a[Gag 12:3; Hi 11:20]
b[Gag 25:29-34]
c[Hi 12:17]
d[Gag 36:8; 2 Kin 8:20; Hi 11:20]

Genesis 27

Jekopgo aga aya tibo po ola menama, tama agai Isogo dwagi yai mobo sai

Aisak monu dabe mu elama, tama aga gedu halua selama, tama te nai dabe me, bulu ula me ma bugagia suabo ąǫ isąwai. Tialima, agai aga gomunai ogwa Iso i olama, tama agabolo te po wali, “Ogwao!”

Tama Isogo po wei ponani, “Awe, ena e bidibao,” wali.

Tama Aisakgo te po wai, “Ena monu dabe elama, tama ena pąde isainu ebao, te ena isabo sogo eno konebeo. Tama nago naga enesigi me ene dali selama, tama nage busiba pelama, tama eno hasa me deli gegegi pao. Te nago gegelama, subosi da, teda nage pelama, te eno godolo ebo nai ulama, tama nago enaba selasa asao. Te eno te nai tulama da, tama eno nagebolo te Yawego nage dali dwagi yai tau sabo sę emainao po menama, tama nosali ena isaibao.” Aisakgo te po Iso dali wali.

Tiali goli, Rebeka agai odali, te Aisakgo aga ogwa Iso dali po mibo odali. Tialima, Iso te aga ayago tuabo hasa me deli te busiba gegegi peyu pai madi, Rebekago aga ogwa Jekopbolo te tiwai po wali, “Megi tama eno odali, te naga ayago te po nago ama Isobolo mabo po eno odali, ‘Te hasa me deli selasa asama, tama ena habi nai meba ula magasao,’ po walio. ‘Tama tialima, te nai eno tulama da, tama eno te Yawego nage dali dwagi yai tau sabo sę emainao po te nagebolo Yawe gedude mawaibao,’ wai, ‘tama nosali ena isaibao,’ naga ayago Isobolo te po wai. Te megi da, te ogwa, te nago eno po bugagia odama, tama eno nagebolo po wabo gilama te sę yao. Nage te kibu sibi bidalubo obo elalubo teba pelama, tama te wiegi yai nisai meme wai si te enaba selasa asao. Tama eno te nago ayago godolo ebo te tobage wiegi yai nai ulaibao. 10 Tama nago te naga ayabolo magi pagameo, te agai tuaibao. Tama nosali agai isisąbadi, agai te Yawego nage dali dwagi yai sę emainao po nagebolo mawaibao, tama nosali aga isaibao,” wali.

11 Tiali goli, Jekopgo te tiwai po aga idabolo wei ponani, “Nago koneani, Iso tigide te tigi tu nisi hauwa elalubao. Tiali goli, ena tigide te menio. 12 Tama tiyu, ayago eno tigi nogo diąnama, tama agai homugo te eno aga usu suyu, tama tibo po ola mabowe te homu idalio. Tiyu, agai wado po weyu, te aga God i olama, ena dolidalio, tama eno te Yawego ena dali dwagi yai sę emainao po me sigi pogobeo,” wali. 13 Tiali goli, aga idago te po wai, “Ogwao, tagalao, enade digi te dolobo sę pedalumainao. Tiali goli, nago da, te eno nagebolo wabo po gilama te sę yao, tama nage pelama, te meme si sela asa,” wali.

14 Tialima, Jekopgo te meme si sigi pelama, te aga idabolo magasali. Tama Rebekago te Jekop aga ayago godolo mu ebo nai te ulai. 15 Tama Rebekago te Isogo gudubo ugwa dabe te augwa bidibo bede munaluali. Tama agai te Isogo ugwa wiegi yai sawi ugwa mu selama, tama Jekop te ugwa gudulama, au ilai. 16 Tama agai te Jekop nogo dali, aga nage me, te meme tigiwaligo mesegelai. 17 Tama Rebekago te ulali pusu yai nai me, te agai ulali te bret meba me selama, te Jekopbolo mani. 18 Tialima, Jekopgo te nai dabe te aga ayabolo selasa pelama, te po wali, “Ayao!” Tama Aisakgo te po wali, “Awe, ogwao. Nage de dawe?”

