a[Nam 24:9; Ped 5:5]
b[Gag 23:3-20]
c[Gag 25:9-10; 35:29]
d[Tpi 7:15]

Genesis 49

Jekopgo te aga nosali ame nabo wąį hani dabede te po digi po begelama, te nosali pedelabo sę po pusali

Te Jekopgo aga ogomani tigidali i olama, tama aga pibo sai bet sesegede duagulama, tama agai augwalibolo te po wali, “Dage hodobo sisinagaselama, tama eno dagebolo nosali pedelabo nai po waibao. Aselama, hodobo duayagasao, dage te Jekopgo ogomani, tama bugagia odiąo. Dagego duga aya Israelgo po bugagia odao. Ruben, eno gomunai ogwa, nagede eno bomo elalubao. Tama nage eno gomunai ogwa te ena gesi bidi elalubadi, hasia bolo ame nani. Nago nogi genuai mu, tama nage te eno tigidali ogwade nage bomai mu elalubo dao. Te nago kolesaga te wę bomonama, subigila soabo tiwai gilama ebo. Tiali goli, nage te gomunai bidi nogi me elalugobe, magi baso meni, nago te naga ayago we dali pagela piali. Tama nago eno we sabo hwįgiani. Nago te ena pibo bet tomoba bogi soali!” wali.

“Simeon de Livai si, augwali si te ama nami si dao. Augwali sigo te hwįbo moni hwą te sabiliyu, te dwai kolesaga ebo dao. Eno te augwali sigo geme ebo sęde te eno usu da po me wagobe. Ena te augwali si sisinama bidibo pesagede me bidigobeo, magi baso meni, te augwali sigo te wado ebo sogo te bidi dabe ela muyu yali. Tama hagoma eyu, augwali sigo te dodolama bilibo kolesagago te bulmakau sągą babi kigibili tologobo da. Te haliga sębę ebo sęgęgo te augwali si mesegelali, magi baso meni, te augwali sigo wado po wabo te bomo mu yali. Tama haliga sębę ebo sęgęgo te augwali mesegelali, magi baso meni, te augwali sigo haliga sębę ebo te dwai mu yai. Te eno augwali si te Jekopgo bulu tedali tedali tedela pomainu yaibao. Te eno augwali si te Israel bage tomode bidada pomainu tedela palaibao.”

“Juda, te naga ama dede augwaligo te nago nogi ugwaba saibao. Nago te naga boi bidi dabe augwali te magede tola siyu yaibao. Te naga ama dede augwali mage aiyaba basi gulama, tama nage nogi ugwaba saibao. Juda, nage te gesi ogwa bidi laion me deli tiwai. Agai te aga hasa elama, tama nosali te aga geme dualalubo pesagede geme ma duala sigi pabo tiwai yali. Juda te ogwa bidi laion me deli tiwai aga da. Agai te aga sągą dili dodolama, tama nosali aga pibo da. Tama me deligo te aga dali hagoma me eyu me egobeo. a  10 Agai te tuni bidigo dono tulama, tama aga sągą sawali si tomoba muani. Tama tede mu elaluaibao, te gasa bidigo te bomo sogobeo. Teda agai te bomo tolaluyu, tama te bomo aga aya mu pedelama, tama te tigidali hani bidi dabe tonalubo teba mu usu naibao. 11 Agai te aga donki te bono ni wainde gebelaibao. Agai te ogwa bidi donki te wiegi yai ni wain nologode mu gebelaibao. Agai te aga ugwa te waingo wę telawaibao. Agai te kaneme tiwai wain te mama yai ąįgo wę telawaibao. 12 Te wain wę te sisi yai dao, tiali goli te nosali pedelabo tuni bidigo gedu si te husugu sisi mu yaibao. Te ame pę te tedela yai dao, tiali goli te we bidi tonalubo bidigo kele dabe te wiegi yai nala tigi poai yaibao,” wali.

13 “Sebulun te tamu ąį pąde bidaibao. Te aga bidibo tama wę saneba te sip dabe tuagasobo madi elaluaibao. Te agai tǫ sesege badu te dąį igi pabo te Saidon buluba usu nugi paibao.”

14 “Isakar te bomai donki tiwai me deli dao. Tiali goli, aga olo te walu tomo daide pila muaibao. 15 Agai te toma nabo dwagi yai bulu pesage sulama, tama tǫ te wiegi yai mu elaluai, tama agai te walu dabe toliyu, te dili bomo elama, tama aga te olo sę ebo bidi pedelama, tama bomai sę dene yaibao.”

