a[Tib 40:6-8]
b[Tib 110:1]
c[Jer 31:33]
d[Jer 31:34]
e[Prs 8:30; Ese 36:25]
f[Ais 26:11]
g[Bom 17:6; 19:15]
h[Sai 24:8]
i[Bom 32:35, 36]
j[Hab 2:3-4]

Hebrews 10

Te polobadu yali ofago te sęgę sela sąbo usu me egi menio

Te Juda dabego ofa mabo bomai pode dago te nosali pedalabo dagalude elalubo wiegi yai nai dabe noma naga subao. Te bomai po da, te nai dabego te hania piksa noma mu menio. Te bomai pogo te po wai, augwaligo te deli tigi poai ofa naga te tigidali sogo yao wai, te tigidali kibu bede me te yao wai. Tama te ofa maiabo bomai pogo te we bidi augwali te God pąba asomainogo dodolobo te usu egobeo. Te bomai pogo augwali te wiegi yai mu munu me pedalogobeo. Menio. Te ofa maiabo bomai pogo augwaligo yali dwai sę sela sąnama tama augwali wiegi yai mu ilama pedaligi sogo da, teda augwaligo te ofa ma egi menigi dao. Tama te Godibolo lotu po wagasali we bidi dabe augwali te deli sogo yali ofade te wiegi yai pedaligi sogo da, teda augwaligo homude te sęgę elalubo homu kone me egi menio. Tiali goli menio. Tigidali kibu bede, te ofa mabo sę ebogo augwaligo te sęgę ma homugo kone palobo. Magi baso meni. Te omai bulmakau kanemego me te meme kanemego me te sęgę sela sąbo te usu munu me egobeo. Tama tibaso, Krais e tǫba dulubo sogo pąba yagasali sogo agai Godibolo e po wai dao:

“Nago te augwaligo kibu dabe dali te gasa nai mego
te ofa yainogo te nago homugo hagela yai.
Tiali goli nago enabolo maiabo te tigi deli te sisi
ilai dao.
Te ofa dabe augwaligo te kibu tigi sese siago
domainogo ulubo ofa me, tama te sęgę sela sąbo ofa
me, tede nago homugo hagela ebo dao.
Tialima megi eno e po obao: Godio, ena asalio.
Te tiwai te augwaligo enade po olama, te po
polobadu te bukude asęani, te megi ena asali te
eno nago homu kolesaga wali painogo asai dao.”
a 
Kraisgo te po polobadu wai.
Te po tomode hasia Krais agai te bomai pode augwaligo te ofa ebo kolesaga po wai. Agai Godibolo te po wai, “Nago homugo te augwaligo te kibu bulmakau dabe elama te ofa ebo me, te gasa nai mabo me, tede hagela homu yali. Te augwaligo te siago domainogo te kibu tigi sese ulubo ofa me, tama te sęgę sela sąbo ofa me, te nago homugo hagela ebo dao,” agai te po wai. Te we bidi augwaligo Godigo digi bomai po wali peyu, tama te tobage ofa tigidali mani goli, agai te po wai. Tama nosali agai te po me wai, “Ena asali, te nago homu kolesaga wali painogo asalio.” Tama tiyu, Godigo te hasia elaluali ofa mabo kolesaga tagaliyu hasegelali, tama agai te Kraisgo ofa mani nosali asali kolesaga bomonama dodolai dao. 10 Jisas Krais agai te Godigo homu kolesaga wali pelama, tama aga bidibo ula aga digi Godibolo te ofa tiwai ilama, te deli sogo naga mawai. Tama tialigo agai da tigidali wiegi yai mu ilai dao, te da sęgę me elalubo menio.