19 Tama Jekopgo te po wai, “Ena Iso, te nago gomunai ogwa dao. Eno nago enabolo te po wali nai sisi elasa asalio. Nage megi da hodaluama, tama eno e selasa asali nai mi meba tugulao, tama nago te Yawego ena dali dwagi yai sę emainao po enabolo magameo,” wali.

20 Tiali goli, Aisakgo te tiwai po ma wai, “Ogwao, magi ilama, tama nago te hasa polo gegaliwe?” Tama Jekopgo e tiwai po wei ponani, “Yawe te nago Godigo ena tau selama, tama tibaso, eno te hasa polo gegai dao.” 21 Tialima, Aisakgo tama po Jekopbolo wai, “Te nage pąba edaba gana dwasianu asama, te eno nage diąna suaio,” wali, “nage te eno gomunai ogwa Iso yaliwe, ma meni yaliwe, te eno sueio,” wali.

22 Jekop te aga aya pąba pelama, tama ayago aga tigi diąnama, tama bugagia koneama, te po wai, “Nago po wabo te Jekopgo po wabo tiwai obao. Tiali goli, eno nago nogo diąyani, te nago nogo te Isogo nogo tigi tu nisi tiwai yalio,” wali. 23 Aisakgo te Jekop bugagia me konebeo, magi baso meni, te meme tigi nisigo te aga nogo halualigo te nogo Isogo nogo tiwai yai. Aisakgo te Yawego aga dali dwagi yai sę eyu, tau sabo po agabolo mawainu yali, 24 tiali goli hasia agai hanaluyu bolo ma yai, “Te mu tama, nage te eno ogwa Iso dawe?” Tama Jekopgo te po wali, “Awe.” 25 Tialima, Aisakgo te po wai, “Te ulali nai mi te enaba magasao. Te ena nai tulama da, te eno dwagi yai po nagebolo mawaibao.” Tialima, Jekopgo te nai me te wain wę me sela pelama, te Aisakbolo magi pelama, tama Aisakgo te nai me wę tuali. 26 Nosali Jekop aga ayago te po wai, “Ogwao, eno homugo te nage ena pąba asama, te eno gesabidiba nono nagasao,” wali.

27 Tama Jekop te pąba pelama, tama aga dali gesabidi sebedi usuyu, nono nani, tama Aisakgo Jekopgo gudali ugwa denami odama, tama agai te Yawego aga dali dwagi yai tau sabo sę emainogo eyu wabo po agabolo mani. Agai te po wali, “Te eno ogwago wiegi yai denami te Yawego dwagi yai tau sabo po mani, te gi me deli denami tiwai gilama ebao. 28 Te eno homugo te Godigo hulide te siginibo wę tagala palomainu elama, tama nago tigidali gide nai hauwa holomainu yaibao. Te agai nagebolo te wit hauwa me, wain wę me hauwa momainu yaibao. 29 Te tigidali bulude bidi dabe te augwali nagede sę ebo bidi pedelama, tama te bidi dabe nage dologode bidaibao. Te nago te naga ama dabe tonaluaibao. Tama nago idago hani wąį dabe augwali te nage dologode bidaibao. Te Godibolo nage dolomainu i wabo bidi dabe, te augwa digi deli deli augwa ma dolomainu yaibao. Tiali goli, te bidi dabego Godiba i olama, te agai nage dali dwagi yai tau sabo sę emainu i wabo bidi dabe, augwali deli deli dali me te agai dwagi yai sę yaibao, te eno homugo te tama elalumainao,” Aisakgo te po wai. a 

30 Aisakgo dwagi yai po te Jekopbolo menama, tama Jekopgo aga aya taga pali. Tama te sogo naga te aga ama Iso te busidu ma beba sabolali. 31 Agai me te wiegi yai pusu ebo nai ulasa, te aga aya bidibo digi sela palio. Tama agai te po wai, “Ayao, nage hodaluama, te eno selasa asali nai mi meba tugulao, tama nago te Yawego ena dali dwagi yai sę yabo po enabolo magameo.”

32 Aisak agai te po wai, “Nage de dawe?” Tama Isogo e tiwai po wei ponani, “Ena Iso, te nago gomunai ogwa dao.”

33 Aisak aga dwai midigi mu selama, didibili elama, tama agabolo hanalu wali, “Tiali goli, dego hasia te hasa elama, te mi selasa, enabolo magasali bidi de dawe? Nage sabolisiąbadi, te nai eno tualio. Tama eno te Yawego aga dali dwagi yai sę yabo po te bidibolo mena silai, tama te dwagi yai po agade sesemane sogo elalua pidu, mu elalua paibao,” wali.

