Genesis 29

Jekop te Labango buluba sabolai

Tialima, Jekop te sunumidu palio. Aga pelama, pelama, tama nosali te giliga pedalubo badu bidali bidi hani dabe bidalubo pedai badu sabolai. Aga doligi pelama, tonono bilibadi, tama te nosai elalubo moni tǫde agai te kibu sipsip hani sela te wę ulu me deli tubo madi pąde pila mubo hania suali. Te sipsip kibu hani augwaligo te ulu wę tubo da, tama te ulu wę dedage palibo genuai masigi elaluali. Tama te tigidali kibu sipsip hani sisinagasa silai madi, tama te kibu tonalubo bidi dabego te ulu wę panialuali genuai masigi dagala sąnama, tama augwaligo te sipsip dabe wę mayu yai. Tama te kibu sipsip dabego wę tula silibo si, tama te kibu sipsip tonalubo bidi dabego te wę ulu palibo madi teba ma paliyu yai.

Te Jekopgo augwalibolo hanalu wali, “Abagi dede, dage mena badu bidi dabe dawe?” Tama augwaligo te po wai, “Da te Haran bulu bidi dabe dao,” wali.

Tialima, agai augwalibolo hanalu wali, “Dagego te Laban, te Nahor tego wąį ogwa koneaniwe?” Tama augwaligo te po wai, “Awe, dago aga koneanio.”

Tama Jekopgo augwalibolo hanalu wai, “Laban bugagia bidibowe?”

Tama augwaligo te po wai, “Aga bugagia bidibao. Nago suao. Resel, te agai wegi, te Labango kibu sipsip hani dali megi te asobao,” wali.

Jekopgo te po wali, “Magi yaliwe? Te giliga genuai nanalubadi, tama te sipsip dabe te obo tomoba muabo me elalubadi dao. Tagala, te augwali wę menama, tama augwali te nosa dabe tumainu ma selasa pao,” wai.

Tama kibu tonalubo bidi dabego te po wai, “Menio. Dago tama me tegobeo. Te tigidali sipsip hani sisiniyu bolo elama, tama nosali dago te wę ulu dedage paliali masigi dagala munama, tama te sipsip dabe wę mabo dao.”

Jekopgo te kibu tonalubo bidi dabe dali po midubadi, tama Resel te aga ayago kibu sipsip hani kegasa asobo suali, magi baso meni, te agai augwali tonalubo sę yai. 10 Jekopgo te Resel te aga hai te Labango kibu sipsip hani dali subaso, tama aga te wę ulu elalubo madi pelama, tama te mesegalubo masigi sela munama, tama te sipsip dabe wę mawai. 11 Tama Jekopgo te Resel dali nono nenama, tama gela wai. 12 Tama agai agabolo wali, “Te ena da, te nago ayago deli hani bidi dao, te aga abe Rebeka te eno ida dao.” Tama Resel udulama, te aga ayabolo wagi palio.

13 Labango te aga abego wai asali po odama, tama aga udulama, aga bidibo madi pai. Labango Jekop aga pagea selama, tama aga nono nenama, tama aga beba odasa pali. Tialima, Jekopgo agade yali sę po tigidali pusali. 14 Tama Labango agabolo te po wai, “Awe, te mu tama, da si te deli kaneme mu dao.” Tama Jekop aga dali bidibadi, te polua deli bidai.

Jekopgo te Resel sainu te Labande sę yai

15 Te polua deli bidama, tama nosali Labango Jekopbolo te po wai, “Nage te eno abego ogwa mu dao, tama nago te sę olo ebo da, te eno homugo usu meni yaibao. Nago te nisu naga nai te sęde nago saibawe?”

16 Labango wegi si bidali, te gomunai wegi Lea, te tomo wegi Resel. 17 Te gomunai wegi Leago gesabidi te wiegi yai mu meni, tiali goli te tomo wegi Resel te gesabi sawi yai mu bidai. 18 Jekopgo te Resel godolo mu yali, tama tibaso, agai te po wai, “Eno te kibu be nogo a naga olama, me badu si te nagede sę yaibao, te nago gesi wegi Resel sainogo tama tiaibao,” wali.