Te Kraisgo ofa ebogo te sęgę sela sąbo te usu mu yaibao

11 Te tigidali pris bidi dabe augwali doligulama, tama augwa pris sę tigidali sogo ebo dao. Tama tiyu, augwaligo te ebo ofa tiwai naga me idu gebo dao. Tiali goli te ebo ofa dabego te we bidigo dwai sęde sali sęgę sela sąbo usu munu me egobeo. 12 Tiali goli Kraisgo aga digi te sęgę sela sąbo ofa te deli sogo naga mani, tama te ofa te tigidali sogo usu nama elalua paibao. Agai tama tilama, tama aga megi te Godigo dolo nogode dulalubao. 13 Aga te tiwai bidiyu, tama agai te Godigo aga boi bidi te aga dologoba mubo te tonalubo dao. b  14 Te me te we bidi augwali agai te usu niba kadu mu wagasomainu ilali, agai te ofa deligo naga augwali wiegi yai mu pedalomainogo yali, te augwali bugagia mu bidada pabo ula somainogo tama tiai dao. 15 Tama tede me Godigo Mobo Bidigo me e tiwai po dabolo wai dao:

16 “Genuai Bidi Godigo te po wai,
‘Te sogo bolo silibo si, teda nosali te eno gasa po te
augwali dali dąų waibao.
Te augwali tau sabo dąų wabo po e dao:
Te eno bomai po tigidali te augwali homuba
munama, tama augwali homu kolesagade eno te po
asęaibao.’” c 
17 Tama Mobo Bidi agai te po ma wadolama wai:

“Tama eno augwaligo sęgęba me te augwaligo
yali dwai kolesaga teba te eno homugo kone ma
egobeo.” d 
18 Tama tibaso, Godigo te sęgę sela sąwai baso da, teda te sęgę sela sąwainogo te ofa mabo kolesagago te sę me elalugobeo.

Dago konealubo po dąų mu olama God pąba pinao

19 Ama dedeo, Jisasgo aga digi te dago sęgę sela sąbo ofa tama bugagia yaligo da, teda da wi isąbadi te Tedali Gasagi Yai Be Habu Mu tomoba pabo usu dao. Jisasgo digi aga kaneme geleyu tama isibaso, da te habu tomoba pabo usu mu ilai dao. 20 Aga tigi isibogo te tųde walalubo nami ugwa bogo badu muani tiwai, tama te bidibo ula sabo gesi tų dalali, te da te be habu tomoba painogo yali. 21 Tama aga da, te dago genuai polalubo pris bidi dao, tama aga te Godigo dagalude elalubo be tonalubo bidi bidibo dao. 22 Tama elalualigo da, teda da homu mu eyu, tama homu si me esiąyu dago Godiba konealubo po dąų mu olama, tama da aga pąba pinao. Agai dago yali dwai sę sęgę sela sąnama, tama dago homu wiegi yai ma ilali. Me agai dago tigi sese te wiegi yai ąįgo mu telawali. e  23 Tama dago homu nosali da Godigo bidibo digi bidigi paibao. Tama homu eyu, tama dago te gasa we bidibolo te homu ebo po haninama pusali. Awe, dago te konealubo pode dena homu bugagia dąų olama, tama tede homu si me ilamuo. Magi baso meni. Godigo ebo kolesaga dago koneani, tigidali sę te agai yaibao po wabo sę te mu tama agai te sę ebo dao. 24 Da we bidi deli deli dena hasi te dago abagide homugo kone palao. Augwa hasi augwaligo dwagi yai homu eyu godolo ebo kolesaga dali, te dwagi yai tau sabo kolesaga me, te kolesaga si yabo homu hodolomainogo eyu, dago dena abagi dabede homugo kone palama tama tau sao. 25 Tama tiyu, dago te ama dede dali deliba sisinibo kolesaga te me tagalamuo, te bidi mebago te ebo kolesaga tiwai egimio. Menio. Duga koneani, te dago Genuai Bidi Jisas asabo side bodolu te pąba yagasalio. Tama konealigo da, ama dedego homu kolesaga tau siyu dąų walobo sę bomonama dago yao.