34 Te sogo Isogo te tiwai po wabo odobaso, polo aga dwai homu mu eyu, aga dwai gela mu wali. Tama agai te po wai, “Ayao, te nago gasa dwagi yai po te enaba me mao,” wali.

35 Tiali goli, Aisakgo te po wai, “Naga amago ena tibo po ola menama, tama agai te nagebolo maiabo dwagi yai tau sabo po sai dao.”

36 Tialima, Isogo te po wai, “Te megi e da, te agai si sogo megi ena guni tǫba ilali. Tama tiyu, te nogi Jekop te nogi page te ‘polobo bidi’ tama dao, te agade dolo mu yali. Te idago hasia ena bolo ame nani, tiali goli Jekopgo te enade elaluali te gomunai ogwa wali, te nogi agai wi sai. Tama megi me te agai te enabolo maiabo dwagi yai po wi salio. Magi yaliwe, aya, te nago enabolo maiabo po te gasa me deli sisi yai elalubewe?” b 

37 Tama Aisakgo Isogo po wei ponani, “Eno aga te nage tonaluabo bidi ilama, tama eno te aga deli kaneme te tigidali agai sę bidi pedelaibao. Tama eno te nosali pedelabo tubo nai wit me wain te agabolo mani. Megi te mena nai gasa me elalubo weyu, te eno nage momainu te ogwa nago te po obawe?”

38 Tiali goli, Isogo bomonama, aga ayabolo hanaludubadi geani, “Aya, nago te dwagi yai po deli naga elaluai dawe? Aya, nage enabolo me te Yawego ena dali dwagi yai sę emainao po mao,” wali. Isogo te po olama, tama aga moni genuai gela ma wai. c 

39 Tialima, Aisakgo agabolo te po wai, “Te nago bulu dwai tǫ te wiegi yai ili yai tǫ digibulu elaluaibao. Tama hulide te siginibo wę te nago giba me tulalugobeo. 40 Tama nage te bugagia bidiyu, te nai tuabo pesage gegeyu, te nago bainat hwą gego hwįyu, tama yaibao. Tama nage te nago amago sę ebo bidi bidaibao. Tiali goli, nosali nago hagela homu eyu, tama agai po sela sąbaso, tama agai nage ma tola sogobeo,” wali. d 

41 Isogo homugo te ayago te dwagi yai sę pedelabo po te Jekop te bolo mani, te agai homude wado ebo homu dwai mu te Jekop dali yai. Tialima, Isogo e tama homu elama, te po wai, “Te pąde dwasianu sogo naga te aya isibaso, tama dago aga homu dene yaibao. Te homu dene yali sogo sia sabo si da, teda eno te Jekop ela muaibao.” Isogo te tama homu elalualio.

42 Rebekago te aga gomunai ogwa Isogo te homu ebo po odai. Tialima, agai te aga sabi bidi ogwa Jekop i olama, te po agabolo wali, “Nago e po bugagia odao. Te naga ama Isogo te nago agabolo yali te sęde te agai nageba wei ponoyu, ela muainu te homu ebao. 43 Tialima, megi da, ogwa, te nago eno po wabo gilama te sę yao. Nage sisi elama, tama wi pelama, te eno abe Laban dali te Haran teba osogo bidigi pao. 44 Nage te eno abe aga dali bidibadi, te nago amago homu sębę yali te homu kedau elama, 45 tama agai te nago yali sęde te boi bidi homu gegeda palomainu emainao. Tama nosali eno te bidi me deli te po nagebolo wagasomainu tagala palama, tama nage eba ma odasa asomainu yaibao. Da si go tama tinao. Magi baso meni, te eno wai dage si te deli sogo hagabo, te eno homugo hagela idalio,” Rebekago te po wai.

Aisakgo Jekop te Laban bidibo madi tagala palali

46 Nosali Rebekago e tiwai po Aisakbolo wai, “Eno te Hit hani we dabe te eno mu hagela idubao. Te Jekopgo me, te Hit hani we dabego me, te e bidibo we si tiwai kolesaga ebo we sobaso da, teda ena isimainu yaibao,” Rebekago te tiwai po Aisak dali wai.

Copyright information for `MPS