a[Tpi 7:9]
b[Tpi 7:9]

Genesis 37

Jekop te aga aya polobadu biliyu bidali bulu, te Kenan tǫde bididuai. Te Jekop aga ogomani dali augwali bidibadi, tama e tobage kolesaga augwalide pedelali. Odao.

Josep aga ama dede dabe dali

Josep te gesi ogwa bidi, te agai kibu be te 17 kibu be elaluali. Tama aga ama dede meba augwaligo te kibu sipsip me meme tonaluali, tama Josepgo augwali tau sali. Te aga ama dede augwali te sę ebo we Bilha me Silpa sigo ogomani, te augwali si aga ayago we si da, te aga paba si dao. Tama agai te aga ayabolo te aga ama dedego dwai kolesaga ebo po weyu yai.

Israelgo te Josepde wiegi yai homu pemene mu ebo tiwai te aga gasa ogomani dali wiegi yai homu ebo tiwai me ebeo, magi baso meni, idago te Israel monu dabe ebo sogo Josep ame nani. Tama agai te wiegi yai au yai ugwa nigilama, tama agai te Josepbolo mawai. Te aga ama dedego suali, te ayago Josep dali wiegi yai homu pemene mu eyu, tama augwali te godolo kuna me ebe. Tama tibaso, augwaligo dwai homu mu te Josep dali elama, tama augwaligo abagi homu eyu, wiegi yai po aga dali me wabeo.

Tama me sogo deli te Josepgo na elama, tama agai te na yali te aga ama dede dali pusali. Tama augwaligo odama, tama augwaligo homu dwai mu elaluali. Magi baso meni, Josepgo te na yali pusuyu, te po wai, “Dagego eno na yali po odao,” wali. “Da tigidali te wit gide bidaluyu, tama te wit dunu pali. Tama eno duani te hogodama, tama dolo dolugulali. Tama dagego duani nai dabe dolaluyu, te eno duani nai te bagulama, tama teba kidu sugunani,” wali.

Te aga ama dedego agabolo te po wali, “Nago homugo te nage dago tuni bidi pedelama, tama da tonaluainogo ebawe?” Tama aga ama dede augwaligo te na yali po odama, tama augwaligo aga dali sębę mu yai.

Tama nosali Josepgo na ma elama, tama agai te po aga ama dabe dali pusali. Agai te po wali, “Odiąo, eno gasa na ma ebo suali, tama eno te giliga de polua si, me te nogo si olama, sągągo deli te hǫ dabe, augwali te enaba basi gulama, kidu sugunidu geai,” wali.

10 Agai te na yali po te aga aya dali, me te aga ama dede dali pusubadi yali. Tama aga ayago aga dali wado po olama, te po wali, “Te magi yai na dawe? Nago homugo ena, naga ida dali, me te naga ama dede dali, te da aselama, te nage gesabidiba kidu sugunama, basia gulagasomainu ebawe?” 11 Tama Josep aga ama dedego aga dali haliga husugu yali, tiali goli aga ayago te po tigidali aga homude munalualio. a 

Te Ismael dabego Josep abelama, tama Isipba pali

12 Nosali te Josepgo ama dede augwali te augwa ayago kibu sipsip tonalugi peyu, te Sekemba pali. 13 Tama Israelgo Josepbolo te po wai, “Naga ama dede augwali te Sekem bulu pąde te kibu sipsip tonalu bidibao. Nage sisi elama, eno nage te augwali bidalubo digi tagala palaibao,” wali. Josepgo te tiwai po wei ponani, “Ena sisi yai dao.”

14 Tama ayago te po wali, “Nage te naga ama dede bidiboba pelama, tama augwali sugi pao, te augwali bugagia bidibowe, ma meniwe? Tama nago te sipsip dabe me suyu, te augwali usu elalubowe, ma meniwe? Te augwali sulama, teda nage ma ena bidibo madi asiyu, tama enabolo wagameo,” wali. Te aga aya Jekop te Hebron hanu odogo tǫde bidiyu, tama te Josep tagala palali.

Josep digibulu pelama, tama te Sekem tǫba sabolama,
15 tama aga tede augwali gegeyu, bagula biliduali. Tama bidi me deligo aga subaso, tama agabolo hanalu wali, “Nago magi nai gegebawe?”

16 Tama Josepgo te po wali, “Eno te ena ama dede gegebo sę ebao. Nago enabolo te augwali mena badu te sipsip tonalubo po waibawe?”

17 Te bidigo agabolo te po wai, “Augwaligo e bulude bidali taga pai dao. Te augwali te Dotanba paiba po wabo eno odali.” Tama Josep te aga ama dede pali wali nosali digibulu ma pelama, tama augwali te Dotande bidibo suali.

