a[Hi 4:4, 10]
b[Sai 20:11]
c[1 Ko 15:45]
d[Ped 2:7; 22:2, 14]
f[Mt 19:5; Mk 10:7-8; 1 Ko 6:16; Ef 5:31]

Genesis 2

Tama tialima, Godigo te dagalu e tǫ si nigila siliyu, tama tigidali nai me nigila silai. Godigo tigidali sę te nogo a naga olama, te nogo me badu wali kibisa nogode silama, tama nogo a naga olama, me badu nogo si wali tede aga olo bidai dao. a  Godigo te a naga olama, nogo me badu si wali side te dwagi yai po weyu, tama te side te gasagi yai tedali side da wai. Magi baso meni, aga tigidali nai nigibo sę ebo silibaso, te sogo God agai sę me ebeo, aga olo bidai. b  Tama tialima, Godigo te dagalu me tǫ me tigidali nai dali nigai.

Te Yawe Godigo te dagalu dali tǫ dali nigali sogo,
hasiabolo te ni me, nosa me te tǫde menibadi, magi baso meni, te Godigo te kulubage te tǫba tagala palisiąbadi tiali. Tama te sogo gi sę yabo bidi meni yai. Mu tama te kulubage menibadi, tiali goli te wę tǫdu pedelama, tama te wę pali, te tigidali bulu habu usu nai.

Tama Yawe Godigo te tǫ meba selama, tama te tǫgo bidi nigai. Tama agai bidibo ula maiabo mobo te bidigo guni tomoba ponama, tama bidi te bidibo ula pedelai. c 

Te Iden gide ni sili po

Te Yawe Godigo gi me deli te Iden bulude nigilama, te sia ge pedalubo badu elaluali. Tama te giba God aga te nigali bidi muai. Tama Godigo te gide haniani ni dabe pedelao obaso pedelai. Augwali te gasa wiegi yai au yai mu, tama augwaligo dwagi yai nai walai. Tama te gi tomode te we bidi bidibo ula maiabo ni me deli digi elaluali. Tama gasa ni me deli te bidigo mena kolesaga ebo dwagi yai dawe, ma mena kolesaga ebo dwai dawe, te konemainogo yabo du elalubo ni me deli elaluai. d 

10 Tama te Iden bulu tomode te pabo ąį gomo elaluali, tede te giba wę maiabo wę me deli pedelai. Te ąį ma peyu, tama te gi bulubadu te wę pepeda pelama, te ąį me si me si tama pedelai. 11 Te hasia wę nogi augwaligo Pison nogi yali. Te wę agai te moni tǫ Havila bagulali. 12 Te Havila bulude te wiegi yai kapa nogi gol elalubo. Tama ni me deli elalubo, te ni kaneme te wiegi yai denami elalubo, te nogi augwaligo te deliam nogi yai. Tama mama yai wiegi yai masigi dabe elalubo, te masigi nogi augwaligo oniks nogi yali. Te nai si te dila pai nai si mu da. 13 Te si wali ąį nogi me, te augwaligo Gihon nogi yai. Te agai te bulu Kus te hani bagulubo. 14 Te sela wali ąį nogi Taigris nogi yai. Te ąį pali, te Asiria moni tǫ te giliga pedalubo badu pabo. Te me si me si wali ąį augwaligo te nogi Yufretis nogi yai dao.

15 Tialima, Yawe Godigo te bidi selama, tama aga te Iden giba muani, te aga sę eyu tonalumainogo yai. 16 Tama Godigo bidibolo weyu, te bomo yai po wai, “Nago te gide elalubo nedu du tigidali meba tubaso, usu yaibao. 17 Tiali goli, nago te nedu du te bidigo mena kolesaga te dwagi yai dawe, ma mena kolesaga te dwai dawe, te ola maiabo ebo te nedu du te nago munu me tulamuo. Te nedu du nago tubo te eno nage habu mu selibao. Te nago tuali da, teda mu tama da, te sogo nage isaibao,” wali.

18 Tama Yawe Godigo aga digi homude te po wai, “Tiyu, te bidi agaduba deli naga bididalio, te usugobeo. Te eno te aga tau siyu bidabo abagi me deli nigilaibao,” te homu yai. 19 Tama tibaso, Godigo tǫ selama, tama te tǫgo agai te tigidali kibu sibi, me hasa sibi, me te ba sibi nigali. Tama Godigo te hasa me ba sibi dabe te bidi bidibo madigi selasa pelama, te agai augwali mena nogi poaibao, te konemainogo tama yai. Tialima, bidigo te hasa sibi tigidali deli delibolo nogi mena mena pali, tama augwaligo te nogi tama elaluali. 20 Tialima, bidigo te be pąde bidibo tigidali kibu me, te bulude bidibo tigidali hasa sibi me, te tigidali ba sibi me nogi mena silali. Tiali goli, aga dali te abagi olama tau siyu bidabo bidi me deli te meni yani.

21 Tialima, Yawe Godigo te bidi piao olama, isai tiwai elaluali. Tama bidi pila mubadi, Godigo te bidigo punali dili me deli selama, tama te pesagede te mi ma dąų walali. 22 Godigo te bidi punali dili sali tego te we me deli nigilama, tama te we te bidi bidibo madi odasa pali. 23 Tama bidigo te po wali, “Megi da, te usu dao. Te aga ena tiwai dao, eno abagi mu dao. Aga dili te eno diligo nigali, tama aga mi da, te eno migo nigai. Godigo aga te eno punali diligo nigai, tama tibaso eno aga nogi ‘we’ poali.”
2:23Te Hibru pogo te po si “bidi” dali, “we” dali si, te dogoni deli pąde elaluyu wabo dao.
24 Tama tialima, te kolesaga pedelali, te bidigo aya ida tagalama, tama aga we dali kęą pali, tama augwa si deli mu pedelali, te kolesaga da tomode megi te elalua pobao. f  25 Bidi de we si te augwali si tigi gudubo bolu meni yai. Tiali goli, augwa si hale me ebeo.

Copyright information for `MPS