Genesis 34

Sekemgo Daina nogo tuali

Te Daina te Jekop de Lea sigo wegi, tama me sogo agai te bulu page we dabe meba bidibo sugi pai. Hamor, aga te Hivi hani bidi me deli, aga tede tobolu bidi nigilama bidai. Agai ogwa, te Sekem, agai te Daina sulama, tama agai aga nogo tulama, tama aga dali dwai sę yali. Tiali goli, Sekemgo te Jekopgo wegi Daina te wei mu ebaso, tama agai te aga homu wiegi yai ilibo po dua digi wai. Tama nosali Sekemgo aga ayabolo hanalu wali, “Ayao, te we selama, te eno we bidaibao.”

Jekopgo odali, te Sekemgo dwai sę te Daina dali yali po, te aga wegi dao. Tiali goli, agai ogomani te augwali te kibu sipsip meme sibi dabe tonalugi peyu pai. Tama Jekopgo po me wabeo. Agai ogomani te sęba pali ma asobo tonaluali.

Tama Hamor te Sekem aga ayago te Jekop dali po miainu asai. Augwali te po midubadi, tama aga ogomani te sęba pali, ma beba asali. Magi baso meni, augwaligo odali, te Sekemgo augwaligo abe penani yali po, tama augwali homu dene eyu, sębę mu elama, tama wado po wai. Te sę te Sekemgo te Jekopgo wegi wi sali, te hale ilibo kolesaga mu te Israel dabego gedude yai. Te Israel dabe augwaligo homude, te tobage kolesaga ebo te habu mu sai elaluai.

Tama Hamorgo augwalibolo te po wai, “Sekem te ogwago te dagego wegi wei mu ebao. Tama eno dagebolo hanalubao, te augwali si sabo, usu egowe? Teda da abagi olama, te dago dagego wegi dabe siyu, tama dagego dago wegi dabe siyu inao. 10 Tama dage da dali te e tǫ pedaide bidagameo. Tama duga te bidainu yali, te tǫ pedaide bidagameo. Tama dagego dabolo nai dabe abeliyu, tama dago dageba nai abeliyu yaibao. Tama dagego te duga sainu wei yali nai te sagameo,” wali.

11 Tialima, Sekemgo te Daina aga ayabolo me aga abe dabebolo te po wai, “Te dagego enabolo usu obaso da, teda eno dagebolo te mena nai dagego sainu homugo wei ebo nai, te dagebolo eno mawaibao. 12 Tama dagego te duga sabo wei ebo wiegi yai nai po enabolo po wao. Te wegide mone nisu naga dagego muabo homu ebaso da, te usu da, te eno dage mawaibao. Tiali goli, eno homugo dagego te we enabolo menama, tama eno aga saibao,” te bidi Sekemgo te po wai.

13 Te Jekopgo ogwa dabego te augwa abe Dainade te Sekemgo dwai penani sę yali, tede homu kone palali. Tama augwaligo te Sekem dali, aga aya dali sibolo te tibo po ola mabo po wei ponani. 14 Augwaligo te po wali, “Dago abe te aga tigiwali togosiąwai bidi dali pomainogo me egobeo. Te dago tama tiyu da, teda da hale dwai mu yaibao. 15 Tiali goli, dagego e tiwai sę me deli bolo hasia yao. Dagego te duga bage bidi te tigiwali togolama, te augwali da tiwai pedaliąo, tama nosali te dago usu da po dage dali waibao. 16 Te dagego te tiwai tama tibaso da, teda dago dagebolo usu da olama, tama dagego te dago wegi dabe siyu, te dago me dagego wegi dabe siyu yaibao. Tama da dage dali hodobo bidiyu, tama da deli hani pedelaibao. 17 Tiali goli, dagego dago po wali pisąma, tama tigiwali togosiąbaso da, teda dago te dena abe ma selama, tama dago e bulu taga paibao,” wali.

18 Tama Hamor me, aga ogwa dali, augwali sigo te po godolo yai. 19 Tama Sekemgo augwaligo te po polo wali pali, magi baso meni, agai te Jekopgo wegi godolo yali. Sekem te aga deli hani bagego aga te polalubo bidi da te yai. 20 Tialima, Hamor dali aga ogwa Sekem augwali si te bidi sisinibo pesage te hanu sunumi pąde teba pelama, tama augwali sigo te hanude bidalubo gasa bidi dabe dali po miani. Augwali sigo te po wali, 21 “Te Jekop aga hani bidi augwali wiegi yai bidi hani, tama augwali da dali abagi wainogo homu ebo. Tama dago tǫ te genuai tǫ elalubao. Dago augwali te dago tǫde bidimainu emainao, tama augwa homugo bilalumainao. Dago augwaligo wegi dabe siyu, tama dago wegi dabe augwaligo siyu, tama emainu yaibao. 22 Tiali goli, augwaligo te sęde bomo mu yai, dago te dena bidi dabe augwali tigiwali togolama, tama augwali tiwai pedalinao. Te dago tama tiyu da, teda te bidi hani te da dali bidainu usu da olama, tama da dali deli hani pedelaibao. 23 Tama te sipsip meme dabe me, te walu dabe, tama augwaligo bulmakau dabe me, te augwali dago nai pedelaibao. Tiali goli, dago te sę me deli inao, te augwali da dali usu da olama bidaibao,” te Hamor de Sekem sigo te po wai.

24 Te tigidali hanude bidaluali we bidi augwaligo te Hamor de Sekem sigo po usu da olama, tama augwaligo te tigidali bidi dabego tigiwali togwa silai. 25 Te sela sogo bidama, tama te bidi dabe tigiwali togwali te dene mu iduali. Tama Jekopgo ogwa si, Simeon me Livai, te augwali si te Daina aga abe si mu dao. Te augwali sigo te moni bainat hwą ge selama, tama tibo te hanuba biligi pai. Tiali goli, augwali sigo te bidi dabe augwali ela muabo te augwaligo konebeo. Megi da, te augwali sigo te hanude bidali bidi dabe tigidali ela silai. 26 Augwali sigo te Hamor dali, aga ogwa dali si ela mubadi elama, tama augwa si abe Daina te Sekemgo bede oda selama, tama augwali pali. 27 Tama te Jekopgo gasa ogwa dabe augwali asama, tama te ela muani bidi dabe tede suali. Tama augwaligo te hanude wiegi yai nai tigidali selama, tama pali, magi baso meni, Sekemgo te hanude te kolesaga Dainade yali, te Israelgo gedude te wiegi yai me ebeo, dwai mu dao. 28 Augwaligo te sipsip hani me, te bulmakau hani me, te donki hani sobadi yali, tama augwaligo te hanude me te gide elaluai nai dabe tigidali mu sela silai. 29 Augwaligo te tigidali wiegi yai nai me, te augwaligo tigidali we wai me sali, tama augwaligo te be tomode munaluali tigidali doado bage me, te tigidali sela silama, tama augwali pai.

30 Jekopgo Simeon de Livai augwali sibolo te po wai, “Dage sigo ena te dwai ilalio. Te tigidali we bidi tede bidalubo, augwali te Kenan hani me Peres hani, augwaligo te ena godolo ma egobeo. Eno bidi dabe te hauwa me elalube, tama te bidi dabe augwa hasi te deliba sisiniyu da, teda augwaligo ena dali, te eno we wai dabe dali tigidali ela silaibao,” te po wai.

31 Tiali goli, augwali sigo te po wai, “Dago te bidi me deligo dago abe te penani we nogi sidali weyu, te dago me gogologobeo,” wali.

Copyright information for `MPS