18 Aga te digibulu digi asobadi, tama aga ama dede augwaligo aga suali. Aga te pąba asisąbadi, tama aga ama dedego aga elabo po minama, dąų wali. 19 Augwaligo te augwa hasi tomode po minama, tama te po wai, “Te na ebo koneai bidi te asobao,” wali. 20 “Polo tama, dago aga ela munama, tama aga tigi te ulu sigi ąį elaluai madigi dedage me deli teba sąwaibao. Te nosali dago te po waibao, ‘Te genuai uni hasa me deligo aga elama, tuali,’ po waibao. Tama agai na yali sę mu pedelaibawe, ma meniwe, te dago koneaibao,” augwaligo tama po wali.

21 Rubengo te po dabe augwaligo mibo po odama, tama agai Josep tau sainu yali. Tama agai te po wali, “Dago te aga me ela mugobeo. Menio. 22 Te dagego aga kaneme me geligobeo. Te aga te e bidi meni yai bulude elalubo tǫ dedageba sąyagameo. Tiyu, dagego aga dolamuo,” wali. Rubengo homugo te Josep tau sabo homu elama, tama aga te aga aya bidibo madi nosali ma tagala palainu, tama agai te po wai dao.

23 Tama Josep te aga ama dede bidibo madi teba sabalubadi, tama polo augwaligo aga pageabi elama, tama augwaligo bomonama, te wiegi yai au yai bobage ugwa te dia sąwani. 24 Tama augwaligo aga sela pelama, te wę sula sai tǫ dedage me deli elalubo madi teba tula palai.

25 Tama nosali augwali dugulama, tama toma neyu, nai tuali. Te augwali nai tuyu bidalubadi, tama augwaligo te Ismael bidi hani aselabo suali, te gasa nogi me elalubo te Midian bage dao. Augwali te Gileat tedu aselama, tama te Isipba painu soali. Tama augwaligo kamelgo te gasagi yai denami ebo ni kaneme, me te haniani sanda dabe, te sela soali, magi baso meni, augwali te Isipba pelama, tama tede te augwa dobu si ebo bisnis sę yaibao. 26 Tama Judago aga ama dedebolo weyu, te po wali, “Te dago dena ama elama, tama dago geme dualubo sę eyu da, te dago mena dwagi yai nai agade sogowe? 27 Te dago aga e Ismael hanibolo menama, tama dago mone sinao. Te kolesaga eyu da, te dago aga me dologobe. Aga te dago ama, tama dago deli kaneme mu dao.” Tama te ama dedego te po usu da po wali. 28 Te Midian bisnis bidi meba teba asobaso, tama augwaligo Josep te tǫ dedagede selama, tama aga te Ismael dabebolo mani. Te Ismael dabe augwaligo Josep te mone ge bidi sese deli, te 20 silva monego abelama, tama augwaligo aga te Isipba selasa pali. b 

29 Nosali te gomunai ama Ruben te ma aselama, te tǫ dedageba tonani, tiali goli Josep tede me bidibeo. Aga te homu dene elama, tama aga gudali ugwa pisą yali. 30 Aga te ama dede bidibo madi pelama, tama te po wali, “Te ogwa Josep tede bidibeo! Te eno magi sę megi yaibawe?” 31 Nosali te aga ama dedego te meme me deli elama, tama augwaligo te Josepgo gudali ugwaba te kaneme muai. 32 Tama augwaligo te ugwa te augwa ayaba sela pelama, tama augwaligo te po wali, “Dago e ugwa gegali. Nago suao. Te ugwa te nago ogwago ugwa dawe, ma meniwe?”

33 Ayago te ugwa sulama, koneyu, tama te po wai, “Awe. Te ugwa te Josepgo ugwa dao. Te dwai uni hasa me deligo aga elama, tama aga tigidali tula silai sualio,” wali. 34 Tama Jekopgo aga ugwa pisilama, tama agai te dwai olo ugwa te aga ogwade homu dene ebo te ola mayu ebo, te ugwa gudali. Tama agai te wai hagede gela wabo te sesabi elama, mu wai. 35 Te tigidali ogomani, wegi mani me aselama, tama augwaligo te aga homu te wiegi yai ma ilabo po wagasali. Tiali goli, agai te wei mu isiąma, tama te po wai, “Eno aga hagede gela udubadi, te ena aga dali te isali bidi dabego gų pageba bidigi peyu, usu naibao,” wali. Tama aga ogwa Josep hagede te gela naga udu bididualio.

36 Tama tidubadi, te Isipde te Midian dabego Josep te Isip tuni bidigo ofisa bidi me deli, te Potifarbolo mani, tama agai Josep te monego mu abelai. Potifar te Isip tuni bidigo genuai be tonalubo ami bidi dabe augwali tonalubo bidi dao.

Copyright information for `MPS