16 “Dan te aga hani bidi dabe augwali te Israel hani me deli dao, tama agai te aga we bidi dali te po tų dodolobo sę bugagia yaibao. 17 Dan te sunumi sesegede te hasamani me deli tiwai elaluaibao. Te hwįbo hasamani me deli da. Aga te sunumi sesegede bidaibao, tama te posoga paliyu, te hos sągąde gąų kelaiba, tama bidi te hosde dualama udabaso da, te aga tula muaibao.”

18 “Yawe, nago ena tau somainu eno nage tonalubo dao.”

19 “Te nai wi sabo bidi dabe augwaligo te Gat dali hwįagasaibao. Tiali goli, Gatgo te augwali dali ma begelama hwįyu, tama augwali ela gudulaibao.”

20 “Te Asergo tǫde te wiegi yai nai mu holaibao. Te Asergo te gavman tuni bidigo wiegi yai tuabo nai pedalubo sę ilaibao.”

21 “Naptali te uni sulai meme te aga homu wali bilibo tiwai yaiba. Tama aga wiegi yai wai dabe ame nabo da.”

22 “Josep te bidigo tonalusiąbo donki me deli tiwai. Aga te wę ulu sesegede bidibo donki me deli tiwai. Aga te bulu du pedai badu bidibo, te ogwa bidi hos me deli tiwai dao. 23 Te boi bidi dabego moni wąbi dobo mu hwįaibao. Augwaligo enesigigo aga pobeasa paibao. 24 Tiali goli, augwaligo enesigi tigidali togwa pali. Tama agai enesigi balibi pedebeo. Te God, Tonalubo Bidi, agai te Israel dabe sesemane sogo tau siyu, tama te kolesaga ebo hasegelegobeo. Te agai bomo te moni genuai bulu du masigi tiwai dao. Te God agai te Josep dali boi homu ebo bage augwali aiyaba elaluaibao. 25 Aga te naga ayago God, tama aga bomo mu tigidali elalubo. Eno homugo agai nage mobo mayu, tama nage tau sabo. Te mobo hauwa Josepba muaibao, te kulubage ugwadu tulubo, tama tǫ dologode wę pedalubo, te idago wai hauwa ame nabo mobo mobadi, 26 te tubo nosai wai dabego mobo me, te plaua dabe holobo mobo me mani, te polobadu bulu du dabe te mobo me mani, te sesemane sogo elaluabo bulu du dabe mobo mawai. Eno homugo te tigidali mobo te Godigo Josep toboluba muao. Augwali te bidiba holama, te augwaligo aga te gasagi yai bidi te aga ama dede tiwai gilama me nigilibeo. Menio. Josep aga gasagi yai tedali bidi bidaibao,” wali.

27 “Benjamin da, te genuai uni yowi me deligo te hasa dabe elibo kolesaga konebo tiwai gilama yaibao. Te kigamu te aga te elali hasa tubo gilama yaibao. Tama pio aga te sali nai dabe dobaduaibao,” wali.

28 Te e da, te Israel hani nogo si olama, sągągo si, tama te dwagi yai bidabo po dabe te aga ayago augwalibolo wali. Tama agai augwali tigidali deli delibolo usu nama, te po augwa ayago augwalibolo wali.

Jekop isibaso, tama augwaligo aga pubulali

29 Nosali Jekopgo te po aga ogomanibolo wai, “Enade, te pąde megi tama eno ena hani isali bage dabe sisinigi paibao. Dagego eno tigi te ena wąį dabe dali te bidi Hit hani dabego te Efrongo tǫ pedai badu te ola be tomoba mugi pao. 30 Te ola be te giliga ge pedalubo badu te Mamre, te Makpela bulude elaluali, te Kenan tǫ badu elaluali. Abrahamgo te tǫ te Hit bidi dabe, te Efrongo tǫde abelali. Agai te tǫ me, te ola be me, te gų page nigainu abelai dao. b  31 Augwaligo Abraham de aga we Sara si te gų pagede pubulali. Tama augwaligo Aisak me aga we Rebeka te gų pagede pubulali. Tama eno te Lea me te gų pagede pubulali. c  32 Abrahamgo te tǫ me, te ola be dali, te Hit bidi dabe dali polobadu abelai dao,” wali.

33 Jekopgo aga ogomani dali po mia silama, te aga sągą te bet sai dologo tomoba bulama, tama aga isali. Aga te aga hani bage bidalubo madi, te isali bidi dabego buluba tama pai. d 

Copyright information for `MPS