19 Tialima, Labango te po wali, “Te mu tama, eno te gasa bidiba mabo te usu dao, tiali goli te eno aga nagebolo mobaso da, te dwagi yai mu dao. Nage te ena dali bidao,” wali. 20 Tama tibaso, Jekopgo te Resel sainu, te kibu be a naga me badu si, te tama sę iduai. Tama Jekopgo te kibu be a naga me badu si te agai homu kone palali te yadela pali, magi baso meni, agai te Resel godolo mu yai.

21 Tialima, megi da, Jekopgo Labanbolo te po wai, “Te bodolu silalio. Te nago wegi ena menama, tama eno aga saibao,” wai.

22 Tialima, Labango te genuai nai te wegi sabo sogode ulainu, tama agai te bulude bidalubo tigidali we bidi dabe i olama, tama augwali te nai tuagasali. 23 Tiali goli, te sogo hulide Labango te wegi Resel mawainu yali hasegelama, te Jekopbolo Lea menama, tama Jekopgo te konesiąbaso, te Lea aga dali piai. 24 Tama Labango te Leabolo sę ebo we me deli mawai dao, te aga nogi Silpa.

25 Tama kigamu, tegoba! Jekopgo Lea sulama koneyu, tama agai Labanbolo te po wai, “Magi baso nago te tiwai kolesaga enabolo yaliwe? Eno te Resel sainu nagede sę dene ebo sę yai. Magi baso nago ena ili po ola maniwe?” wali.

26 Tialima, Labango te po wai, “Dago kolesaga te tiwai ede elalubo dao. Te gomunai wegi bolo hasia bidigo selama, tama nosali tomo wegi te me bidigo somainu ebo dao. 27 Nago tonaluyu elama, te we sabo sogo nai tuali te Sarere siligi pabode, tama eno te Resel me te nagebolo mawaibao. Tiali goli, te nago enade te sę kibu be a naga, me badu nogo si te nago sę ma yagameo,” wali.

28 Jekopgo te pode usu da po olama, tama te we sabo sogo te nai ulali Sarere deli silibode, Labango Resel te Jekopbolo menama, tama Resel te aga we mu pedelama bidali. 29 Labango Reselbolo te sę ebo we me deli mani, te aga nogi Bilha dao. 30 Tialima, Jekop te Resel dali pagelama piali. Tama agai te Resel godolo mu eyu, tiali goli agai te Lea godolo te kuna me ebeo. Tama Jekop te kibu be a naga me si te Labande sę ma iduai.

Te Jekopgo wai dabe

31 Te Yawego suali, te Jekopgo Lea te godolo kuna me isąwai. Tama agai te Lea haliga emainu tau sai. Tiali goli, Reselgo wai meni yai. 32 Nosali Lea haliga elama, tama ogwa me deli ame nani. Tama Leago te po wali, “Yawego te eno homu sęgę ebo sulama, tama megi da te eno bidigo ena godolo emainogo yaibao,” wali. Tialima, agai te wai nogi Ruben poai.
29:32Te Hibru pogo te nogi Ruben te page elalubao, te “Suao, ogwa wai dao,” te wabo.


33 Nosali te Lea haliga ma elama, tama gasa ogwa me ame nani. Tama agai te po wai, “Yawego te gasa ogwa te wai enabolo mani, magi baso meni, agai odali, Jekopgo ena kuna godolo me isąwai.” Tialima, agai te ogwa nogi Simeon poali.
29:33Te Hibru pogo te nogi Simeon te page elalubao, “te po odobo bidi,” te wabo dao.


34 Tama Lea te haliga ma elama, tama ogwa gasa me ame nani. Tama agai te po wai, “Megi da, te eno bidigo ena godolo mu elama, tama ena dali dąų olama, bugagia bidaibao, magi baso meni, te eno agai wai te ogwa sela ame nani.” Te po wai. Tama agai te wai nogi Livai poai.
29:34Te Hibru pogo te nogi Livai te page elalubao, “dąų walali,” tama wabo dao.


35 Tama Lea te tabi ma elama, tama gasa wai te ogwa ame nani. Tama agai te po wai, “Te sogo eno te Yawe nogi ugwaba saibao,” wali. Tama Leago te ogwa nogi Juda poali.
29:35Te Hibru pogo te nogi Juda te page elalubao, “nogi ugwaba sao,” tama wabo dao.
Tama nosali te Leago wai ma ame nabeo.

Copyright information for `MPS