bugagia bidibao, da te gasa hanigo olo sę bidi bidibo tiwai ebadi digi te tagalao wali. Te mu tama da, te olo sę bidi tiwai yali, tiali goli te nago dade homu kone ebo te me tagalogobeo. Menio. Nago daba te olo tau mabo wiegi yai kolesaga eyu, tama nago te Persia king dabego dabolo wiegi yai haliga emainu ilali. Tama nago te augwaligo da te ma somainu elama, te nago be dolali elalubao te ma sę egi somainogo ilali. Tama nago te augwaligo da tau somainu ilama, tama augwaligo dabolo te be sę yabo doado bage tigidali mawai. Tama megi da, da te Jerusalemde bugagia dugulalu, tama te Juda gasa pedai badu me, te nago da tonalubo dao,” wai.

10 “Te dago God, mu tama, nago te wiegi yai sę dabe daba yali, tiali goli dago te nago bomai po dabe wali pisąbaso, tama dago te sę bolobaso, te da hale dwai mu ebo dao,” wali. 11 “Te profet dabe, te augwali nago sę bidi dao, te bomai po nagade digi selama, tama augwaligo dabolo pusai dao. Tama augwaligo pedauwalide nago dabolo te tama po wali, ‘Te tǫ megi dagego sabo te eno gedude wiegi yai me ebeo,’ wali, ‘magi baso meni, te tǫ pedai we bidi hauwago te dwai kolesaga eyu, tama te tǫ badu tigidali te dwai meda yai kolesaga usu nai elalubao,’ wai. 12 ‘Tama tialima, dagego te hani bidiba te dagego wegi mayu, te we te hanide siyu me igio. Tama dagego te augwali bugagia bidimainu tau me sigio, tama dagego te augwaligo mena sę yainu ebo te tau me sigio,’ wali. ‘Te dagego eno po wali pobaso da, teda duga digi te tǫde bugagia bidiyu, tama bomai hani pedelama, tama nosali te duga wąį nǫų dabe, augwa te tǫde bugagia sesemane bidada pomainogo ebo dao,’ nago te po wai.” a 

13 “Te mu tama nago te tiwai po dabolo mu tama obadi, tiali goli dago nago po sela sąyu, tama te dwai sę ebo genuai mu yai. Tama tiyu, nago da sesanobo po obao. Dago te dwai sę hauwa mu yali, tama te nago da tigidali mu doligi sogo da, te dolo igi dao. Tiali goli, te menio, nago te olo tau mabo wiegi yai kolesaga daba eyu, tama nago te dwasianu hani bidimainogo ilalio. 14 Tama tiyu, te dago nago po ma sela sąyu, tama dago wegi te hani bidiba mayu, te dago augwali hani wegi ma siyu, te haniani dwai kolesaga ebo te dwai mu ebao. Dago koneanio, te dago augwali hanigo wegimani sobaso da, teda nago haliga sębę dwai mu elama, tama nago da dolama, tama da tigidali silimainu yaibao, tama da me deli te me bidigobeo. 15 God, te da Israel dabego Genuai Bidi, nago te doloba pai kolesaga naga ebo dao. Da wiegi yai we bidi weyu, te da nage pąba me pogobeo. Menio. Da te dwai sę ebo we bidi naga dao, te dwai sęgę umabo elalubao,” eno te gedu haluasa po tama wali.

Copyright information for `MPS