Dago Godigo Ogwa tudiba me mugio

26 Te dago te Kraisde mu po mu sai digi tama nosali te dena homugo digi dago te sęgę sabo kolesagade ma bilidubaso da, teda te sęgę sela sąyabo te gasa ofa me elalugobeo. 27 Menio. Te da wi mu elama, tama te po tų yabo bodolu naga tonaluaibao. Tama te sia te posolo yai mu elalubao tama te siago te God dali boi bidi ebo bidi tigidali ulaibao, te me tonaluyu bidaibao. f  28 Dago koneani, te bidi me deligo te Mosesgo bomai po hagela homu eyu tama te bolobaso, tama te bidi sigo me selago sulama tama augwaligo agai te dwai sę yali po pusubaso da, teda augwaligo te bidi homu dene munu me ebeo. Menio. Te aga isimainao wai dao, tama te tobolu bidi dabe augwaligo aga ela muani. g  29 Te Mosesgo mani bomai po bolali bidi dali te bidi dabego tama tialigo da, teda dagego magi homu te Godigo Ogwa tudiba mubo bidi dali yaibawe? Magi baso menio. Te Kraisgo te Godigo da tau sabo po dąų wali kanemego te bidi wiegi yai ilali. Tiali goli te bidigo dwai kolesaga ma ebogo te po dąų wali kaneme te olo nai tiwai ilalio. Tama agai dwai kolesaga mu te olo tau sabo kolesaga mabo Mobo Bidi dali eyu, tama Mobo Bidi nogi posobo po tama wai dao. Kone palao. Te bidi aga sęgę genuai mu sobaso, te dolo mu dao. h  30 Dago koneani, te Godigo me sogo po weyu te po wai, “Te dwai kolesaga wei ponobo sę, te eno yabo sę dao. Ena digi eno te dwai dene sabo te wei ponaibao.” Tama dago koneani, agai po ma wai, “Genuai Bidi aga digi aga we bidi augwali te po tų ebode dagalaibao,” te po wai dao. i  31 Te bidibo ula elalubo God agai da dąų weyu, te dwai dene ebo te dabolo wei ponainogo eyu da, te dwai wi mu ebo nai dao.

Da konealubo pode bomonama dolaluao

32 Tiali goli te dageba polobadu pedalali sę te dagego homugo ma kone palao, te sogo dagego Godigo po odama tama tede te ula sai. Te sogo gasa bidi dabe augwaligo genuai sę dene dagebolo mani, tama dagego dene hauwa tolai. Tiali goli dage bomonama bugagia dolaluai dao. 33 Me sogo augwaligo dage te tigidali we bidi gedude dodolama, tama augwaligo dwai posobo po dagebolo wali, tama augwaligo gedude dagebolo dene mawai. Tama me sogo dage te sabo sęgę tiwai sabo we bidi dali dage kisa selama, tama dagego augwali tau sai dao. 34 Tama tiyu, dagego te kalabuside bidali we bidi augwali homu dene eyu tau sobadi, te dagego me te dene sali. Tama me sogo te bidi dabe augwaligo bomonama dagego doado bage dagala siyu yali goli, dagego homu wiegi yai pemene eyu, tama augwaligo te nai dabe sabo gogolali. Magi baso meni, dagego koneani, tama duga nai digi mu da, te tedali me elalubao homu yali, te Godigo dagebolo maiabo nai dabe, tama te nai da te sesemane sogo elalua pabo nai dao. 35 Tama tibaso, dagego duga te bomai konealubo po dąų wali te munu me tagaligio. Menio. Te kolesaga me ebogo te genuai nai nosali sabo bomo te elalubao. 36 Dage bomo elama dolaluyu, tama sęgę bugagia toloyu, tama duga te Godigo homu wali pagameo. Tama tiyu, duga wiegi yai nai somainogo yaibao, polobadu Godigo te nai dagebolo mawaibao po dąų wai dao. 37 Magi baso meni. Godigo wali po te bukude asęani me e tiwai po elalubao:

“Te sesabi me egobeo.
Dwasianu sogo digi, tama te asobo bidi te aga
sabolaibao.
Te aga gesege elama me tonalugobeo.
38 Tiali goli eno doloba pai we bidi augwaligo
enade konealubo po wali pobaso, tama augwali
bidada paibao.
Tialima augwali tomode te bidi me deligo ena
tagaliyu tama ibaba kila sobaso da, teda eno
homu aga dali wiegi yai me egobeo,” te po wai.
j 
39 Tiali goli da te ibaba kila selama te hagayabo we bidi te me tegobeo. Menio. Da te konealubo po dąų wabo we bidi hani dao, tama God agai da ma dobola sabo dao.

Copyright information for `MPS