Hosea 3

Hosea me aga dwai we dali

Genuai Bidigo enabolo te tama po ma wali, “Nago te naga we godolo ma yao, megi da agai te gasa bidi dali penani yali te palia salio. Nago aga godolo mu eyu, te eno ena we bidi Israel dabe, augwali godolo mu ebo tiwai gilama yao. Mu tama, te augwaligo ena tagalama, te tibo godiba pelama, tama augwaligo te olali wain wai dabe te tibo godiba ofa yainu sali. Tiali goli, tagalao, eno te Israel dabe godolo mu idubo dao,” wali.

Tialima, eno te we te 150 kinago, me te bali naigo pągąwai beg a naga olama, me deligo eno te we ma abelali. Tialima, te eno agabolo wali, “Mu tama, nage te eno we dao, tiali goli, te megi tebode ena nage dali me pigobeo,” wali. “Hasia bolo te nage ena dali hauwa sogo elama bidao, tama te sogo nage te sunumide bilibo we tiwai me bidilamuo. Tama te eno nage naga tonalueibao,” eno te po wali. Te tiwai naga te Israel dabe te hauwa sogo olo bidaibao. Tama te augwali tonalubo te polalubo bidi, me king bidi te meni yaibao. Te augwaligo te tibo godiba ofa me isąyu, te augwaligo masigi pos ni me dualisąma, lotu me wagobeo. Te augwaligo te haniani tibo god dabe tagalaibao, tama te piksa dabe augwa te nosali pedelabo sę konemainu ola mabo nai dabe, te tagala silaibao. Te tiali sogo silibaso da, teda te Israel dabe te Godiba ma aselama, te Genuai Bidi deliba naga lotu waibao. Te augwaligo te king Devitgo wąį nǫų deli naga wali paibao. Tama augwa te Genuai Bidigo po dologoba naga pobaso, tama agai te haniani wiegi yai nai augwaliba mayu yaibao.

Copyright information for `MPS